ଖଜୁରୀପଡ଼ା, ୧/୧୨: ଶନିବାର ରାତିରେ ଖଜୁରୀପଡ଼ା ଥାନା ଜାମଝରିଠାରେ ବାଇକ ଦୁର୍ଘଟଣାଗ୍ରସ୍ତ । ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ହୋଇଛନ୍ତି । ମୃତକ ଜଣକ ସଦର ଥାନା କୁମୁଝରି ଗ୍ରାମର ସୁନୀଲ କହଁର ଏବଂ ଗୁରୁତର ଜଣକ ବିକାଶ କହଁର ବୋଲି ଜଣାପଡ଼ିଛି ।
ସୂଚନା ଅନୁଯାୟୀ, ଉଭୟେ ଶନିବାର ରାତିରେ ଏକ ଭୋଜି କାର୍ଯ୍ୟରେ ଯୋଗ ଦେବାକୁ ସୁଡ୍ରୁକୁମ୍ପାରୁ ଖଜୁରୀପଡ଼ା ଯାଉଥିଲେ । ଜାମଝରି ନିକଟରେ ନିର୍ମାଣାଧୀନ ପୋଲରେ ବାଇକ ବାଡ଼େଇ ହୋଇଯିବା ଫଳରେ ଘଟଣାସ୍ଥଳରେ ସୁନୀଲଙ୍କ ମୃତ୍ୟୁ ହୋଇଥିଲା । ବିକାଶଙ୍କୁ ଗୁରୁତର ଅବସ୍ଥାରେ ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ଅବସ୍ଥା ଅଧିକ ଗୁରୁତର ହେବାରୁ ତାଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଛି ।
