ନୂଆଦିଲ୍ଲୀ : ବ୍ରହ୍ମାଣ୍ଡ ଅଗଣିତ ରହସ୍ୟର ସମାହାର। ଅନେକ ବର୍ଷରୁ ବିଶ୍ୱର ପ୍ରସିଦ୍ଧ ବୈଜ୍ଞାନିକମାନେ ବ୍ରହ୍ମାଣ୍ଡକୁ ନେଇ ନୂଆ ନୂଆ ତଥ୍ୟ ସବୁ ସାମ୍ନାକୁ ଆଣୁଛନ୍ତି, ତଥାପି ପ୍ରତି ନୂଆ ଆବିଷ୍କାର ଆଶ୍ଚର୍ଯ୍ୟ କରିଥାଏ। ଏହିଥର ଆଷ୍ଟ୍ରୋନୋମରମାନେ ସୌରମଣ୍ଡଳର ଏକ ଅସ୍ପର୍ଶ ଭାଗରେ ଏକ ଅଦ୍ଭୁତ ଆବିଷ୍କାର କରିଛନ୍ତି। ସେମାନେ କସ୍ମିକ୍ ଟନେଲ୍ ଅର୍ଥାତ୍ ମହାସୁଡ଼ଙ୍ଗର ଅସ୍ତିତ୍ୱ ବିଷୟରେ ପତ୍ତା କରିଛନ୍ତି, ଯାହା ପୂରା ବ୍ରହ୍ମାଣ୍ଡରେ ତାରା ଗୁଡ଼ିକୁ ଯୋଡ଼ିଥାନ୍ତି। ଇରୋସିଟା ଅବଜର୍ଭେଟୋରୀ ଡାଟାର ବ୍ୟବହାର କରି କରାଯାଇ ଥିବା ଅଧ୍ୟୟନ ଅନୁସାରେ , ଏହି କ୍ଷେତ୍ର ଆଲୋକ ବର୍ଷ ଯାଏ ବ୍ୟାପି ଥିବା ଗରମ ପ୍ଲାଜମାରେ ପୂର୍ଣ୍ଣ ରାସ୍ତା , ଯାହା ଏକ ଜଟିଳ କସ୍ମିକ୍ ଜାଲର ନିର୍ମାଣ କରିଥାଏ।
ଉନ୍ନତ ମ୍ୟାପିଂ ଟେକନିକ୍ର ଉପଯୋଗ କରି , ରିସର୍ଚ୍ଚରମାନେ ଆକାଶଗଙ୍ଗା ଗୁଡ଼ିକୁ ଯୋଡ଼ୁ ଥିବା ଏହି ସଙ୍କିର୍ଣ୍ଣ ଚ୍ୟାନେଲକୁ ଚିହ୍ନଟ କରିଛନ୍ତି। ଏହି ଟନେଲ ବିଶାଳ ତାରା ଗୁଡ଼ିକର ସୁପରନୋଭା ବିସ୍ଫୋରଣରୁ ଉତ୍ପନ୍ନ ହୋଇଥାଏ। ଏହି ଶକ୍ତିଶାଳୀ ବିସ୍ଫୋରଣରୁ ଗରମ ପ୍ଲାଜମାର ବବଲ୍ ସବୁ ନିର୍ମିତ ହୁଏ ,ଯାହା ପରସ୍ପର ମଧ୍ୟରେ ଯୋଡ଼ି ହୋଇ ସଂରଚନାତ୍ମକ ୱେବ୍ ବା ଜାଲ ତିଆରି କରିଥାଏ। ଏହି ଜାଲ ଶକ୍ତି ଓ ସାମଗ୍ରୀକୁ ଆକାଶଗଙ୍ଗା ଗୁଡ଼ିକରେ ନେଇଯିବାର କାମ କରି ଥାଏ।
ଅଧ୍ୟୟନରେ କୁହାଯାଇଛି କି , ଏହି ଟନେଲ ତାରା ଗୁଡ଼ିକ ମଧ୍ୟରେ ଇଣ୍ଟରଷ୍ଟେଲର ସ୍ପେସ୍ରେ ଗତିବିଧିକୁ ପ୍ରଭାବିତ କରିଥାଏ। ଏହା କସ୍ମିକ କିରଣକୁ ମାର୍ଗଦର୍ଶନ ଦେବା ସହ ତାରାଗୁଡ଼ିକର ନିର୍ମାଣ ଓ ବିକିରଣ ସ୍ତରକୁ ମଧ୍ୟ ପ୍ରଭାବିତ କରେ। ଏହା ବ୍ୟତୀତ, ସୁପରନୋଭା ଦ୍ୱାରା ନିର୍ମିତ ତତ୍ତ୍ୱ, ଯାହା ଗ୍ରହ ଓ ଜୀବନ ପାଇଁ ଆବଶ୍ୟକ , ଏହା ଟନେଲ ମାଧ୍ୟମରେ ଯାତ୍ରା କରିଥାଏ ଏବଂ ନୂଆ ତାରକୀୟ ପ୍ରଣାଳୀଗୁଡ଼ିକର ନିର୍ମାଣ ପାଇଁ ମହତ୍ତ୍ୱପୂର୍ଣ୍ଣ ସାମଗ୍ରୀ ବିତରଣ କରେ।
ଆଷ୍ଟ୍ରୋନୋମୀ ଓ ଆଷ୍ଟ୍ରୋଫିଜିକ୍ସରେ ପ୍ରକାଶିତ ଏକ ଅଧ୍ୟୟନ ସୌର ମଣ୍ଡଳ ପାଖରେ ଏକ କସ୍ମିକ୍ ଟନେଲ୍ର ଖୁଲାସା କରିଛି। କୁହାଯାଉଛି କି, ଏହି ଟନେଲ ଲୋକାଲ୍ ହଟ୍ ବବଲର ଅଂଶ। ଏହା ଗ୍ୟାସ୍ ମାଧ୍ୟମରେ ଏକ ମାର୍ଗ ଭାବେ କାର୍ଯ୍ୟ କରିଥାଏ, ଯାହା ସୌର ମଣ୍ଡଳକୁ ଆକାଶଗଙ୍ଗାର ଅନ୍ୟ ତାରାଙ୍କ ସହ ଯୋଡ଼ି ଥାଏ। ସ୍ପେସ୍ ଡଟ୍ କମ୍ ଅନୁସାରେ , ଏହି ଆବିଷ୍କାର ଆଷ୍ଟ୍ରୋନୋମୀରେ ଏକ ନୂଆ ଦୃଷ୍ଟି ପ୍ରଦାନ କରିବ।
