ଫୁଲବାଣୀ,୮/୧: ସ୍ଥାନୀୟ ଗାନ୍ଧୀ ଛକ ଠାରେ ନିଜ ବସ୍ ଆଗରେ ଠିଆ ହୋଇଥିଲେ। ଏହି ସମୟରେ ଏକ ପିକ ଅପ ଭ୍ୟାନ ଦ୍ରୁତ ଗତିରେ ଆସି ଧକ୍କା ଦେବା ଫଳରେ ଜଣେ ଘରୋଇ ବସ ମାଲିକଙ୍କ ମୃତ୍ୟୁ ହୋଇଛି। ମୃତକ ଜଣକ ହେଲେ ତ୍ରିଲୋଚନ ପ୍ରଧାନ ।
ବୁଧବାର ସକାଳେ ସୁନା ପ୍ରତିମା ନାମକ ଯାତ୍ରୀବାହୀ ବସ୍ ଘରୋଇ ବସ୍ ଷ୍ଟାଣ୍ଡରୁ ବାହାରି ଗାନ୍ଧୀ ଛକ ନିକଟରେ ଯାତ୍ରୀ ଅପେକ୍ଷାରେ ଠିଆ ହୋଇଥିଲା। ବସ୍ ମାଲିକ ତ୍ରିଲୋଚନ ପ୍ରଧାନ ନିକଟରେ ଠିଆ ହୋଇ କର୍ମଚାରୀଙ୍କ ସହ କଥାବାର୍ତ୍ତା କରୁଥିଲେ । ସେହି ସମୟରେ ମାଦିକୁନ୍ଦା ଛକ ପଟରୁ ଏକ ପିକ୍ଅପ୍ ଭ୍ୟାନ୍ ଦ୍ରୁତ ଗତିରେ ଆସି ପ୍ରଥମେ ବସର ଆଗ ପଟକୁ ଧକ୍କା ଦେବା ପରେ ବସ୍ ନିକଟରେ ଠିଆ ହୋଇଥିବା ତ୍ରିଲୋଚନଙ୍କୁ ଧକ୍କା ଦେଇଥିଲା । ପରେ ଭାରସାମ୍ୟ ହରାଇ ନିକଟସ୍ଥ ଏକ ପାଚେରୀରେ ପିଟି ହୋଇଥିଲା । ତ୍ରିଲୋଚନଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ଲୋକେ ଫୁଲବାଣୀ ଜିଲ୍ଲା ଚିକିତ୍ସାଳୟରେ ଭର୍ତ୍ତି କରାଇଥିଲେ । ସେଠାରେ ଚିକିତ୍ସିତ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ଦୁର୍ଘଟଣା ଘଟାଇ ପିକଅପ୍ ଭ୍ୟାନ୍ ଡ୍ରାଇଭର ଘଟଣାସ୍ଥଳରୁ ଫେରାର୍ ହୋଇଯାଇଥିବା ବେଳେ ଘଟଣାର ତଦନ୍ତ ଆରମ୍ଭ କରିଛି ଫୁଲବାଣୀ ଟାଉନ୍ ଥାନା ପୁଲିସ୍ ।
