ନୂଆଦିଲ୍ଲୀ,୦୯/୦୨: ସରିଲା ବନବାସ ଫେରିଲା ବିଜେପି । ୨୭ ବର୍ଷ ପରେ ଆପକୁ ହରାଇ ଦିଲ୍ଲୀ ଗଡ ଦଖଲ କରିଛି ଭାରତୀୟ ଜନତା ପାର୍ଟି । କହି କହି ଦିଲ୍ଲୀ ବିଧାନସଭା ନିର୍ବାଚନରେ ବାଜି ମାରିନେଲା ବିଜେପି । ଏ ନେଇ ବିଜେପି କର୍ମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିବା ସହ ବିଜୟ ସେଲିବ୍ରେସନ କରିଛନ୍ତି । ଦିଲ୍ଲୀରେ ବିଜୟ ପରେ ଉତ୍ସାହିତ ପଶ୍ଚିମବଙ୍ଗ ବିଜେପି ନେତା ଶୁଭେନ୍ଦୁ ଅଧିକାରୀ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଚେତାବନୀ ଦେଇଛନ୍ତି । କହିଛନ୍ତି ଏଥର ପଶ୍ଚିମବଙ୍ଗ ପାଳି ।
ପଶ୍ଚିମବଙ୍ଗ ବିଜେପି ନେତା ଶୁଭେନ୍ଦୁ ଅଧିକାରୀ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, ''ଦିଲ୍ଲୀର ବିଜୟ ଆମ ବିଜୟ । ଏହା ଐତିହାସିକ । ଦେଶ ପାଇଁ ମହତ୍ତ୍ବପୂର୍ଣ୍ଣ । ଭ୍ରଷ୍ଟାଚାର ଏବଂ ମିଥ୍ୟା ରାଜନୀତିର ଅନ୍ତର ଆରମ୍ଭ । ଆମ ଆଦମୀ ପାର୍ଟି ସରକାର ଜନତାଙ୍କୁ ଦେଇଥିବା ପ୍ରତିଶ୍ରୁତି ପୂରଣ କରିନାହିଁ । ସେମାନଙ୍କ ସହ ଧୋକା କରିଛି । ଭ୍ରଷ୍ଟାଚାରରେ ଲିପ୍ତ ଥିଲା । ଯାହାର ଜବାବ ଦେଇଛନ୍ତି ଦିଲ୍ଲୀଜନତା । ୨୦୨୬ରେ ବଙ୍ଗଳା ପାଳି । ମୁଖ୍ୟମନ୍ତ୍ରୀ ମମତା ବାନାର୍ଜୀ ଏଥର ତୁମ ପାଳି ।''
ସେ ଆହୁରି କହିଛନ୍ତି, ''ଏଥର ବଙ୍ଗଳାରେ ପରିବର୍ତ୍ତନର ସମୟ ଆସିଛି । ଦିଲ୍ଲୀ ପରି ପଶ୍ଚିମବଙ୍ଗରେ ଭାଜପା ଲହର ଚାଲିବ । ତୃଣମୂଳ ସରକାର ଦ୍ବାରା ହୋଇଥିବା ଘୋଟାଲା ଓ ପୋଲିସକର୍ମୀଙ୍କ ଦୂରୁପଯୋଗକୁ ରୋକା ଯିବ । ପଶ୍ଚିମବଙ୍ଗ ଜନତା ପ୍ରସ୍ତୁତ ଅଛନ୍ତି । ୨୦୨୬ ନିର୍ବାଚନରେ ତୃଣମୂଳ କଂଗ୍ରେସ ସରକାର ଉପରେ ଭାରି ପଡିବ ବିଜେପି ।''
କହି ରଖୁଛୁ କି, ଦିଲ୍ଲୀ ବିଧାନସଭା ୭୦ ଆସନରେ ଗତ ୫ ତାରିଖରେ ଭୋଟ ଗ୍ରହଣ ହୋଇଥିଲା । ଗତକାଲି (ଶନିବାର) ଫଳାଫଳ ପ୍ରକାଶ ପାଇଛି । ଲଗାତାର ଦୁଇ ପାଳି ଦିଲ୍ଲୀରେ ସରକାର ଗଢି ଆସୁଥିବା ଅରବିନ୍ଦ କେଜ୍ରିୱାଲଙ୍କ ନେତୃତ୍ବାଧୀନ ଆମ୍ ଆଦମୀ ପାର୍ଟି (ଆପ୍) କୁ ଏଥର ଶକ୍ତ ଧକ୍କା ଲାଗିଛି । ମୋଦି ମ୍ୟାଜିକରେ ଝଡି ପଡିଛି ଝାଡୁ (ଆପ୍ ଚିହ୍ନ) । ବିପୁଳ ବିଜୟ ସହ ୨୭ ବର୍ଷ ପରେ ବିଜେପି ଦିଲ୍ଲୀ ଦଖଲ କରିଛି । ବିଜେପି ୪୮ ଆସନ କବଜା କରି ନେଇଛି । ଆପକୁ ୨୨ ଆସନ ମିଳିଥିବା ବେଳେ କଂଗ୍ରେସ ଖାତା ଖୋଲି ପାରିନାହିଁ । ଧିରେ ଧିରେ ଆଞ୍ଚଳିକ ଦଳକୁ ଚମକା ଦେଇ ବାଜି ମାରି ନେଉଛି ଭାରତୀୟ ଜନତା ପାର୍ଟି ।
