ଜୟପୁର,୧୨/୧୨: ସମୟ ଗଡୁଥିଲା । ଏ ପଟେ ବାପା ମାଆ ବ୍ୟସ୍ତ ଚିନ୍ତିତ । ପୁଅ ସୁରକ୍ଷିତ ବାହାରିବ ବୋଲି ଭଗବାନଙ୍କୁ ନେହାରୁ ହେଉଥିଲେ । ରେସ୍କ୍ୟୁ ଟିମ୍ ଲାଗି ପଡିଥିଲେ । ହେଲେ ଭଗବାନଙ୍କର ନିୟମ କିଛି ଅଲଗା ଥିଲା । ୫୭ ଘଣ୍ଟାର ରେସ୍କ୍ୟୁ ଅପରେସନ ଫେଲ୍ । ଜୀବନ ଯୁଦ୍ଧରେ ହାରିଗଲା ୫ ବର୍ଷୀୟ ଆର୍ଯ୍ୟନ । ରାଜସ୍ଥାନର ଦୌସାରେ ୧୫୦ ଫୁଟ ଗଭୀର ବୋରୱେଲ୍ରେ ଫସିଥିବା ଆର୍ଯ୍ୟନକୁ ବଞ୍ଚାଇବା ଅଭିଯାନ ବିଫଳ ହୋଇଛି ।
ଡିସେମ୍ବର ୯ ତାରିଖ ଅପରାହ୍ନ ୪ଟାରେ ୧୫୦ ଫୁଟ ଖୋଲା ବୋରୱେଲରେ ଖସି ପଡିଥିଲା ଆର୍ଯ୍ୟନ । ୫୮ ଘଣ୍ଟା ହେବ ଆର୍ଯ୍ୟନକୁ ଉଦ୍ଧାର କାର୍ଯ୍ୟ ଚାଲିଥିଲା ମାତ୍ର ଏଥିରେ ସଫଳ ହୋଇନାହିଁ ଟିମ୍ । ୩ ଦିନ ଧରି ଚାଲିଥିଲା ଉଦ୍ଧାର କାର୍ଯ୍ୟ । ୫୮ ଘଣ୍ଟା ପରେ ଜୀବନ ହାରିଛି ୫ ବର୍ଷୀୟ ଆର୍ଯ୍ୟନ ।
ବୋରୱେଲରୁ ଆର୍ଯ୍ୟନ ବାହିରିଲା ସତ ହେଲେ ସେତେବେଳକୁ ସେ ଆଖି ବୁଜି ସାରିଥିଲା । ପୁଅକୁ ହରାଇ ସ୍ତବ୍ଧ ହୋଇଛନ୍ତି ବାପାମାଆ । ଆର୍ଯ୍ୟନ ଗାଁ କାଲିଖାଡରେ ଶୋକର ଛାୟା ଖେଳି ଯାଇଛି । ଆଜି ଆର୍ଯ୍ୟନ ମୃତଦେହକୁ ପୋଷ୍ଟମର୍ଟମ କରାଯାଇ ପରିବାରକୁ ହସ୍ତାନ୍ତର କରାଯିବ ।
ବୋରୱେଲରୁ ଆର୍ଯ୍ୟନକୁ ସୁରକ୍ଷିତ ଉଦ୍ଧାର ପାଇଁ ଏସଡିଆରଏଫ ଏବଂ ଏନଡିଆରଏଫର ଟିମ୍ ସମସ୍ତ ପ୍ରଚେଷ୍ଟା କରିଥିଲେ । ଫାଇଲିଙ୍ଗ ମେସିନ ଦ୍ବାରା ବୋରୱେଲଠୁ କିଛି ଦୂରରେ ଗାତ ଖୋଳିଥିଲେ । ଏନଡିଆରଏଫର ଟିମ୍ ପିପି କିଟ୍ ପିନ୍ଧି ୧୫୦ଫୁଟ ଗଭୀର ବୋରୱେଲରେ ପ୍ରବେଶ କରିଥିଲେ । ଗାତ ଖୋଳିବା ନେଇ ଉଦ୍ଧାରକାରୀ ଦଳକୁ ଅନେକ ସମସ୍ୟାର ସମ୍ମୁଖୀନ ହେବାକୁ ପଡିଥିଲା । ମାତ୍ର କାର୍ଯ୍ୟ ଜାରି ରଖିଥିଲେ ହେଲେ ଆର୍ଯ୍ୟନ ପାଖରେ ଉଦ୍ଧାରକାରୀ ଦଳ ପହଞ୍ଚିବା ମାତ୍ର ସବୁ କିଛି ଶେଷ ହୋଇଯାଇଥିଲା ।
