ନବରଙ୍ଗପୁର, ୪/୭(ଆପ୍ର): ନବରଙ୍ଗପୁର ଜିଲ୍ଲା ମଙ୍ଗଳ ବିଭାଗର ଆଶ୍ରମ ବିଦ୍ୟାଳୟ ଗୁଡିକ ପାଇଁ ହାଣ୍ଡି, ଡେକ୍ଚୀ, ମଶାରୀ, ଆସବାବପତ୍ର ଓ ପିଲାଙ୍କ ୟୁନିଫର୍ମ କିଣାରେ ୪କୋଟି ଟଙ୍କାର ଦୁର୍ନିତୀ ହୋଇଛି। ଏହା କହିଛନ୍ତି, ବିଜେଡି ନେତା ପ୍ରଦୀପ ମାଝୀ। ଗ୍ଲେଜ୍ ହୋଟେଲରେ ଆୟୋଜିତ ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛନ୍ତି ଯେ, ମଙ୍ଗଳ ବିଭାଗରେ ଆଦିବାସୀ ପିଲାଙ୍କୁ ଉତ୍ତମ ଶିକ୍ଷାଦାନ ପାଇଁ ପୋଷାକ,ମଶାରୀ, ହାଣ୍ଡିଡେକ୍ଚୀ, ପିଲାଙ୍କ ଖାଇବା ଥାଳି, ପିଲା ଶୋଇବା ପାଇଁ ଗଦି, ବାୟୋମେଟ୍ରିକ୍ ଡିଭାଇସ୍ ପାଇଁ ରାଜ୍ୟସରକାର ୧୩କୋଟି ୩୭ଲକ୍ଷ ଟଙ୍କାର ମଞ୍ଜୁର କରିଥିଲେ। କିନ୍ତୁ ଦୁର୍ଭାଗ୍ୟ ଜିଲ୍ଲାର ୧୬୧ ଆଶ୍ରମ ବିଦ୍ୟାଳୟ ପାଇଁ କୋଟି କୋଟି ଟଙ୍କାର କିଣା ଯାଇଥିବା ସାମଗ୍ରୀ ପାଇଁ ଟେଣ୍ଡର ଡକାଯାଇନି ।
ସେଭଳି ଗୋଭର୍ଣମେଣ୍ଟ ଇ-ମାର୍କେଟ ପ୍ଲେସ୍ (ଜେମ୍) ପର୍ଟାଲରେ ମାଧ୍ୟମରେ ମଧ୍ୟ କିଣାଯାଇନି । ଜିଲ୍ଲାସ୍ତରୀୟ କ୍ରୟ କମିଟି କରି କେବଳ ଗୋଟିଏ ସଂସ୍ଥା ଓଡିଶା କଞ୍ଜୁମରର୍ସ କୋଓପୋରେଟିଭ ଫେଡରେସନ ଲିଂ (ଓସିସିଏଫ) ହାତକୁ ଟେକିଦିଆ ଯାଇଛି। ୨୨ କେଜିର ହାଣ୍ଡିର ବଜାର ଦାମ ୯ ହଜାର ୧୦୦ ଟଙ୍କା ରହିଥିବା ବେଳେ ସମାନ ଜିନିଷକୁ ୧୩ ହଜାର ୬୫୦ ଟଙ୍କାରେ କିଣାଯାଇଛି। ସେହିଭଳି ୮ କେଜି ହାଣ୍ଡି ୩ ହଜାର୨୦୦ ଟଙ୍କା ରହିଥିବା ବେଳେ ୧୧ହଜାର ଟଙ୍କାରେ କିଣାଯାଇଛି। ଦରୀର ବଜାର ମୁଲ୍ୟ ୩୫୦ ଟଙ୍କା ଥିବାବେଳେ ଏହାକୁ ୬୫୦ ଟଙ୍କାରେ କିଣାଯାଇଛି। ଲୁହା କଢେଇ ୨ହଜାର୪ଶହ ଟଙ୍କାକୁ ୩ହଜାର୮ଶହ ଟଙ୍କାରେ କିଣାଯାଇଛି ।
ସେଭଳି ପିଲାଙ୍କ ଖାଇବା ଥାଳିର ବଜାର ଦାମ ୧୮୦ ଟଙ୍କା ଥିବା ବେଳେ ୪୧୦ ଟଙ୍କାରେ କିଣାଯାଇଛି । ଏଭଳି ୨୮ ହଜାରଟି ଖାଇବା ଥାଳି କ୍ରୟ କରାଯାଇଛି । ସେଭଳି ୧୫୦ ଟଙ୍କିଆ ମଶାରୀକୁ ୨୦୦ ଟଙ୍କାରେ କିଣାଯାଇଛି । ଏଭଳି ବାୟୋମାଟ୍ରିକ ଡିଭାଇସ୍ ୮ ହଜାର ୩ ଶହ ଟଙ୍କାକୁ ୧୫ ହଜାର ୮ ଶହ ଟଙ୍କାରେ କିଣାଯାଇଛି । ଏଭଳି ୧୩ କୋଟି ୩୭ ଲକ୍ଷ ଟଙ୍କାରୁ ୯୮ ଲକ୍ଷ ଟଙ୍କାର କଂସା ବାସନ, ପିଲାଙ୍କ ଶୋଇବା ଗଦି ୧ କୋଟି ୨୫ ଲକ୍ଷ ଟଙ୍କା, ମଶାରୀ ପାଇଁ ୫୫ଲକ୍ଷ ଟଙ୍କା, ବାୟୋମାଟ୍ରିକ ଡିଭାଇସ୍ ପାଇଁ ୩ଲକ୍ଷ ୬୫ହଜାର ଟଙ୍କା, ପିଲାଙ୍କ ୟୁନିଫର୍ମ ଦୁଇ ହଳ ପାଇଁ ୧ ହଜାର ଟଙ୍କାକୁ ୫ଶହ ଟଙ୍କାରେ କିଣାଯାଇଛି । ଏଭଳି ନିମ୍ନମାନର ସାମଗ୍ରୀ କିଣି ୪କୋଟି ଟଙ୍କାର ବ୍ୟାପକ ଦୁର୍ନିତି କରାଯାଇଛି । ତାହା ପୁଣି ଅନୁସୂଚିତଜନଜାତି ଓ ପଛୁଆବର୍ଗ ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ନିଜ ଜିଲ୍ଲାରେ ।
ଏହା ପୂର୍ବରୁ ଗଣଶିକ୍ଷା ବିଭାଗରେ ୟୁନିଫର୍ମ ଦୁର୍ନିତି ତଦନ୍ତ ଭିଜିଲାନ୍ସ ବିଭାଗ କରୁଛି । ତେଣୁ ଏହି ଦୁର୍ନିତୀର ସଂପୃକ୍ତ ଅଧିକାରୀଙ୍କ ବିରୋଧରେ ତଦନ୍ତ କରି ଦୃଢକାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ଆଦିବାସୀ ପିଲାଙ୍କୁ ଉତ୍ତମମାନର ଆନୁଷଙ୍ଗିକ ସାମଗ୍ରୀ ପ୍ରଦାନ କରା ନ ଗଲେ ବିଜେଡି ଆଗାମୀ ଦିନରେ ଆନ୍ଦୋଳନକୁ ଓହ୍ଲାଇବ ବୋଲି ପ୍ରଦୀପ ମାଝୀ ରାଜ୍ୟ ସରକାରଙ୍କୁ ଚେତାବନୀ ଦେଇଛନ୍ତି। ସେଭଳି ବିଜେଡିର ଜିଲ୍ଲାସଭାପତି ତଥା ଡାବୁଗାଁ ବିଧାୟକ ମନୋହର ରନ୍ଧାରୀ ଆଦିବାସୀଙ୍କ ପିଲାଙ୍କୁ ଶୋଷଣ କରାଯାଉଛି ବୋଲି ଅଭିଯୋଗ ଆଣିଛନ୍ତି। ଆଦିବାସୀଙ୍କ ହକ୍ ଟଙ୍କାକୁ ବାଟମାରଣା କରାଯାଇଥିବା ବେଳେ ଖୋଦ୍ ମନ୍ତ୍ରୀଙ୍କ ଜିଲ୍ଲା ହୋଇଥିବାରୁ ମନ୍ତ୍ରୀଙ୍କ ଉପରେ ସନ୍ଦେହ ସୃଷ୍ଟି ହୋଇଛି ବୋଲି କହିଛନ୍ତି।
ଅନ୍ୟପଟେ ପୂର୍ବତନ ବିଧାୟକ ସଦାଶିବ ପ୍ରଧାନୀ ଏହି ଦୁର୍ନିତୀର ଭିଜିଲାନ୍ସ ଓ ସିବିଆଇ ତଦନ୍ତ କରିବାକୁ ଦାବି କରିଛନ୍ତି । ଏହି ସାମ୍ବାଦିକ ସମ୍ମଳନୀରେ ସରୋଜ ପାତ୍ର, ଲାଲୁ ତ୍ରିପାଠୀ, ପ୍ରମୋଦ ରଥ, ଭୀମ ହରିଜନ, ରାଜ୍ୟଛାର ସଂପାଦକ ସୁମିତ ପୂଜାରୀ, ଜଗା ବାଘେଲଙ୍କ ସମେତ ବିଜେଡିର ଅନ୍ୟନେତା ଓ କର୍ମୀ ଉପସ୍ଥିତ ଥିଲେ ।
