ଲକ୍ଷ୍ନୌ: ପହଲଗାମ ଆକ୍ରମଣକୁ ନେଇ ଭାରତବାସୀଙ୍କ ମନରେ ଆକ୍ରୋଶ । ସେହିଭଳି ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆତଙ୍କବାଦୀ ଆକ୍ରମଣକୁ ନେଇ ପାକିସ୍ତାନକୁ ଜୋରଦାର ଟାର୍ଗେଟ କରିଛନ୍ତି । ଉତ୍ତର ପ୍ରଦେଶର ଲଖିମପୁର ଖେରିରୁ ଗର୍ଜିଛନ୍ତି ଯୋଗୀ । ସେ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ବରେ ନୂଆ ଭାରତ କାହାକୁ ଚିଡ଼ାଏ ନାହିଁ । ଯଦି କେହି ଏଭଳି ପ୍ରୟାସ କରେ ତାକୁ ଛଡ଼ାଯିବ ନାହିଁ । ଏହା ସହ ପହଲଗାମରେ ଆତଙ୍କବାଦୀଙ୍କ ଗୁଳିରେ ପ୍ରାଣ ହରାଇଥିବା ପର୍ଯ୍ୟଟକଙ୍କ ପ୍ରତି ସମବେଦନା ଜଣାଇଛନ୍ତି ଯୋଗୀ ଆଦିତ୍ୟନାଥ ।
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ଯେ, ଏକ ସଭ୍ୟ ସମାଜରେ ଆତଙ୍କବାଦର କୌଣସି ସ୍ଥାନ ନାହିଁ । ଭାରତ ସରକାରଙ୍କ ସୁରକ୍ଷା, ସେବା ଏବଂ ସୁଶାସନର ମଡେଲ ବିକାଶ ଉପରେ ଆଧାରିତ। ଏହା ଗରିବଙ୍କ କଲ୍ୟାଣ ଏବଂ ସମସ୍ତଙ୍କ ସୁରକ୍ଷା ଉପରେ ଆଧାରିତ। କିନ୍ତୁ ଯଦି କେହି ସୁରକ୍ଷା ଉଲ୍ଲଂଘନ କରିବାକୁ ସାହସ କରେ, ତେବେ ଶୂନ୍ୟ ସହନଶୀଳତା ନୀତି ଅଧୀନରେ ଭାରତ ଉଚିତ ଜବାବ ଦେବାକୁ ପ୍ରସ୍ତୁତ। ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଏହି ନୂତନ ଭାରତ କାହାକୁ ଚିଡ଼ାଏ ନାହିଁ, କିନ୍ତୁ ଯଦି କେହି ଆମକୁ ଚିଡ଼ାଇବାକୁ ଚେଷ୍ଟା କରେ ତେବେ ତାକୁ ନିସ୍ତାର ମିଳିବ ନାହିଁ ।
ଲଖିମପୁର ଖେରିରେ ଆୟୋଜିତ ସଭାକୁ ସମ୍ବୋଧିତ କରିବା ଅବସରରେ ଯୋଗୀ ସମାଜବାଦୀ ପାର୍ଟି ଏବଂ କଂଗ୍ରେସକୁ ଟାର୍ଗେଟ କରିଛନ୍ତି । ମୁଖ୍ୟମନ୍ତ୍ରୀ ଯୋଗୀ କହିଛନ୍ତି ଯେ, ସମାଜବାଦୀ ପାର୍ଟି ହେଉ କି କଂଗ୍ରେସ, ସେମାନେ ଜାତି ନାମରେ ଲୋକଙ୍କୁ ବିଭାଜିତ କରୁଛନ୍ତି। ଏହି ଲୋକଙ୍କ ରାଜନୀତି ଏପରି ଯେ, ଗୋଟିଏ ପଟେ ସେମାନେ ଛତ୍ରପତି ମହାରାଜଙ୍କୁ ଅପମାନିତ କରନ୍ତି ଏବଂ ଅନ୍ୟପଟେ ସେମାନେ ନିଷ୍ଠୁର ଔରଙ୍ଗଜେବ ଏବଂ ବାବରଙ୍କୁ ସମ୍ମାନ ଦିଅନ୍ତି। ଔରଙ୍ଗଜେବଙ୍କ ବିଷୟରେ କୁହାଯାଏ ଯେ, ସେ ହିନ୍ଦୁମାନଙ୍କ ଉପରେ ଜିଜିଆ କର ଲାଗୁ କରୁଥିଲେ ଏବଂ ମନ୍ଦିରଗୁଡ଼ିକୁ ଧ୍ୱଂସ କରୁଥିଲେ। ସମାଜବାଦୀ ପାର୍ଟି ରାଣା ସାଙ୍ଗାଙ୍କ ଭଳି ଜଣେ ଯୋଦ୍ଧାଙ୍କୁ ଅପମାନିତ କରେ ଏବଂ ବାବରଙ୍କ ମହିମାମଣ୍ଡନ କରେ ।
