ନୂଆଦିଲ୍ଲୀ: ଦେଶର ସବୁଠୁ ବଡ଼ ବୈଦୁତିକ ଉପକରଣ ନିର୍ମାତା ବିପିଏଲ ଗ୍ରୁପ୍ର ପ୍ରତିଷ୍ଠାତା ଟି.ପି. ଗୋପାଳନ ନାମ୍ବିୟାରଙ୍କ ପରଲୋକ । ଏନେଇ ନାମ୍ବିୟାରଙ୍କ ପରିବାର ଲୋକେ ସୂଚନା ଦେଇଛନ୍ତି। ପରିବାର ଅନୁସାରେ, ଗତ କିଛି ଦିନ ହେଲା ରୋଗରେ ପଡ଼ିଥିବା ନାମ୍ବିୟାରଙ୍କ ୯୪ ବର୍ଷ ବୟସରେ ନିଧନ ହୋଇଛି । ତେବେ କେରଳ ଏବଂ କର୍ଣ୍ଣାଟକ ଉଭୟ ରାଜ୍ୟ ସହ ଟି.ପି. ଗୋପାଳନ ନାମ୍ବିୟାରଙ୍କ ସଂପର୍କ ଖୁବ ନିବିଡ଼ ଥିଲା ।
ଗୋପାଳନ ନାମ୍ବିୟାରଙ୍କ ନିଧନକୁ ନେଇ କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ବିଏସ୍ ୟେଦିୟୁରପ୍ପା ଶୋକ ପ୍ରକାଶ କରିଛନ୍ତି । ସେ ଏକ୍ସରେ ଲେଖିଛନ୍ତି, ‘ବିପିଏଲ ଗ୍ରୁପ୍ର ପ୍ରତିଷ୍ଠାତା ଗୋପାଳନ ନାମ୍ବିୟାରଙ୍କ ନିଧନ ଖବର ଶୁଣି ମୁଁ ମର୍ମାହତ । ତାଙ୍କର ଯୋଗଦାନ ସର୍ବଦା ମନେ ରହିବ । ତାଙ୍କ ପରିବାର ପ୍ରତି ସମବେଦନା ଜଣାଉଛି ।’ ସୂଚନାଯୋଗ୍ୟ ଯେ, ପୂର୍ବତନ କେନ୍ଦ୍ରମନ୍ତ୍ରୀ ଏବଂ ବିଜେପି ନେତା ରାଜୀବ ଚନ୍ଦ୍ରଶେଖର, ଗୋପାଳନ ନାମ୍ବିୟାରଙ୍କ ଜ୍ବାଇଁ ।
Shri TPG Nambiar Ji was a pioneering innovator and industrialist, who was a strong votary of making India economically strong. Pained by his passing away. Condolences to his family and admirers.
— Narendra Modi (@narendramodi) October 31, 2024
ରାଜୀବ ଚନ୍ଦ୍ରଶେଖର ନିଜ ଶ୍ବଶୁରଙ୍କ ମୃତ୍ୟୁରେ ଶୋକ ପ୍ରକାଶ କରିଛନ୍ତି । ଗୋପାଳନ ନାମ୍ବିୟାର ଭାରତର ସବୁଠୁ ଭରସାଯୋଗ୍ୟ କମ୍ପାନି ମଧ୍ୟରୁ ଗୋଟିଏ ଆରମ୍ଭ କରିଛନ୍ତି । ଯାହା ଆଜି ମଧ୍ୟ ଲୋକପ୍ରିୟ । ସେ ଦୂରଦର୍ଶୀ ବ୍ୟକ୍ତି ଥିଲେ ବୋଲି ଚନ୍ଦ୍ରଶେଖର କହିଛନ୍ତି । କଂଗ୍ରସେ ନେତା ଶଶି ଥରୁର ମଧ୍ୟ ଗୋପାଳନ ନାମ୍ବିୟାରଙ୍କ ନିଧନରେ ଶୋକ ବ୍ୟକ୍ତ କରିଛନ୍ତି । ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୋକ ପ୍ରକାଶ କରିବା ଗୋପାଳନ ନାମ୍ବିୟାରଙ୍କ ଭାରତର ବିକାଶ କ୍ଷେତ୍ରରେ ଯୋଗଦାନକୁ ମନେ ପକାଇଛନ୍ତି ।
