ମୁମ୍ବାଇ,୦୨/୧୧ :  ଷ୍ଟାର ଦମ୍ପତି ଦୀପିକା ପାଦୁକୋନ ଏବଂ ରଣଭୀର ସିଂ ଗତ ସେପ୍ଟେମ୍ବର ମାସରେ  ପିତାମାତା ହୋଇଥିଲେ । ସେପ୍ଟେମ୍ୱର ୮ରେ ଦୀପିକା ବେବି ଗାର୍ଲକୁ ଜନ୍ମ ଦେଇଥିଲେ । ଆଉ ବର୍ତ୍ତମାନ ଏହି ଦମ୍ପତି  ଦିୱାଲି ଅବସରରେ ଗତକାଲି ଝିଅର ପ୍ରଥମ ଝଲକ ଦେଖାଇଛନ୍ତି ଏବଂ ଝିଅର ନାଁ ର ମଧ୍ୟ ଖୁଲାସା କରିଛନ୍ତି । ଦୀପିକା ପାଦୁକୋନ ଏବଂ ରଣଭୀର ସିଂ ୩୧ ଅକ୍ଟୋବର ରେ ନିଜ ଝିଅ ସହ ପ୍ରଥମ ଦିୱାଲୀ ପାଳନ କରିଛନ୍ତି । ଏଥିସହ ଗତକାଲି ଅଭିନେତ୍ରୀ ତାଙ୍କ ଝିଅର ପ୍ରଥମ ଫଟୋ ନିଜ ଇନଷ୍ଟାଗ୍ରାମ ଆକାଉଣ୍ଟରେ ସେୟାର କରିଛନ୍ତି।  ଦମ୍ପତିଙ୍କ ବେବି ଗାର୍ଲ ଫଟୋରେ ପାରମ୍ପାରିକ ଲୁକରେ ନଜର ଆସିଛନ୍ତି । ଫଟୋକୁ ଦେଖିଲେ ଦେଢ ମାସର ଶିଶୁ କନ୍ୟା ଲାଲ୍ ସାଲୱାର୍ ସୁଟ୍ ପିନ୍ଧିଥିବାର ଜଣାପଡିଛି । ଫଟୋରେ ଦୀପିକା ତାଙ୍କ ଝିଅର ଚେହେରା ଦେଖାଇ ନାହାଁନ୍ତି କେବଳ ତାଙ୍କର ସୁନ୍ଦର ପାଦ ଦେଖିବାକୁ ମିଳିଛି । ଏଥିସହ ଦମ୍ପତି ତାଙ୍କ ଝିଅର ନାଁ  ଦୁଆ ପାଦୁକୋନ ସିଂ ରଖିଥିବା ନେଇ ମଧ୍ୟ ସୋସିଆଲ ମିଡିଆରେ ସେୟାର କରିଛନ୍ତି ।  

 ଏଥିସହ ସେ ଏହାର ଅର୍ଥ ମଧ୍ୟ ପ୍ରକାଶ କରିଛନ୍ତି । ଇନଷ୍ଟାଗ୍ରାମରେ ଫଟୋ ସେୟାର କରି ଦୀପିକା ଏବଂ ରଣଭୀର କ୍ୟାପସନରେ ଲେଖିଛନ୍ତି, 'ଦୁଆ ପାଦୁକୋନ ସିଂ । ‘ଦୁଆ’: ଯାହାର ଅର୍ଥ ହେଉଛି ପ୍ରାର୍ଥନା । ସେ ଆମର ପ୍ରାର୍ଥନାର ଉତ୍ତର । ଆମର ହୃଦୟ ପ୍ରେମ ଏବଂ କୃତଜ୍ଞତାରେ ପରିପୂର୍ଣ୍ଣ ।' ଏହି ଫଟୋ ସେୟାର ହେବା ମାତ୍ରେ ସେଲିବ୍ରିଟି ସମେତ ଫ୍ୟାନ୍ସ ଦମ୍ପତି ଶୁଭେଚ୍ଛା ଜଣାଇବା ସହ ବେବି ନାଁ ଶୁଣି ଖୁସିବ୍ୟକ୍ତ କରିଛନ୍ତି । ଆଲିଆ ଭଟ୍ଟ ଠାରୁ ଭୂମି ପେଡନକର ଯାଏଁ ସମସ୍ତ ତାରକା ଏବଂ ଫ୍ୟାନ୍ସ ଲାଲ ହାର୍ଟ ଇମୋଜି ଦେବା ସହ ପ୍ରଶଂସା କରିଛନ୍ତି । ପ୍ରକାଶ ଥାଉକି, ବିବାହର ୬ ବର୍ଷ ପରେ ପିତାମାତା ହୋଇଛନ୍ତି ଅଭିନେତ୍ରୀ ଦୀପିକା ପାଦୁକୋନ । ରଣଭୀର ଏବଂ ଦୀପିକା ମଧ୍ୟରେ ପ୍ରେମସମ୍ପର୍କ ୨୦୧୨ରେ ଆରମ୍ଭ ହୋଇଥିଲା । ଦୀର୍ଘ ବର୍ଷର ଡେଟିଂ ପରେ ଏହି ଦମ୍ପତି ନଭେମ୍ୱର  ୨୦୧୮ରେ ବିବାହ କରିଥିଲେ । ଉଭୟ ଚଳିତ ଫେବୃଆରୀରେ ପିତାମାତା ହେବା ଖୁସି ଖବର ଫ୍ୟାନ୍ସଙ୍କ ସହ ସେୟାର କରିଥିଲେ । ସେପ୍ଟେମ୍ୱରରେ କୁନି ଅତିଥି ଆସିବେ ବୋଲି ମଧ୍ୟ ଘୋଷଣା କରିଥିଲେ ।