ଲକ୍ଷ୍ନୌ,୧୦/୦୬: ରାତି ପ୍ରାୟ ୧ଟା । ଗୁଗୁଲ୍ ମ୍ୟାପ ବାଟ ବତାଉଥିଲା । ସ୍ପିଡ୍ ବଢୁଥିଲା ଗାଡି ଆଗକୁ ଆଗକୁ ଗଡୁଥିଲା । ଅଚାନକ ଘଟିଲା ଦୁର୍ଘଟଣା । ଅଧୁରା ହୋଇ ରହିଥିବା ଫ୍ଲାଏଓଭରରେ ଝୁଲିକି ରହିଲା କାର । ଉତ୍ତରପ୍ରଦେଶ ଗୋରଖପୁର ମହାରାଜାଗଞ୍ଜରେ ଏହି ଦୁର୍ଘଟଣା ଘଟିଛି । ସୌଭାଗ୍ୟବସତଃ ଯାତ୍ରୀ ସୁରକ୍ଷିତ ଅଛନ୍ତି । ନେପାଳରୁ ଆସୁଥିବା ଯାତ୍ରୀ ଅଳ୍ପକେ ମୃତ୍ୟୁମୁଖରୁ ବଞ୍ଚିଯାଇଛନ୍ତି । ଗୁଗୁଲ ମ୍ୟାପ୍ ଭୁଲ୍ ବାଟ ବତାଇବାରୁ ଏହି ଦୁର୍ଘଟଣା ଘଟିଛି ।
ଡିଜିଟାଲ ଆପ୍ ଗୁଗୁଲ ସାହାଯ୍ୟରେ ଗୋରଖପୁର-ସେନାଉଲି ଜାତୀୟ ରାଜପଥରେ ରାତି ପ୍ରାୟ ୧ଟା ଏକ କାର ଯାଉଥିଲା । ମ୍ୟାପ୍ ଦେଖାଉଥିବା ବାଟ ହିସାବରେ ଗାଡ଼ି ଆଗକୁ ଗଡୁଥିଲା । ଏକ ନିର୍ମାଣଧୀନ ଫ୍ଲାଏଓଭରରେ କାର୍ ଚାଲୁଥିଲା । ଆଗକୁ ଆଗକୁ କାରଟି ଯିବା ସମୟରେ ହଠାତ୍ ରାସ୍ତା ସରିଥିଲା ଗାଡି ଝୁଲିକି ରହିଥିଲା । କାରଣ ସେଠାରେ କୌଣସି ସୂଚନା ଫଳକ ନଥିଲା । ଫଳରେ ଦୁର୍ଘଟଣା ଘଟିଲା ।
ପ୍ରତ୍ୟକ୍ଷଦର୍ଶୀଙ୍କ ଅନୁସାରେ,ଦୁର୍ଘଟଣା ରାତି ପ୍ରାୟ ୧ଟାରେ ହୋଇଛି । କାରଟି ଗୋରଖପୁର ଯିବା ବାଟରେ ଅନ୍ଧାରରେ ନିର୍ମାଣଧୀନ ଫ୍ଲାଏଓଭରରେ ଫସି ଯାଇଥିଲା । ଗୁଗୁଲ ମ୍ୟାପ୍ ଅନୁସାରେ ରାସ୍ତା ଦେଖୁଥିଲେ । ଆଗକୁ ଫ୍ଲାଏଓଭର ଥିବା ନେଇ ମ୍ୟାପ୍ କୌଣସି ସୂଚନା ଦେଇନଥିଲା । କାର୍ଟି ଫ୍ଲାଏଓଭର ଶେଷରେ ପହଞ୍ଚିବା ପରେ ଚାଳକ ଜଣକ ଠିକ୍ ସମୟରେ ବ୍ରେକ୍ ମାରିଥିଲେ ଫଳରେ କାର୍ ବ୍ରିଜରୁ ତଳକୁ ଖସିନଥିଲା ଝୁଲିକି ରହିଥିଲା ।
ଘଟଣାର ଖବର ପାଇଁ ଫରେନ୍ଦା ପୋଲିସ ଘଟଣାସ୍ଥଳରେ ପହଞ୍ଚିଥିଲା । ଲକ୍ଷ୍ନୌ ପଞ୍ଜୀକୃତ କାରର ମାଲିକ ହେଉଛନ୍ତି ରାମଗଡ ଗୋରଖପୁରର ହାରିସ୍ ସିଦ୍ଦିକ । ଦୁର୍ଘଟଣାକୁ ନେଇ ଫରେନ୍ଦା ଥାନା ଅଧିକାରୀ ପ୍ରଶାନ୍ତ ପାଠକ କହିଛନ୍ତି, ଆମେ ଘଟଣାସ୍ଥଳରେ ପହଞ୍ଚିବା ପରେ କାର୍ରେ କେହି ନଥିଲେ । ଆମେ ଆସିବା ପୂର୍ବରୁ ତାଙ୍କୁ ଉଦ୍ଧାର କରାଯାଇଥିଲା ।'' ଏହି ଘଟଣା ଅନେକ ପ୍ରଶ୍ନ ଛିଡା କରିଛି । ଫ୍ଲାଏଓଭର କାମ ଚାଲିଥିବା ବେଳେ କାହିଁକି କୌଣସି ସୂଚନାଫଳକ ନଥିଲା । ମାତ୍ର ଗୁଗୁଲ ମ୍ୟାପ୍ କିନ୍ତୁ ରୁଟ୍ ଦେଖାଉଥିଲା । ଯାହା ଫଳରେ କାର୍ ଚାଳକ ଆଗକୁ ଆଗକୁ ବଢିଥିଲେ ।
