ସମ୍ୱଲପୁର,୧୦/୧୦: ପୋଲିସକୁ ଆକ୍ରମଣ କରି ହାତ ପାପୁଲି ଛିଣ୍ଡାଇଥିବା ଅଭିଯୁକ୍ତକୁ ଆକଟାପାଲି ଜଙ୍ଗଲରେ ଏନକାଉଣ୍ଟର କରିଛି ବୁର୍ଲା ପୋଲିସ । ଅଭିଯୁକ୍ତର ପାଲଟା ଟାଙ୍ଗିଆ ଆକ୍ରମଣରେ ବୁର୍ଲା ଏସଆଇ ଦେବାଶିଷ ଖିଲାର ଆହତ ହୋଇଛନ୍ତି । ସମ୍ୱଲପୁର ଜିଲ୍ଲା ଆକଟାପାଲି ଜଙ୍ଗଲରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ପୋଲିସକୁ ଆକ୍ରମଣ କରି ହାତ ପାପୁଲି ଛିଣ୍ଡାଇଥିବା ଅଭିଯୁକ୍ତ କମଲ ପ୍ରଧାନକୁ ଗୁରୁବାର ଏନକାଉଣ୍ଟର କରାଯାଇଥିଲା । ତେବେ ଏହି ଏନକାଉଣ୍ଟର କରିବା ସମୟରେ ଅଭିଯୁକ୍ତର ପାଲଟା ଟାଙ୍ଗିଆ ଆକ୍ରମଣରେ ବୁର୍ଲା ଏସଆଇ ଦେବାଶିଷ ଖିଲାର ଆହତ ହୋଇଥିଲେ । ଏହି ଏନକାଉଣ୍ଟରରେ ଅଭିଯୁକ୍ତର ଶରୀରରେ ଏକ ଗୋଟିଏ ଗୁଳି ବାଜିଥିବା ଜଣାପଡ଼ିଛି । ଗୁରୁତର ଅବସ୍ଥାରେ ତାକୁ ବୁର୍ଲା ମେଡିକାଲ ସ୍ଥାନାନ୍ତର କରାଯାଇଛି । 

ବୁର୍ଲା ଥାନା ଝରାପାଲିରେ ସ୍ବାମୀ-ସ୍ତ୍ରୀ ଝଗଡା ସମାଧାନ କରିବାକୁ ଯାଇ ଆକ୍ରମଣର ଶିକାର ହୋଇଥିଲେ କନଷ୍ଚେବଲ ସରୋଜ ଭୋଇ । ଏହି ଆକ୍ରମଣରେ କନଷ୍ଚେବଲଙ୍କ ଡାହାଣ ହାତ ପାପୁଲିର ୩ଟି ଆଙ୍ଗୁଠିରେ ଆଘାତ ଲାଗିଥିଲା । ଏଭଳି ଘଟଣା ଘଟାଇ ଅଭିଯୁକ୍ତ କମଲ ପ୍ରଧାନ ଫେରାର ହୋଇଥିଲା । ଅଭିଯୁକ୍ତକୁ ଖୋଜୁଥିଲା ପୋଲିସ । ତେବେ ଗୁରୁବାର ଉକ୍ତ ଅଭିଯୁକ୍ତ ଧରାପଡ଼ିଥିଲା । ପୋଲିସକୁ ଦେଖି ସେ ଆକ୍ରକମଣ କରିଥିଲା । ତେଣୁ କମଲ ପ୍ରଧାନକୁ ଏନକାଉଣ୍ଟର କରାଯାଇଥିଲା ।