ନୂଆଦିଲ୍ଲୀ,୨୮/୧୨ : ଏବେ ବ୍ୟାଙ୍କଗୁଡିକ ସାମ୍ନାରେ ଡିଜିଟାଲ ଠକେଇ ନୂଆ ଆହ୍ୱାନ ଭାବେ ଉଭା ହୋଇଛି । ସାମାନ୍ୟ ଅବହେଳାରେ ଆକାଉଣ୍ଟ୍ ସଫା କରି ଦେଉଛନ୍ତି ସାଇବର ଠକ । ଏହା ସରକାରଙ୍କ ପାଇଁ ଚିନ୍ତାର କାରଣ ପାଲଟିଛି । ଗତ ୯ ମାସକୁ ଦେଖିଲେ ୧୧,୩୩୩ କୋଟିର ଡିଜିଟାଲ ଠକେଇ ସାମ୍ନାକୁ ଆସିଛି । ଚଳିତ ଆର୍ôଥକବର୍ଷର ପ୍ରଥମ ୬ ମାସରେ ବ୍ୟାଙ୍କଗୁଡ଼ିକରେ ଠକେଇ ମାମଲା ଚିନ୍ତାଜନକ ରହିଛି । ବ୍ୟାଙ୍କରେ ଏଭଳି ୧୮,୪୬୧ ମାମଲା ସାମ୍ନାକୁ ଆସିଛି । ସେହିଭଳି ବ୍ୟାଙ୍କ ଠକେଇ ସହ ଜଡ଼ିତ ଅର୍ଥ ୮ ଗୁଣ ବୃଦ୍ଧି ହୋଇ ୨୧,୨୬୭ କୋଟି ଛୁଇଁଛି । ଆର୍ବିଆଇ ଗୁରୁବାର ଏ ନେଇ ଏକ ରିପୋର୍ଟ ଜାରି କରିଛି ।
ଆର୍ବିଆଇ ରିପୋର୍ଟ ମୁତାବକ, ଗତ ଆର୍ଥିକ ବର୍ଷ ସମାନ ଅବଧିରେ ୧୪,୪୮୦ ବ୍ୟାଙ୍କ ଠକେଇ ମାମଲା ସାମ୍ନାକୁ ଆସିଥିଲା । ଏଥିରେ ୨୬୨୩ କୋଟିର ରାଶି ସାମିଲ ହୋଇଥିଲା । ଗତ ଆର୍ଥିକ ବର୍ଷରେ ବ୍ୟାଙ୍କ ଠକେଇ ସହ ଜଡ଼ିତ ଅର୍ଥ ୧୦ ବର୍ଷ ମଧ୍ୟରେ ସବୁଠାରୁ କମ୍ ଥିଲା । ୨୦୨୩-୨୪ରେ ଇଣ୍ଟରନେଟ୍ ଏବଂ କାର୍ଡ କ୍ଷେତ୍ରରେ ଠକେଇ ୪୪.୭% ଥିଲା । ମାମଲା ସଂଖ୍ୟାକୁ ଦେଖିଲେ ଏହା ୮୫.୩% । ଗ୍ରାହକଙ୍କ ଉପରେ ସୋସିଆଲ ଇଞ୍ଜିନିୟରିଂ ଆଟାକ୍ ଦ୍ୱାରା ଠକେଇ ମାମଲା ବଢ଼ୁଛି । ଏଗୁଡିକ ବ୍ୟାଙ୍କର ପରିଚାଳନା ଏବଂ ସମ୍ମାନ ପ୍ରତି ପ୍ରଶ୍ନବାଚୀ ସୃଷ୍ଟି କରୁଛି । ଟ୍ରାଞ୍ଜାକସନକୁ ମନିଟର କରିବା ଏବଂ ଠକେଇ କାର୍ଯ୍ୟକଳାପ ରୋକିବା ବ୍ୟାଙ୍କଗୁଡିକ ଲାଗି ଏବେ ଆହ୍ୱାନ ଛିଡ଼ା କରିଛି । ଏପଟେ ଅନାଦାୟ ଋଣ ହ୍ରାସ ଏବଂ ଋଣ ଯୋଗାଣରେ ୨ ଗୁଣ ବୃଦ୍ଧି ଯୋଗୁ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକର ଲାଭରେ ଆଖିଦୃଶିଆ ଉନ୍ନତି ପରିଲକ୍ଷିତ ହୋଇଛି । ୨୦୨୪-୨୫ରେ ବ୍ୟାଙ୍କ ଗୁଡିକର ଲାଭ ୧.୫ ଲକ୍ଷ କୋଟି ଟଙ୍କା ଟପିବା ନେଇ ଆଶା କରାଯାଉଛି । ଚଳିତ ଆର୍ôଥକ ବର୍ଷର ପ୍ରଥମ ୬ ମାସରେ ବ୍ୟାଙ୍କଗୁଡିକର ନେଟ୍ ଲାଭ ୨୫% ବଢ଼ି ୮୫,୫୨୦ କୋଟି ଟଙ୍କା ରହିଛି । ଯାହା ଗତ ଆର୍ôଥକ ବର୍ଷ ପ୍ରଥମ ୬ ମାସରେ ୬୮,୫୦୦ କୋଟି ଟଙ୍କା ରହିଥିଲା ।
ଚଳିତ ଆର୍ଥିକ ବର୍ଷ ଦ୍ୱିତୀୟାର୍ଦ୍ଧରେ ମଧ୍ୟ ବ୍ୟାଙ୍କଗୁଡିକର ପ୍ରଦର୍ଶନରେ ଉନ୍ନତି ଆସିବ ବୋଲି ଆଶା କରାଯାଉଛି । ୨୦୨୩-୨୪ରେ ବ୍ୟାଙ୍କଗୁଡିକର ମୋଟ ନେଟ ଲାଭ ୧.୪୧ ଲକ୍ଷ କୋଟି ଟଙ୍କା ରହିଥିଲା । ଆସେଟ୍ କ୍ୱାଲିଟି, ଋଣ ଅଭିବୃଦ୍ଧି, ନଗଦ ଅନୁପାତ ବୃଦ୍ଧି ସହ ବ୍ୟାଙ୍କ ଲାଭରେ ଉନ୍ନତି ଆସିଛି । ବ୍ୟାଙ୍କଗୁଡିକର ମୋଟ ଏନ୍ପିଏ କ୍ଷେତ୍ରରେ ଆଖିଦୃଶିଆ ହ୍ରାସ ପରିଲକ୍ଷିତ ହୋଇଛି । ୨୦୧୮ ମାର୍ଚ୍ଚରେ ଏହା ୧୪.୫୮% ସ୍ତରରେ ଥିବା ବେଳେ ୨୦୨୪ ସେପ୍ଟେମ୍ବରରେ ଏହା ୩.୧୨%କୁ ଖସିଛି । ସେହିଭଳି କ୍ୟାପିଟାଲ ଟୁ ରିସ୍କ ଆସେଟ ରେସିଓ (ସିଆର୍ଏଆର୍) ୩.୯୮% ବୃଦ୍ଧି ହୋଇ ୧୫.୪୩% ଛୁଇଁଛି । ଏଥିରେ ଉନ୍ନତି ବ୍ୟାଙ୍କଗୁଡିକର ସ୍ଥିତାବସ୍ଥାକୁ ଦର୍ଶାଇଥାଏ । ୨୦୧୫ ମାର୍ଚ୍ଚରେ ଏହା ୧୧.୪୫% ସ୍ତରରେ ଥିଲା । ବ୍ୟାଙ୍କ ଗୁଡିକ ଦୃଢ଼ ହେଉଥିବାରୁ ଦେଶର ଅର୍ଥନୀତିରେ ଉଲ୍ଲେଖନୀୟ ଯୋଗଦାନ ଦେଉଥିବା ଦେଖାଯାଉଛି । ବର୍ତ୍ତମାନ ଆର୍ବିଆଇ ସିଆର୍ଏଆର୍କୁ ୧୧.୫% ସ୍ତରରେ ରଖିଛି । ୨୦୧୫ରେ ଆର୍ବିଆଇ ଆରମ୍ଭ କରିଥିବା ଆସେଟ କ୍ୱାଲିଟି ରିଭ୍ୟୁ (ଏକ୍ୟୁଆର) ବ୍ୟାଙ୍କ ଗୁଡିକ ଲାଗି ଲାଭକାରୀ ସାବ୍ୟସ୍ତ ହୋଇଛି । ଏନ୍ପିଏକୁ ଚିହ୍ନଟ କରିବାରେ ଏହା ପ୍ରମୁଖ ଭୂମିକା ଗ୍ରହଣ କରୁଛି । ସ୍ଥିତି ଉନ୍ନତ ହେବାରୁ ଗତ ୩ ବର୍ଷରେ ରାଷ୍ଟ୍ରାୟତ୍ତ ବ୍ୟାଙ୍କ ୬୧,୯୬୪ କୋଟିର ଲାଭାଂଶ ପ୍ରଦାନ କରିଛନ୍ତି । ବ୍ୟାଙ୍କଗୁଡ଼ିକର ମୋଟ ଏନ୍ପିଏ ୧୩ ବର୍ଷର ସର୍ବନିମ୍ନ ସ୍ତରରେ ରହିଛି । ଗତ ୬ ବର୍ଷ ହେବ ବ୍ୟାଙ୍କ ଗୁଡିକ ଲାଭ ହାସଲ କରିବା ଜାରି ରଖିଛନ୍ତି । ଏବେ ସାଇବର ଠକମାନେ ଗ୍ରାହକଙ୍କୁ ଅତି ସହଜରେ ଟାର୍ଗେଟ କରୁଛନ୍ତି । ଏ ଦିଗରେ ଅଧିକ ସଚେତନତା ଲୋଡ଼ା ରହିଥିବା ଆର୍ବିଆଇ ଏହାର ରିପୋର୍ଟରେ ଉଲ୍ଲେଖ କରିଛି ।
