ପାରାଦୀପ, ୨୦/୧୨: ପାରାଦୀପ ମେରାଇନ ଡ୍ରାଇଭ୍ ରାସ୍ତାରେ ଏକ ବାଇକ୍ ଉପରେ ଟ୍ରକ୍ ଚଢି ଯିବାରୁ ଦୁଇ ବାଇକ୍ ଆରୋହୀ ଗୁରୁତର ହୋଇଛନ୍ତି । ଯୁବକ ଦ୍ୱୟ ବାଲିଝରା ବସ୍ତିର ଅଭୟ ପ୍ରଧାନ ଓ ପାରାଦ୍ଵୀପ ତାରିଣୀଗଡାର ମହାଦେବ ଖୁଣ୍ଟିଆ ବୋଲି ଜଣାପଡ଼ିଛି । ଜଗତସିଂହପୁର ଜିଲ୍ଲା ପାରାଦୀପ ମେରାଇନ ଡ୍ରାଇଭ୍ ରାସ୍ତାରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଯୁବକ ଦ୍ୱୟ ହାଇୱା ଗାଡିର ଡ୍ରାଇଭର ହୋଇଥିବା ବେଳେ ଉଭୟ ଗାଡ଼ିକୁ ହନୁମାନ ମନ୍ଦିର ନିକଟରେ ରଖି ଏକ ବାଇକରେ ହୋଟେଲରେ ଖାଇବା ପାଇଁ ବଡପଡିଆ ମାର୍କେଟ ଯାଉଥିଲେ । ଏହି ସମୟରେ ପାରାଦୀପ ମେରାଇନ ଡ୍ରାଇଭ୍ ରାସ୍ତାରେ ଏକ ଟ୍ରକ୍ ବାଇକ୍ ଉପରେ ଚଢି ଯାଇଥିଲା । ଫଳରେ ଯୁବକ ଦ୍ୱୟ ଗୁରୁତର ହୋଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଯୁବକଙ୍କୁ ଗୁରୁତର ଅବସ୍ଥାରେ ପ୍ରଥମେ ବନ୍ଦର ଚିକିତ୍ସାଳୟରେ ଭର୍ତ୍ତି କରିଥିବା ବେଳେ ଅଭୟ ପ୍ରଧାନଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି । ଘଟଣାସ୍ଥଳରେ ଜଟାଧାରୀ ମୁହାଣ ମେରାଇନ ପୋଲିସ ପହଞ୍ଚି ଟ୍ରକ୍କୁ ଜବତ କରିବା ସହିତ ତଦନ୍ତ ଜାରି ରଖିଛି।
