ନୂଆଦିଲ୍ଲୀ: ବାଂଲାଦେଶ ବିପକ୍ଷ ଟି-୨୦ ସିରଜ୍ ପୂର୍ବରୁ ଭାରତୀୟ ଟିମ୍କୁ ଝଟକା । ଭାରତୀୟ ଦଳର ଉଦୀୟମାନ ତାରକା ଅଲରାଉଣ୍ଡର ଶିବମ ଦୁବେ ଟି-୨୦ ସିରିଜ୍ରୁ ବାଦ୍ ପଡ଼ିଛନ୍ତି । ତାଙ୍କ ପରିବର୍ତ୍ତେ ବିସିସିଆଇ ତିଳକ ବର୍ମାଙ୍କୁ ଦଳରେ ସାମିଲ କରିଛି । ବିସିସିଆଇ ଅନୁସାରେ, ଅଲରାଉଣ୍ଡର ଶିବମ ଦୁବେ ପିଠିରେ ଆଘାତ ଲାଗିବା କାରଣରୁ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ରୁ ବାଦ୍ ପଡ଼ିଛନ୍ତି । ଦଳରୁ ବାଦ୍ ପଡ଼ିଥିବା ଶିବମ ଦୁବେ ଟି-୨୦ ବିଶ୍ଵକପ୍ ଚାମ୍ପିଅନ ଦଳର ସଦସ୍ୟ ଥିଲେ । ଚୟନକର୍ତ୍ତା ତାଙ୍କ ସ୍ଥାନରେ ତିଳକ ବର୍ମାଙ୍କୁ ଦଳରେ ସାମିଲ କରିଛନ୍ତି । ତିଳକ ବର୍ମା ରବିବାର ସକାଳେ ଗ୍ଵାଲିୟରରେ ଦଳରେ ଯୋଗ ଦେବେ ।
ଆସନ୍ତାକାଲି ଭାରତ ଓ ବାଂଲାଦେଶ ମଧ୍ୟରେ ପ୍ରଥମ ଟି-୨୦ ମ୍ୟାଚ୍ ଗ୍ଵାଲିୟରରେ ଖେଳାଯିବ । ଭାରତୀୟ ସମୟ ସନ୍ଧ୍ୟା ୭ଟାରେ ମ୍ୟାଚ୍ ଆରମ୍ଭ ହେବ । ସୂର୍ଯ୍ୟକୁମାର ଯାଦବ ଦଳର ନେତୃତ୍ଵ ନେଉଥିବା ବେଳେ ହାର୍ଦ୍ଦିକ ପାଣ୍ଡ୍ୟାଙ୍କ ପରି ବରିଷ୍ଠ ଖେଳାଳିଙ୍କ ଉପରେ ଗୁରୁଦାୟିତ୍ଵ ରହିଛି । ଅନେକ ବରିଷ୍ଠ ଖେଳାଳିଙ୍କୁ ଦଳରେ ବିଶ୍ରାମ ଦିଆଯାଇଥିବାରୁ ଅଭିଷେକ ଶର୍ମାଙ୍କ ପରି ଖେଳାଳିଙ୍କୁ ନିଜକୁ ସାବ୍ୟସ୍ତ କରିବା ପାଇଁ ସୁଯୋଗ ମିଳିଛି ।
ଜିମ୍ବାଓ୍ଵେ ବିପକ୍ଷ ସିରିଜ୍ରେ ଅଭିଷେକ ଶତକ ଅର୍ଜନ କରି ନିଜର ସାମର୍ଥ୍ୟ ଦେଖାଇଛନ୍ତି । ବାଂଲାଦେଶ ବିପକ୍ଷ ସିରିଜ୍ରେ ଅଭିଷେକ ସଞ୍ଜୁ ସାମସନଙ୍କ ସହ ଇନିଂସ ଓପନ କରି ପାରନ୍ତି। ଉଦୀୟମାନ ଦ୍ରୁତ ବୋଲର ମୟଙ୍କ ଯାଦବ ଟି-୨୦ ଅନ୍ତର୍ଜାତୀୟରେ ପଦାର୍ପଣ କରିବାକୁ ଯାଉଛନ୍ତି । ଆଇପିଏଲ୍ରେ ମୟଙ୍କ ଲଗାତାର ୧୫୦ କିମି ବେଗରେ ବୋଲିଂ କରି କ୍ରିକେଟ୍ ଜଗତରେ ଚହଳ ପକାଇଥିଲେ ।