ଭୁବନେଶ୍ୱର,୦୩/୧୦: ଭରତପୁର ଥାନାରେ ହଙ୍ଗାମା ମାମଲାରେ ଗୁରୁବାର ୫ ପୁଲିସ ଅଧିକାରୀଙ୍କ ମିଛଧରା (ପଲିଗ୍ରାଫ୍) ପରୀକ୍ଷା ଆରମ୍ଭ ହେବ । ଗୁଜୁରାଟରେ ଥିବା କ୍ରାଇମ୍ବ୍ରାଞ୍ଚ ଦଳ ଏଥିସଂକ୍ରାନ୍ତୀୟ ସମସ୍ତ କାଗଜପତ୍ର କାମ ପ୍ରାୟତଃ ସରି ଆସିଲାଣି । ଏହି ପ୍ରକ୍ରିୟା ୨-୩ ଦିନ ଲାଗିପାରେ ବୋଲି ସୂଚନା ମିଳିଛି ।
କ୍ରାଇମ୍ବ୍ରାଞ୍ଚ ସୂତ୍ରରୁ ପ୍ରକାଶ ଯେ ସୋମବାର ଓ ମଙ୍ଗଳବାର ୨ ଦିନ ଧରି କାଗଜପତ୍ର କାମ ଚାଲିଥିଲା । ତଦନ୍ତକାରୀ ଅଧିକାରୀ ନରେନ୍ଦ୍ର ବେହେରାଙ୍କ ନେତୃତ୍ୱରେ କ୍ରାଇମ୍ବ୍ରାଞ୍ଚ ଗାନ୍ଧୀନଗରର ରାଜ୍ୟ ଅପରାଧ ବିଧି ବିଜ୍ଞାନାଗାର (ଏସ୍ଏଫ୍ଏସ୍ଏଲ୍)ରେ ଆବେଦନ ସହ ସ୍ଥାନୀୟ ଅଦାଲତରୁ ଅନୁମତି ମାଗିବା ପ୍ରକ୍ରିୟାରେ ବ୍ୟସ୍ତ ଥିଲେ । ବୁଧବାର ସରକାରୀ ଛୁଟି ଯୋଗୁ ଏହି ପ୍ରକ୍ରିୟା ବନ୍ଦ ରହିଛି । ଗୁରୁବାର ସମସ୍ତ କାଜଗପତ୍ର କାମ ସରିବା ପରେ ୫ଜଣ ପୁଲିସଙ୍କୁ ପରୀକ୍ଷାଗାରକୁ ନିଆଯିବ ।
ନିଲମ୍ବିତ ଥାନା ଅଧିକାରୀ ଇନ୍ସପେକ୍ଟର ଦୀନକୃଷ୍ଣ ମିଶ୍ରଙ୍କ ସମେତ ସବ୍ଇନ୍ସପେକ୍ଟର ବୈଶାଳିନୀ ନାୟକ, ଏଏସ୍ଆଇ ସଳୀଳମୟୀ ସାହୁ, ଏଏସ୍ଆଇ ସାଗରିକା ନାଥ ଓ ଏସ୍ଆଇ ପ୍ରଶାନ୍ତ ମହାରଣା ପଲିଗ୍ରାଫ ପରୀକ୍ଷାର ସାମ୍ନା କରିବେ । ତା’ ପରଦିନ ଶ୍ରୀ ମିଶ୍ରଙ୍କ ଅନ୍ୟ ୨ଟି ପରୀକ୍ଷା (ବ୍ରେନ୍ ମ୍ୟାପିଂ ଓ ନାର୍କୋ) ହୋଇପାରେ । ସମସ୍ତ ପ୍ରକ୍ରିୟା ସରିବା ପରେ କ୍ରାଇମ୍ବ୍ରାଞ୍ଚ ଦଳ ସହ ୫ ପୁଲିସ ଅଧିକାରୀ ଆଗାମୀ ସପ୍ତାହରେ ଓଡି଼ଶା ଫେରିବେ । ଅନ୍ୟପଟେ ବିଚାର ବିଭାଗୀୟ ତଦନ୍ତ ପ୍ରକ୍ରିୟା ଆରମ୍ଭ ପାଇଁ ଖୁବ୍ ଶୀଘ୍ର ସତ୍ୟପାଠ ଆହ୍ୱାନ କରାଯିବ । ଏନେଇ ସରକାରଙ୍କ ପକ୍ଷରୁ ଦିନେ କିମ୍ବା ୨ ଦିନ ଭିତରେ ଗଣମାଧ୍ୟମରେ ବିଜ୍ଞପ୍ତି ପ୍ରକାଶିତ ହେବ ।
