ମୁମ୍ବାଇ ୦୨/୧୧: ‘ହାଉସ୍ଫୁଲ-୫’ରେ ନଜର ଆସିବେ ‘ବିଗ୍ ବସ୍-୧୬’ ପ୍ରତିଯୋଗୀ ସୌନ୍ଦର୍ଯ୍ୟା ଶର୍ମା । ଏ ବିଷୟରେ ସେ କହିଛନ୍ତି, ‘ହାଉସ୍ଫୁଲ’ ଫ୍ରାଞ୍ଚାଇଜ୍ରେ ସାମିଲ ହୋଇ ମୁଁ ଅତ୍ୟନ୍ତ ଆନନ୍ଦିତ । ଆଗରୁ ଫିଲ୍ମର ଗୀତରେ ମୁଁ ନୃତ୍ୟ କରୁଥିଲି । ଏବେ ଫିଲ୍ମର ଷ୍ଟାର୍କାଷ୍ଟରେ ସାମିଲ ହୋଇଛି । ଏହି ଅନୁଭବ ବେଶ ରୋମାଞ୍ଚକର । ଫିଲ୍ମରେ ମୋ ଚରିତ୍ର ବିଷୟରେ କହିବା ପାଇଁ ମୋତେ ଅନୁମତି ମିଳିନାହିଁ । ତେବେ ଏତିକି କହିବି, ଦର୍ଶକ ପୂର୍ବରୁ ଏଭଳି ଚରିତ୍ର ଦେଖିନାହାନ୍ତି । ଏହା ଏକ ସର୍ପ୍ରାଇଜ ପ୍ୟାକେଜ୍ ।
ଫିଲ୍ମର ନିର୍ଦ୍ଦେଶକ ତରୁନ ମନସୁଖାନି ଚରିତ୍ରର ଲୁକ୍ ଓ କାମକୁ ଖୁବ୍ ଧ୍ୟାନର ସହ ସଜାଇଛନ୍ତି । ଏହି ସୁଯୋଗ ପାଇଁ ପ୍ରଯୋଜକ ସାଜିଦ ନାଦିଆଦୱାଲାଙ୍କ ପତ୍ନୀ ୱାରଦାଙ୍କୁ ସୌନ୍ଦର୍ଯ୍ୟା କୃତଜ୍ଞତା ଜଣାଇଛନ୍ତି । ଏହା ପୂର୍ବରୁ ଶାହରୁଖ, ଅଜୟ ଦେବଗନ ଓ ଅକ୍ଷୟ କୁମାରଙ୍କ ଅଭିନୀତ ପାନ ମସାଲା ବିଜ୍ଞାପନରେ ସେ ନଜର ଆସିଥିଲେ । ‘ରାଞ୍ଚି ଡାଏରିଜ୍’ ଓ ‘ଥ୍ୟାଙ୍କ୍ ଗଡ୍’ ଫିଲ୍ମରେ ବି କାମ କରିଥିଲେ । ତଥାପି ତାଙ୍କର ପ୍ରକୃତ ପ୍ରତିଭା ଅଦ୍ୟାବଧି ଲୋକଲୋଚନକୁ ଆସିନାହିଁ । ‘ହାଉସ୍ଫୁଲ-୫’ ଜରିଆରେ ଅଭିନୟ ଯାତ୍ରା ଆରମ୍ଭ ହେବ ବୋଲି ସେ କହିଛନ୍ତି ।
