କାସାରଗୋଡ଼: କେରଳର କାସାରଗୋଡ଼ ଜିଲ୍ଲାରେ ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି। ୟେଉଁଠି ୫୦ ବର୍ଷ ପୂର୍ବରୁ ଚତୁର୍ଥ ଶ୍ରେଣୀରେ ହୋଇଥିବା ଏକ ଝଗଡ଼ାର ପ୍ରତିଶୋଧ ନେବାକୁ ଯାଇ ଦୁଇ ବ୍ୟକ୍ତି ସେମାନଙ୍କର ପୂର୍ବତନ ସହପାଠୀ ୬୨ ବର୍ଷୀୟ ଭି.ଜେ. ବାବୁଙ୍କୁ ଆକ୍ରମଣ କରିଛନ୍ତି। ପୋଲିସ ଏହି ଘଟଣାରେ ଦୁଇ ଅଭିଯୁକ୍ତ, ମାଲୋଥୁ ବାଲକ୍ରିଷ୍ଣନ ଓ ମାଥ୍ୟୁ ଭାଲିୟାପ୍ଲାକ୍କଲଙ୍କୁ ଗିରଫ କରିଛି।
ଘଟଣାଟି କାସାରଗୋଡ଼ ଜିଲ୍ଲାର ମାଲୋମ ସହରରେ ସୋମବାର ଦିନ ମଧ୍ୟାହ୍ନ ପ୍ରାୟ ୧ଟା ସମୟରେ ଘଟିଥିଲା। ଅଭିଯୁକ୍ତ ଦ୍ୱୟ ଭି.ଜେ. ବାବୁଙ୍କୁ ଜାନାରଙ୍ଗମ ହୋଟେଲ ନିକଟରେ ପଥର ଦ୍ୱାରା ଆକ୍ରମଣ କରିଥିଲେ। ଯାହାଫଳରେ ବାବୁଙ୍କର ଦୁଇଟି ଦାନ୍ତ ଭାଙ୍ଗି ଯାଇଥିଲା ଏବଂ ତାଙ୍କୁ କନ୍ନୁରର ପାରିୟାରମ ସ୍ଥିତ ସରକାରୀ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଥିଲା। କାରଣ ଜାଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ।
ସୂଚନା ମୁତାବକ, ଏହି ତିନି ଜଣ ପ୍ରାୟ ୫୨ ବର୍ଷ ପୂର୍ବେ ମାଲୋମର ନାଟାକ୍କାଲୁ ଏଡେଡ୍ ଉଚ୍ଚ ପ୍ରାଥମିକ ବିଦ୍ୟାଳୟରେ ଚତୁର୍ଥ ଶ୍ରେଣୀରେ ଏକାଠି ପଢ଼ୁଥିଲେ। ତେବେ ସେ ସମୟରେ କୈଣସି କାରଣକୁ ନେଇ ବାବୁ ବାଲକ୍ରିଷ୍ଣନଙ୍କୁ ସହ ଗଣ୍ଡଗୋଳ କରି ମାଡ ମାରିଥିଲେ। ତେବେ ଏହି ଘଟଣାର ୫ ଦଶନ୍ଧି ପରେ ସ୍କୁଲରେ ଏକ ବନ୍ଧୁମିଳନର ଆୟୋଜନ କରାଯାଇଥିଲା। ଏହି ବିନ୍ଧୁମିଳନ ଉତ୍ସବରେ ଯୋଗ ଦେବା ପୂର୍ବରୁ ବାଲକ୍ରିଷ୍ଣନ, ବାବୁଙ୍କୁ ଏନେଇ ପ୍ରଶ୍ନ ମଧ୍ୟ କରିଥିଲେ। ତେବେ ବାବୁ ଏହି ଘଟଣାକୁ ଏତେ ଗମ୍ଭୀରତାର ସହ ନେଇ ନଥିଲେ। ତେବେ ବନ୍ଧୁମିଳନ ଉତ୍ସବରେ ବାବୁ ପହଞ୍ଚିବା ପରେ ବାଲକ୍ରିଷ୍ଣନ ଓ ତାଙ୍କ ସହଯୋଗି ମାଥ୍ୟୁ ତାଙ୍କୁ ଏନେଇ ପ୍ରଶ୍ନ କରିବା ସହ ଉଦ୍ଦେଶ୍ୟ ମୂଳକ ଭାବେ ତାଙ୍କ ଉପରେ ଆକ୍ରମଣ କରିଥିଲେ।
ଭେଲାରିକୁଣ୍ଡୁ ପୋଲିସ ଇନ୍ସପେକ୍ଟର ଟି.କେ. ମୁକୁନ୍ଦନଙ୍କ ଅନୁଯାୟୀ, ଅଭିଯୁକ୍ତଙ୍କ ବିରୁଦ୍ଧରେ ଭାରତୀୟ ନ୍ୟାୟ ସଂହିତା (ବିଏନଏସ)ର ଧାରା ୧୨୬(୨) (ଅନ୍ୟାୟରୂପେ ବାଧା ସୃଷ୍ଟି), ୧୧୮(୧) (ସ୍ୱେଚ୍ଛାକୃତ ଭାବେ ଆଘାତ) ଏବଂ ୩(୫) (ସାଧାରଣ ଉଦ୍ଦେଶ୍ୟ) ଅନୁଯାୟୀ ମାମଲା ରୁଜୁ ହୋଇଛି। ଯଦି ଡାକ୍ତରୀ ରିପୋର୍ଟରେ ଦାନ୍ତ ଭାଙ୍ଗିବା ଘଟଣା ସହ ଜଡ଼ିତ ଥିବା ସ୍ଥିର ହୁଏ, ତେବେ ଏହା ଏକ ଜାମିନ ଅଯୋଗ୍ୟ ଅପରାଧ ଭାବେ ପରିଗଣିତ ହେବ ବୋଲି ସୂଚନା ଦେଇଛନ୍ତି।
ଏହି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। କାରଣ ଏକ ଦଶନ୍ଧି ପୁରୁଣା ବିବାଦ ଏଭଳି ହିଂସାତ୍ମକ ରୂପ ନେବ ବୋଲି କେହି ଆଶା କରିନଥିଲେ। ପୋଲିସ ଏହି ମାମଲାରେ ତଦନ୍ତ ଜାରି ରଖିଛି।
