ନୂଆଦିଲ୍ଲୀ, ୦୨/୦୭ : ଭାରତୀୟ କ୍ରିକେଟର ମହମ୍ମଦ ସାମିଙ୍କ ଛାଡ଼ପତ୍ର ମାମଲାରେ କୋଲକାତା ହାଇକୋର୍ଟଙ୍କ ବଡ଼ ରାୟ। ପତ୍ନୀ ଏବଂ ଝିଅକୁ ପ୍ରତି ମାସ ୪ ଲକ୍ଷ ଟଙ୍କା ଦେବେ ଭରଣପୋଷଣ। ଜଷ୍ଟିସ୍ ଅଜୟ କୁମାର ମୁଖାର୍ଜୀ ଏହି ରାୟ ଦେଇଛନ୍ତି। ହାଇକୋର୍ଟ କହିଛନ୍ତି ଯେ, ସାମିଙ୍କ ଠାରୁ ତାଙ୍କ ପତ୍ନୀ ହସିନ ଜହାଁ ଓ ଝିଅ ଅଲଗା ରହୁଛନ୍ତି। ସେମାନେ ଭରଣପୋଷଣ ପାଇବାକୁ ହକଦାର୍। ଏହାଦ୍ଵାରା ତାଙ୍କ ଝିଅର ଭବିଷ୍ୟତ ସୁଧାର ହୋଇପାରିବ। ତେଣୁ ସାମି ତାଙ୍କ ପତ୍ନୀଙ୍କୁ ପ୍ରତି ମାସ ଦେଢ ଲକ୍ଷ ଏବଂ ତାଙ୍କ ଝିଅକୁ ଅଢେଇ ଲକ୍ଷ ଟଙ୍କା ଭରଣପୋଷଣ ଦେବେ।
ଏହା ପୂର୍ବରୁ ତଳ ଅଦାଲତରେ ମହମ୍ମଦ ସାମି ଏବଂ ହସିନ ଜହାଁଙ୍କ ଛାଡ଼ପତ୍ର ମାମଲାର ଶୁଣାଣି କରିଥିଲେ। ୨୦୨୩ରେ କୋର୍ଟ ହସିନ ଜହାଁଙ୍କୁ ୫୦ ହଜାର ଟଙ୍କା ଏବଂ ଝିଅକୁ ୮୦ ହଜାର ଟଙ୍କା ଭରଣପୋଷଣ ଦେବାକୁ ସାମିଙ୍କୁ ନିର୍ଦ୍ଦେଶ ଦେଇଥିଲେ। ଏହି ରାୟ ବିରୋଧରେ ହସିନ ହାଇକୋର୍ଟରେ ଅପିଲ୍ କରିଥିଲେ। ହାଇକୋର୍ଟ ଜଜ୍ ଅଜୟ କୁମାର ମୁଖାର୍ଜୀ ଏହି ମାମଲାର ଶୁଣାଣି କରି ଏବେ ସାମି ୪ ଲକ୍ଷ ଟଙ୍କା ଭରଣପୋଷଣ ଦେବାକୁ ନିର୍ଦ୍ଦେଶ ଦେଇଛନ୍ତି।
ସୂଚନା ଥାଉକି, ୨୦୨୮ ମାର୍ଚ୍ଚ ମାସରେ ହସିନ ଜହାଁ ମହମ୍ମଦ ସାମିଙ୍କ ବିରୋଧରେ ଘରୋଇ ହିଂସା ଅଭିଯୋଗ ଆଣିଥିଲେ। ସାମି ବିରୋଧରେ ମ୍ୟାଚ୍ ଫିକ୍ସିଂ ଏବଂ ପରକୀୟା ପ୍ରୀତି ଅଭିଯୋଗ ମଧ୍ୟ ଆଣିଥିଲେ। ହେଲେ ଏଯାବତ୍ ଏହି ସମସ୍ତ ଅଭିଯୋଗ ସତ୍ୟ ପ୍ରମାଣିତ ହୋଇପାରି ନାହିଁ। ହସିନ ଜହାଁ ଏବେ ତାଙ୍କ ଝିଅ ସହ ଅଲଗା ରହୁଛନ୍ତି।
