ମୟୁରଭଞ୍ଜ, ୨୭।୧୦: ଉଦ୍ଧାର ହେଲା ନିଖୋp ବୃଦ୍ଧଙ୍କ ମୃତଦେହ । ଶନିବାର ସନ୍ଧ୍ୟାରେ ବନ୍ୟା ଜଳରେ ଭାସି ନିଖୋଜ ଥିବା ବୃଦ୍ଧଙ୍କ ମୃତଦେହ ଅଧ କିଲୋମିଟର ଦୂରରୁ ରବିବାର ସକାଳୁ ଉଦ୍ଧାର ହୋଇଛି । ସୂଚନାନୁସାରେ, ବିଶୋଇ ଥାନା ଅନ୍ତର୍ଗତ ବାଘ ଛତର ଗ୍ରାମପଞ୍ଚାୟତ ଲୋଧାତଲକ ଗ୍ରାମର ୬୧ ବର୍ଷୀୟ ଶ୍ରୀରାମ ନାଏକ ପରିବାର ଓ ଗାଁ ଲୋକ ସହିତ ଶନିବାର ସାପ୍ତାହିକ ହାଟ ବିଶୋଇକୁ ଯାଇଥିଲେ । ଶନିବାର ସନ୍ଧ୍ୟାରେ ଘରକୁ ଫେରୁଥିବା ବେଳେ ଗାଁ ସନିକଟ କେନ୍ଦୁମରା ନାଳରେ ହଠାତ୍ ଶିମିଳିପାଳ ଜାତୀୟ ଉଦ୍ୟାନ ମଧ୍ୟରୁ ବନ୍ୟାଜଳ ଆସି ଯାଇଥିଲା । ଫଳରେ ନାଳ ମଝିରେ ଥିବା ଶ୍ରୀରାମ ଭାରସାମ୍ୟ ହରାଇ ପାଣିରେ ଭାସି ଯାଇଥିଲା । 

ଖବର ପାଇ ଘଟଣାସ୍ଥଳରେ ପୋଲିସ ଅଗ୍ନିଶମ ବିଭାଗ ଗ୍ରାମବାସୀ ପହଞ୍ଚି ଖୋଜାଖୋଜି କରିଥିଲେ ମଧ୍ୟ ବୃଦ୍ଧକୁ ପାଇନଥିଲେ ଓ ପରିବାର ଲୋକେ ରାତି ତମାମ ଖୋଜି ଖୋଜି ନିରାଶ ହୋଇଥିଲେ । ପାଣି କମିବା ପରେ ଅଧକିଲୋମିଟର ଦୂରରୁ ମୃତଦେହ ଠାବ କରାଯାଇଥିଲା । ପୋଲିସ ଶବ ଜବଦ କରି ଏକ ଅପମୃତ୍ୟୁ ମାମଲା ରୁଜୁ କରି ରାଇରଙ୍ଗପୁର ଉପଖଣ୍ଡ ସରକାରୀ ଡାକ୍ତରଖାନା ଶବ ବ୍ୟବଚ୍ଛେଦ ପାଇଁ ପଠାଇଛନ୍ତି ।