କଳାହାଣ୍ଡି, ୧୭/୦୯ : ଲାଞ୍ଜିଗଡ଼ ବେଦାନ୍ତର ରେଡ୍ ମଡ୍ ପଣ୍ଡ ଭୁଶୁଡିବା ଯୋଗୁଁ ଅସୁବିଧା ଭୋଗୁଛନ୍ତି ଲାଞ୍ଜିଗଡ଼ ଅଞ୍ଚଳବାସୀ। ବଂଶଧାରା ନଦୀରେ ମାଛ ମଡ଼କ। ନଦୀରେ ଭାସୁଛନ୍ତି କୁଢ କୁଢ ମଲା ମାଛ। 

ସୂଚନା ଅନୁଯାୟୀ, ସୋମବାର ବିଳମ୍ଵିତ ରାତିରେ ଲାଞ୍ଜିଗଡ଼ରେ ଥିବା ବେଦାନ୍ତର ଏକ ରେଡ୍ ମଡ୍ ପଣ୍ଡର ୫୦ ଫୁଟର ଉଚ୍ଚ ପାଚେରୀ ଭୁଶୁଡ଼ି ପଡ଼ିଥିଲା। ଫଳରେ ଉକ୍ତ ପୋଖରୀରେ ଥିବା ୪ ଲକ୍ଷ କ୍ୟୁବିକ ଲିଟର ପାଣି ବହି ଯାଇ ରାସ୍ତା ଉପରେ ୩ ଫୁଟରୁ ଅଧିକ ଉଚ୍ଚର ପାଣି ଚାଲିଥିଲା। ଏହି କଷ୍ଟିକ ପାଣି ଛତ୍ରପୁର, ବାତେଲିମା, ଚମ୍ପାଦେଇପୁର ପାଇକ ରାଣିପିଣ୍ଡା ଅଞ୍ଚଳର ହଜାର ହଜାର ହେକ୍ଟର ହେକ୍ଟର ଜମିରେ ମାଡିଯିବାରୁ ଅନେକ ଚାଷ ନଷ୍ଟ ହେଇଯାଇଥିଲା। ଏହାପରେ ପାଣି ବଂଶଧାରା ନଦୀରେ ମିଶିଥିଲା। ଘଟଣାକୁ ୨୪ ଘଣ୍ଟା ନପୂରୁଣୁ ଆଜି ବଂଶଧାରା ନଦୀରେ କୁଢ କୁଢ ମଲା ମାଛ ଭାସୁଥିବା ଦେଖିବାକୁ ମିଳିଛି। ନଦୀ କୂଳିଆବାସୀ ଭୟଭୀତ ହୋଇଛନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଆତଙ୍କ ଖେଳି ଯାଇଛି।