ବଲାଙ୍ଗିର, ୨୮/୧୦: ପୂରା ଶୁଷ୍କାଞ୍ଚଳ । ଏଠି ବର୍ଷତମାମ ମାଟି ଠାଏଠାଏ କରେ । ଆବଶ୍ୟକ ଜଳସେଚନ ବ୍ୟବସ୍ଥା ବି ନାହିଁ । ପ୍ରକୃତି ଦାଉସାଧିଲା ମାନେ ଚାଷୀ ସର୍ବସ୍ୱାନ୍ତ ହେବାସାର । ତେଣୁ ଚଷାପୁଅ ହେଲେ ବି ଚାଷ କରି ଋଣବୋଝ ବୋହିବା ଅପେକ୍ଷା ଦାଦନ ଯିବାକୁ ଉଚିତ ମଣୁଥିଲା । ଯେଉଁମାନେ ଦାଦନ ଯାଉ ନ ଥିଲେ, କପା ବ୍ୟତୀତ ସେମାନେ ଅନ୍ୟ କିଛି ଚାଷ କରିବା କଥା ଭାବି ପାରୁ ନ ଥିଲେ । କପା ପାଇଁ ବର୍ଷତମାମ ସେମାନଙ୍କୁ ବାନ୍ଧି ହେବାକୁ ପଡ଼ୁଥିଲା । ହେଲେ ଏବେ ସେହି ଦାଦନଗଡ଼ର ଶୁଷ୍କ ମାଟିରେ ବିକଳ୍ପ ଚାଷ ଆରମ୍ଭ ହୋଇଛି । ପ୍ରଥମଥର ପାଇଁ ସେଠାରେ କେତେଜଣ ଚାଷୀ ବର୍ଷାଦିନିଆ ତରଭୁଜ ଚାଷ କରିଛନ୍ତି, ଯାହା ସେମାନଙ୍କ ଭାଗ୍ୟ ବଦଳାଇ ଦେଇଛି । ମାତ୍ର ୭୦ଦିନ ଭିତରେ ଅମଳ କରି କୋଟିଏ ଟଙ୍କାର ତରଭୁଜ ରାଜ୍ୟ ବାହାରକୁ ବିକ୍ରି ପାଇଁ ପଠାଇଛନ୍ତି । ବଲାଙ୍ଗିର ଜିଲ୍ଲା ବେଲପଡ଼ା ବ୍ଲକ ଏକଦା ଦାଦନ ପାଇଁ ପରିଚିତ ଥିଲା । ଏବେ ସେଠିକାର ଚାଷୀ ଦିଲ୍ଲୀରୁ ଛତିଶଗଡ଼ ଏବଂ ଉତ୍ତରପ୍ରଦେଶରୁ ଝାଡ଼ଖଣ୍ଡ ପର୍ଯ୍ୟନ୍ତ ତରଭୁଜ ପଠାଇ ବିଭିନ୍ନ ବଜାରରେ ନିଜର ସ୍ଥିତି ଜାହିର କରିଛନ୍ତି ।
ବେଲପଡ଼ା ବ୍ଲକରେ ଆବଶ୍ୟକ ଜଳସେଚନ ବ୍ୟବସ୍ଥା ନ ଥିବାରୁ ପ୍ରାୟ ୮୫ ଭାଗ ଜମିରେ କପା ଚାଷ ହୋଇଥାଏ । ଯଦି ବି କେହି ପାରମ୍ପରିକ ପରିବା ଚାଷ କରେ, ତା’ହେଲେ ଅଭାବୀ ବିକ୍ରିର ଶିକାର ହୋଇଥାଏ । ତେଣୁ ଜିଲ୍ଲା ଉଦ୍ୟାନ କୃଷି ବିଭାଗ ପକ୍ଷରୁ ଗତ ଦୁଇବର୍ଷ ତଳେ ଅଦିନିଆ ପନିପରିବା ଓ ଫଳଚାଷ କରି ଲୋକଙ୍କ ଆର୍ଥିକ ଅବସ୍ଥାରେ ଉନ୍ନତି ଆଣିବା ପାଇଁ ପ୍ରୟାସ ଆରମ୍ଭ ହୋଇଥିଲା । କମ୍ ପାଣି ବ୍ୟବହାର କରି ଶୀଘ୍ର ଅମଳ ଦେଉଥିବା ବର୍ଷାଦିନିଆ ତରଭୁଜ ଚାଷ କରିବାକୁ ଚାଷୀଙ୍କୁ ପରାମର୍ଶ ଦିଆଯାଇଥିଲା । ଗତବର୍ଷ ପ୍ରଥମ କରି ୧୦ ଏକର ଜମିରେ ହାତଗଣତି କେତେକ ଚାଷୀଙ୍କୁ ବିଭାଗ ପକ୍ଷରୁ ବିହନ ଯୋଗାଇ ଦିଆଯାଇଥିଲା । ବିହନ ରୋପଣର ୭୦ଦିନ ପରେ ସେମାନେ ଅମଳ ଆରମ୍ଭ କରିଥିଲେ । ଏଥର ବର୍ଷ ଆରମ୍ଭରୁ ଉଦ୍ୟାନ କୃଷି ବିଭାଗ ସ୍ୱତନ୍ତ୍ର ଭାବେ ଧ୍ୟାନ ଦେଇ ୧୧୨.୫ ଏକର ଅର୍ଥାତ୍ ପ୍ରାୟ ୪୫ ହେକ୍ଟରରେ ଚାଷ କରିବାକୁ ଉଦ୍ୟମ କଲା । ସେହିଅନୁସାରେ ଚାଷୀଙ୍କୁ ଆବଶ୍ୟକ ଜ୍ଞାନକୌଶଳ, ସାର, ବିହନ ଯୋଗାଇ ଦିଆଗଲା । ଜୁନ୍ ମାସରେ ଚାଷୀମାନେ ମଞ୍ଜି ନେଇ ଲଗାଇଲେ । ଆଉ ଗତ ଅକ୍ଟୋବର ପହିଲାରୁ ଅମଳ ଆରମ୍ଭ ହୋଇଛି । ଏହା ଲମ୍ବାଳିଆ କିସମର ମଞ୍ଜି ହୋଇଥିବାରୁ ତରଭୁଜ ମଧ୍ୟ ଲମ୍ବା ହୋଇ ସର୍ବାଧିକ ୭ କେଜି ପର୍ଯ୍ୟନ୍ତ ଓଜନ ରହୁଛି । ଏକର ପ୍ରତି ୧୨ରୁ ୧୫ ଟନ୍ ଅମଳ ହେଉଥିବା ବେଳେ ସମଗ୍ର ଅଞ୍ଚଳରୁ ଏପର୍ଯ୍ୟନ୍ତ ପ୍ରାୟ ୬ଶହରୁ ୭୦୦ ଟନ ଅମଳ ହୋଇସାରିଥିବା ଚାଷୀମାନେ କହିଛନ୍ତି।
ମୁଖ୍ୟତଃ ଖରାଟିଆ ତରଭୁଜର ବଜାର ଦର କେଜି ପିଛା ପ୍ରାୟ ୭ରୁ ୮ଟଙ୍କା ରହୁଥିବା ବେଳେ ବର୍ଷାଦିନିଆ ତରଭୁଜ ୧୫ରୁ ୧୬ ଟଙ୍କାରେ ବିକ୍ରି ହେଉଛି । ବେଲପଡ଼ାରୁ ଅମଳ ହୋଇଥିବା ତରଭୁଜକୁ ଦୁର୍ଗାପୂଜା ସମୟରେ କୋଲକାତା, ଟାଟା, ରାଞ୍ଚି, ସିଲିଗୁଡ଼ି, ରାୟପୁର, ଭିଲାଇ, ଲକ୍ଷେ୍ମø, ଦିଲ୍ଲୀ ବଜାରକୁ ପଠାଯାଇଛି । କପାରେ ୬ମାସ ପରିଶ୍ରମ କଲା ପରେ ମାତ୍ର ୨୦ହଜାର ଟଙ୍କାର ଲାଭ ମିଳୁଥିବା ବେଳେ ଏହି ତରଭୁଜ ଚାଷରୁ ୭୦ଦିନରେ ଏକର ପ୍ରତି ୧ ଲକ୍ଷ ପର୍ଯ୍ୟନ୍ତ ମିଳୁଛି ବୋଲି ତରଭୁଜ ବଜାର ବ୍ୟବସ୍ଥା କରାଇଥିବା ରଞ୍ଜନ କୁମାର ସାହୁ କହିଛନ୍ତି । ବେଲପଡ଼ା ବ୍ଲକ ନାଗଫେଣା ଗାଁର ଚାଷୀ ଗୋପ ମେହେର ପୂର୍ବରୁ ଜମିରେ କପା ଚାଷ କରୁଥିଲେ । ବର୍ଷକର ୬ମାସ ଜମିରେ କାମ କରିବାକୁ ପଡୁଥିଲା । କପା ବିକ୍ରି ସମୟରେ ହଟହଟା ମଧ୍ୟ ହେଉଥିଲେ । ହେଲେ ସେ ନିଜ ୧୦ ଏକର ଜମିରେ ତରଭୁଜ ଚାଷ କରି ୧୨ଲକ୍ଷ ଟଙ୍କା ରୋଜଗାର କରିଥିବା କହିଛନ୍ତି ।
ଏ ସମ୍ପର୍କରେ ଉଦ୍ୟାନ କୃଷି ବିଭାଗର ଅତିରିକ୍ତ ଉପନିର୍ଦ୍ଦେଶକ ପ୍ରମୋଦ କୁମାର ସେଠୀ କହିଛନ୍ତି, ଅଦିନିଆ ପରିବା କିମ୍ବା ଫଳରେ ସବୁବେଳେ ଲାଭ ହୁଏ । ସେଥିପାଇଁ ବେଲପଡ଼ା ବ୍ଲକ ଅଞ୍ଚଳରେ ଉଦ୍ୟାନ କୃଷି ବିଭାଗ ପକ୍ଷରୁ ଜାତୀୟ ଉଦ୍ୟାନ କୃଷି ମିଶନ (ଏନ୍ଏଚ୍ଏମ୍) ଏବଂ ରାଜ୍ୟ ଯୋଜନା (ଷ୍ଟେଟ ପ୍ଲାନ)ରେ ଏହି ଚାଷ କରାଯାଇଥିଲା । ଚାଷୀଙ୍କୁ ସବସିଡି ଦିଆଯାଉଛି । ମଞ୍ଜି ଯୋଗାଣକାରୀ ସଂସ୍ଥା, ଏପିଓ ଓ ଉଦ୍ୟାନ କୃଷି ବିଭାଗ ମିଳିତ ଭାବେ ଚାଷୀଙ୍କୁ ସମସ୍ତ ସହଯୋଗ ଦେଉଛନ୍ତି । ବିକ୍ରି ପାଇଁ ମଧ୍ୟ ସମସ୍ୟା ନାହିଁ । କୋଲକାତାରେ କେଜି ପ୍ରତି ୧୫ ଟଙ୍କା ଏବଂ ଭୁବନେଶ୍ୱରକୁ ୧୪.୫୦ ଟଙ୍କାରେ ଏଥରର ଅମଳ ଯାଇଛି । ଆଗକୁ ବର୍ଷାଦିନିଆ ତରଭୁଜ ଚାଷ ଆହୁରି ବୃଦ୍ଧିପାଇବ ବୋଲି ଶ୍ରୀ ସେଠୀ ଦୃଢ଼ୋକ୍ତି ପ୍ରକାଶ କରିଛନ୍ତି ।
