ନୂଆଦିଲ୍ଲୀ ୦୬/୦୧: ନୋଏଡା ସେକ୍ଟର-୨୦ ଅଞ୍ଚଳରୁ ଏକ ଅଜବ ଘଟଣା ସାମ୍ନାକୁ ଆସିଛି । ସେଠାରେ ଗତ ସ୍ୱାଧୀନତା ଦିବସ ଅବସରରେ ବଣ୍ଟା ଯାଇଥିବା ଲଡୁକୁ ନେଇ ବିବାଦ ଏତେ ବଢ଼ିଗଲା ଯେ ମାମଲା କୋର୍ଟରେ ପହଞ୍ଚିଛି । ସେକ୍ଟର-୨୦ ରେସିଡେଣ୍ଟ ୱେଲଫେୟାର ଆସୋସିଏସନ୍(ଆର୍ଡବ୍ଲ୍ୟୁଏ)ବ୍ଲକ୍-ବିର ଅଧ୍ୟକ୍ଷ ବିଦ୍ୟା ସାଗର ବିରମାନି ୧୬ଜଣଙ୍କ ବିରୋଧରେ ଏକ କୋଟିର ମାନହାନି ମାମଲା କରିଛନ୍ତି । ସ୍ୱାଧୀନତା ଦିବସ ଅବସରରେ ତାଙ୍କ ତତ୍ତ୍ୱାବଧାନରେ ବଣ୍ଟା ଯାଇଥିବା ଲଡୁକୁ ନେଇ କିଛି ଲୋକ ଆପତ୍ତିଜନକ ଟିପ୍ପଣୀ କରିଥିବା ଅଭିଯୋଗ ରହିଛି । ସୁରଜପୁର କୋର୍ଟରେ ଆସନ୍ତା ୨୭ରେ ଏହାର ଶୁଣାଣି ହେବ ।
ରିପୋର୍ଟ ଅନୁସାରେ, ଗତ ସ୍ୱାଧୀନତା ଦିବସ ଅବସରରେ ଆର୍ଡବ୍ଲ୍ୟୁଏ ଅଧ୍ୟକ୍ଷ ବିଦ୍ୟା ସାଗର ବିରମାନି ଚତୁର୍ଥ ଶ୍ରେଣୀ କର୍ମଚାରୀ ଓ ଅନ୍ତେବାସୀଙ୍କୁ ଲଡୁ ବାଣ୍ଟିଥିଲେ । ତେବେ ସେହି ଲଡୁ ବଣ୍ଟନରେ ଜାଲିଆତି ହୋଇଥିବା କିଛି ବାସିନ୍ଦା ଅଭିଯୋଗ କରିଥିଲେ । ସେମାନେ ଦର୍ଶାଇଥିଲେ ଯେ, ସେମାନଙ୍କୁ ଜାଲ୍ ଭାବେ କେଇ ହଜାର ଟଙ୍କାର ଲଡୁ ବାଣ୍ଟିବାର ବିଲ୍ ଦେଖାଯାଇଥିଲା । ୧୨ କିଲୋ ଲଡୁକୁ ପ୍ରାୟ ୭ ହଜାର ଟଙ୍କାରେ କିଣାଯାଇଥିଲା । କିନ୍ତୁ ତାକୁ କେଉଁଠି ଓ କାହାକୁ ବଣ୍ଟା ଗଲା ତାହା ଜଣାପଡି଼ନଥିଲା । ଏପରିକି ଅଧ୍ୟକ୍ଷ ବିଦ୍ୟା ସାଗର ବୋଧହୁଏ ନିଜେ ଲଡୁକୁ ଖାଇଦେଇଥିବେ ବୋଲି କେହି କେହି ମନ୍ତବ୍ୟ ଦେଇଥିଲେ । ସେହି ମନ୍ତବ୍ୟ ଯୋଗୁ କ୍ଷୁବ୍ଧ ହୋଇ ବିଦ୍ୟା ସାଗର ଓକିଲଙ୍କ ସହାୟତାରେ ୧୬ ଜଣଙ୍କ ବିରୋଧରେ ୧ କୋଟିର ମାନହାନି ମାମଲା କରିଥିଲେ ।
ଏହାପରେ କୋର୍ଟ ସେମାନଙ୍କୁ ନୋଟିସ୍ ପଠାଇଛନ୍ତି । ସେପଟେ ବିଦ୍ୟା ସାଗର କହିଛନ୍ତି, ଆର୍ଡବ୍ଲ୍ୟୁଏର ଅଧ୍ୟକ୍ଷ ଭାବେ ବିଗତ ଅଢ଼େଇ ବର୍ଷ ହେଲା ବିଭିନ୍ନ ପର୍ବପର୍ବାଣୀରେ କର୍ମଚାରୀ ଓ ଅନ୍ତେବାସୀମାନଙ୍କୁ ସେ ମିଠା ଓ ଲଡୁ ବଣ୍ଟନ କରିଆସୁଛନ୍ତି । ଏହି ପ୍ରକ୍ରିୟା ସମସ୍ତ ପଦାଧିକାରୀଙ୍କ ସହମତିରେ ହୋଇଥାଏ । ଏଥର ବି ସ୍ୱାଧୀନତା ଦିବସରେ ଲଡୁ ବଣ୍ଟା ଯାଇଥିଲା । କିନ୍ତୁ କିଛି ଲୋକ ମିଥ୍ୟା ଅଭିଯୋଗ ଆଣି ତାଙ୍କର ଭାବମୂର୍ତ୍ତି ଖରାପ କରିବାର ଉଦ୍ୟମ କରିଛନ୍ତି । ସେଥିଯୋଗୁ ସେ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି ।
