ନୂଆଦିଲ୍ଲୀ, ୧୦/୦୯: ଚୀନର ହୁଲନବୁଇର ଠାରେ ଚାଲିଥିବା ପୁରୁଷ ହକି ଏସିଆନ୍ ଚାମ୍ପିଅନ୍ସ ଟ୍ରଫିରେ ଡିଫେଣ୍ଡିଂ ଚାମ୍ପିଅନ୍ ଭାରତ କ୍ରମାନ୍ୱୟରେ ଦ୍ୱିତୀୟ ବିଜୟ ସହ ପଏଣ୍ଟ ତାଲିକାରେ ଶୀର୍ଷ ସ୍ଥାନ ବଜାୟ ରଖିଛି । ଚୀନକୁ ହରାଇ ଅଭିଯାନ ଆରମ୍ଭ କରିଥିବା ଭାରତ ସୋମବାର ଜାପାନକୁ ୫-୧ ଗୋଲ୍ରେ ପରାଜିତ କରିଥିଲା । ସୁଖଜିତ୍ ସିଂହ ଡବଲ୍ ଗୋଲ୍ କରି ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଆସନ୍ତା ବୁଧବାର ଭାରତ ପରବର୍ତ୍ତୀ ମ୍ୟାଚ୍ରେ ମାଲେସିଆକୁ ଭେଟିବ ।
ଭାରତ-ଜାପାନ ମ୍ୟାଚ୍ ଏକତରଫା ହୋଇଥିଲା । ପ୍ରଥମ କ୍ୱାର୍ଟରର ଦ୍ୱିତୀୟ ମିନିଟ୍ରେ ଖାତା ଖୋଲିଥିଲା ଭାରତ । ସୁଖଜିତ୍ ଏହି ଗୋଲ୍ କରିଥିଲେ । ତାଙ୍କୁ ଗୋଲ୍ରେ ସହାୟତା କରିଥିଲେ ସଞ୍ଜୟ । ପରବର୍ତ୍ତୀ ମିନିଟ୍ରେ ଅଭିଷେକ ଏକାଧିକ ଜାପାନ ଖେଳାଳିଙ୍କୁ ପଛରେ ପକାଇ ଏକ ଚମତ୍କାର ଗୋଲ୍ କରିଥିଲେ । ଭାରତ ୨-୦ରେ ଆଗେଇ ଥିଲା । ଦ୍ୱିତୀୟ କ୍ୱାର୍ଟର ଆରମ୍ଭରୁ ସଞ୍ଜୟ (୧୭ମିନିଟ୍) ଦଳ ପକ୍ଷରୁ ତୃତୀୟ ଗୋଲ୍ କରିଥିଲେ । ଜାପାନ ଏହି ଭାଗରେ ଗୋଟିଏ ପେନାଲ୍ଟି ସୁଯୋଗ ହାତଛଡ଼ା କରିଥିଲା । ପ୍ରଥମାର୍ଦ୍ଧ ଶେଷ ସୁଦ୍ଧା ୩-୦ରେ ଆଗୁଆ ରହି ଭାରତ ମ୍ୟାଚ୍କୁ ନିଜ ନିୟନ୍ତ୍ରଣରେ ରଖିଥିଲା ।
ତୃତୀୟ କ୍ୱାର୍ଟରରେ ଭାରତୀୟ ଖେଳାଳି ଆକ୍ରମଣ ଜୋରଦାର କରିଥିଲେ । ମାତ୍ର ଜାପାନ କଡ଼ା ଜବାବ ଦେଇଥିଲା । ଏହି ଭାଗର ଶେଷ ଆଡ଼କୁ ଜାପାନ ଗୋଟିଏ ଗୋଲ୍ ପରିଶୋଧ କରିଥିଲା । ୪୧ମିନିଟ୍ରେ କାଜୁମାସା ମାତ୍ସୁମୋଟୋ ଏହି ଗୋଲ୍ ଦେଇଥିଲେ । ଚତୁର୍ଥ ତଥା ଅନ୍ତିମ କ୍ୱାର୍ଟରରେ ଜାପାନ ଗୋଲ୍ ପରିଶୋଧ ନେଇ ଆପ୍ରାଣ ଉଦ୍ୟମ କରି ବିଫଳ ହୋଇଥିଲା । ଭାରତ ଏହି ଭାଗରେ ଆଉ ୨ଟି ଗୋଲ୍ କରିବା ସହ ୫-୧ ଗୋଲ୍ରେ ବିଜୟ ହାସଲ କରିଥିଲା । ୫୪ମିନିଟ୍ରେ ଉତ୍ତମ ସିଂହ ଏବଂ ୬୦ମିନିଟ୍ରେ ସୁଖଜିତ୍ ଗୋଲ୍ କରିଥିଲେ ।
ଭାରତ କ୍ରମାଗତ ଦ୍ୱିତୀୟ ବିଜୟ ସହ ମୋଟ ୬ପଏଣ୍ଟ ପାଇ ତାଲିକାରେ ଶୀର୍ଷ ସ୍ଥାନ ବଜାୟ ରଖିଛି । ଚୀନ ୩ପଏଣ୍ଟ ସହ ଦ୍ୱିତୀୟ, ଦକ୍ଷିଣ କୋରିଆ ଓ ପାକିସ୍ତାନ ପ୍ରତ୍ୟେକ ୨ପଏଣ୍ଟ ଲେଖାଏଁ ପାଇ ଯଥାକ୍ରମେ ତୃତୀୟ ଓ ଚତୁର୍ଥ ସ୍ଥାନରେ ରହିଛନ୍ତି ।
