ବାଲିପାଟଣା, ୧୫/୧୦ : ଦଶହରାରେ ମାମୁଁଘର ବୁଲିବାକୁ ଆସି ପୋଖରୀରେ ବୁଡ଼ିଗଲେ ଭାଇ-ଭଉଣୀ। ବାଲିଅନ୍ତା ଥାନା ସୁବାଳୋ ଗ୍ରାମରେ ଏଭଳି ଏକ ଦୁଃଖଦ ଘଟଣା ଘଟିଛି। ମୃତକ ହେଉଛନ୍ତି କୋରଡକଣ୍ଟା ଗ୍ରାମର ମଣ୍ଡେଇ ଜେନା (୧୪ ବର୍ଷ) ଏବଂ ବାପୁନ ଜେନା (୮ ବର୍ଷ)।
ସୂଚନାନୁଯାୟୀ, କୋରଡକଣ୍ଟା ଗ୍ରାମର ମଣ୍ଡେଇ ଜେନା ଏବଂ ବାପୁନ ଜେନା ଦଶହରା ଛୁଟିରେ ବାଲିଅନ୍ତା ଥାନା ସୁବାଳୋ ଗ୍ରାମରେ ଥିବା ମାମୁଁଘରକୁ ବୁଲିବାକୁ ଆସିଥିଲେ। ମଙ୍ଗଳବାର ଭାଇ-ଭଉଣୀ ଖେଳୁଥିବା ବେଳେ ବାପୁନ୍ ଜେନା ପୋଖରୀରେ ବୁଡ଼ି ଯାଇଥିଲେ। ଭାଇକୁ ରକ୍ଷା କରିବାକୁ ଯାଇ ଭଉଣୀ ପୋଖରୀକୁ ଡେଇଁ ପଡ଼ିଥିଲେ। ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି କ୍ୟାପିଟାଲ୍ ହସ୍ପିଟାଲ୍ ପଠାଇଥିଲେ। ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
