ଝାରସୁଗୁଡ଼ା, ୧୦/୧ : ବିଶାଲ ଦାସ ଓ ଅନ୍ୟ ୧୪ଜଣ ସହଯୋଗୀଙ୍କୁ ଛାଡିଲା ଛତିଶଗଡ଼ ପୋଲିସ। ବିଶାଲଙ୍କ ସହ ସହଯୋଗୀଙ୍କ ନାଁରେ ସରେଇପାଲି ପୋଲିସ କରିଥିଲା ମାମଲା। ବ୍ୟକ୍ତିଗତ ମୁଚାଲିକାରେ ଛାଡିଲା ପୋଲିସ। ବିଶାଲ ଓ ଅନ୍ୟ ସହଯୋଗୀଙ୍କୁ ଛାଡିବାକୁ ବିରୋଧୀ ଦଳ ନେତା ନବୀନ ପଟ୍ଟନାୟକ ଛତିଶଗଡ଼ ମୁଖ୍ୟମନ୍ତ୍ରୀଙ୍କୁ ଲେଖିଥିଲେ ଚିଠି। 

ପ୍ରକାଶ ଯେ, ବିଶାଲ ଏବଂ ଅନ୍ୟ ସହଯୋଗୀଙ୍କ ନାଁରେ ଛତିଶଗଡ଼ ସରାଇପାଲି ଥାନାରେ ରୁଜୁ ହୋଇଥିଲା ମାମଲା । ଭାରତୀୟ ନ୍ୟାୟ ସଂହିତାର ଧାରା ୩୩୧(୪) ଏବଂ ୧୯୧(୨) ଅନୁଯାୟୀ ମାମଲା ରୁଜୁ ହୋଇଥିଲା l ଝାରସୁଗୁଡ଼ା ଜିଲ୍ଲା କିର୍ମିରା ବ୍ଲକ ଅଧ୍ୟକ୍ଷାଙ୍କ ବିରୋଧରେ ଅନାସ୍ଥା ଭୋଟ୍ ପୂର୍ବରୁ ଛାତିଶଗଡ଼ ସରେଇପାଲି ଥାନାରେ ଅଟକ ହୋଇଥିଲେ ପିଆରଆଇ ମେମ୍ବର l ଗୁରୁବାର ରାତି ୧୧ଟାରୁ ୧୨ ଜଣ ପିଆରଆଇ ମେମ୍ବର ଅଟକ ଥିବାବେଳେ ସେମାନଙ୍କ ଠାରୁ ସୂଚନାପାଇ ଝାରସୁଗୁଡା ପୂର୍ବତନ ବିଧାୟିକା ଦୀପାଳି ଦାସଙ୍କ ଭାଇ ବିଶାଲ ଦାସ ପିଆରଆଇ ମେମ୍ବରମାନଙ୍କୁ ଆଣିବା ପାଇଁ ଛତିଶଗଡ଼ ଯାଇଥିଲେ l 

ତେବେ ରାତି ୨ଟାରେ ବିଶାଲ ସେଠାରେ ପହଞ୍ଚିବା ପରେ ପୋଲିସ ପିଆରଆଇ ମେମ୍ବରଙ୍କ ସହ ବିଶାଳ ଦାସଙ୍କୁ ମଧ୍ୟ ଅଟକ କରିଥିବା ଦୀପାଳି ଅଭିଯୋଗ କରିଛନ୍ତି l ଏହି ଘଟଣାକୁ ନେଇ ଦୀପାଳି ଦାସ ଏକ ସାମ୍ବାଦିକ ସମ୍ମିଳନୀ କରିବା ସହ ଜିଲ୍ଲା ପ୍ରଶାସନକୁ ଏକ ଦାବିପତ୍ର ଦେଇଛନ୍ତି l ସେ କହିଛନ୍ତି ଗୁରୁବାର ରାତିରୁ ଭାଇ ବିଶାଳ ଦାସଙ୍କ ସହ କିର୍ମିରା ବ୍ଲକର ସରପଞ୍ଚ ସମିତି ମେମ୍ବର ମାନଙ୍କୁ ଛତିଶଗଡ଼ର ପୋଲିସ ଷ୍ଟେସନରେ ଅଟକ କରାଯାଇଥିଲା l ଓଡ଼ିଶା ପୋଲିସ ଛତିଶଗଡ଼ ଯାଇ ସେଠାକାର ପୋଲିସ ସହାୟତାରେ କୌଣସି ସର୍ଚ୍ଚ ୱାରେଣ୍ଟ ବିନା ପିଆରଆଇ ମେମ୍ବରଙ୍କୁ ଅଟକ ରଖିଥିଲେ l