ଚାନ୍ଦବାଲି, ୨୮/୧୦: ପନି ପରିବା ଚାଷର ପେଣ୍ଠସ୍ଥଳୀ ହେଉଛି ଉଗ୍ରତାରା ଗାଁ । ଏହି ଗାଁରୁ ଦୈନିକ ବାହାରୁଥିବା ପରିବାକୁ ଅପେକ୍ଷା କରିଥାନ୍ତି ଲୋକେ l ଏହି ପରିବା ଉପରେ  ନିର୍ଭରଶୀଳ ହୋଇ ଥାଆନ୍ତି ଚାନ୍ଦବାଲି, ମତୋ, ରାଜକନିକା ଭଳି ବଜାରରେ ଥିବା ଶହ ଶହ ବିଭିନ୍ନ ପରିବା ଦୋକାନୀ । ଯେଉଁ ପରିବା ଉତ୍ପାଦିତ ହୋଇଥାଏ ସେହି ପରିବାକୁ ସିଧାସଳଖ ଗ୍ରାହକ ବଜାରରେ କିଣା ବିକା କରିଥାନ୍ତି । ଏବେ ଏହି ବାତ୍ୟା 'ଦାନା' ପ୍ରଭାବରେ ଖାଉଟି ମାନଙ୍କୁ ମହଙ୍ଗା ପଡ଼ିପାରେ।

ବାତ୍ୟା 'ଦାନା' ପ୍ରଭାବରେ ଚାଷ ଗଲା,ବାସ ବି ଗଲା ଆଉ ପରିବା ଚାଷୀଙ୍କ ଜୀବିକା ମଧ୍ୟ ଉଜୁଡି ଗଲା । ଏବେ ଏହାକୁ ନେଇ ଚିନ୍ତାରେ ପରିବା ଚାଷୀ । କିଏ ଦୁଇ ଏକର ଜମିରେ ତ କିଏ ତିନି ଏକର ବିଶିଷ୍ଟ ଜମିରେ ଟମାଟୋ, ବାଇଗଣ, କଲରା, ଝୁଡଙ୍ଗ, ସିମିଳା ଲଙ୍କା, ମୂଳା, ଭେଣ୍ଡି, ଧନିଆ ପତ୍ର ଆଦି ବିଭିନ୍ନ ପନିପରିବା ବ୍ୟତୀତ ଉଦ୍ୟାନ ବିଭାଗ ମାଧ୍ୟମରେ ଶଙ୍କର ଜାତୀୟ ପିଜୁଳି , ଡାଳିମ୍ବ, ଥାଇଲାଣ୍ଡ କୋଳି ଚାଷ କରିଥିଲେ। ଚାଷରେ ହଜାର ହଜାର ଟଙ୍କା ଖର୍ଚ୍ଚ କରି ପରିଶ୍ରମ କରିଥିଲେ l ଆଉ ମାତ୍ର ମାସେ କିମ୍ବା ଦୁଇ ମାସ ମଧ୍ୟରେ ଲକ୍ଷ ଲକ୍ଷ ଟଙ୍କା ରୋଜଗାର କରିଥାନ୍ତେ ।

କିନ୍ତୁ ବାତ୍ୟା 'ଦାନା' ପ୍ରଭାବରେ ପବନ ମାଡରେ ନଷ୍ଟ ହେବା ସହିତ ଲଗାଣ ବର୍ଷାର ପାଣିରେ ପଚି ସଢ଼ି ଯାଇଛି ସବୁ ପରିବା । ଅନେକ ଚାଷୀ ଜମିରେ ମଞ୍ଜି ମଧ୍ୟ ପୋତି ଥିଲେ। ଏବେ ବନ୍ୟା ଜଳରେ ବୁଡି ନଷ୍ଟ ହୋଇ ଯାଇଛି ଚାଷ । ୠଣ ଧାର କରଜ କରି ଯେଉଁ ପରିଶ୍ରମ କରିଥିଲେ,ସେ ସବୁ ବାତ୍ୟା 'ଦାନା' ପ୍ରଭାବରେ ନଷ୍ଟ ହୋଇ ଗଲା । ଏବେ କେବଳ ଗୋଟିଏ ଚିନ୍ତା, ଧାର କରଜ କରି ଥିବା ଟଙ୍କାକୁ ସୁଝିବେ କେମିତି? ଏହାକୁ ନେଇ ଏବେ ଚିନ୍ତାରେ ପରିବା ଚାଷୀ । ଯଦି ସରକାରୀ ସ୍ତରରେ କୋୖଣସି ସହାୟତା ବ୍ୟବସ୍ଥା କରନ୍ତେ, ତେବେ ଚାଷୀଙ୍କ ଜୀବନ ଜିବିକା ବଞ୍ଚି ଯାଇ ପାରନ୍ତା ବୋଲି ଚାଷୀ ଦାବି ରଖିଛନ୍ତି  l