ନୂଆଦିଲ୍ଲୀ: ଅପରେସନ ସିନ୍ଦୂର ପରେ, ସୁରକ୍ଷା ବାହିନୀ ଭାରତରେ ରହୁଥିବା ଏବଂ ଶତ୍ରୁ ଦେଶ ପାକିସ୍ତାନ ପାଇଁ ଗୁପ୍ତଚର ଭାବେ କାମ କରୁଥିବା ଲୋକଙ୍କ ବିରୁଦ୍ଧରେ ସତର୍କତା ବୃଦ୍ଧି କରିଛନ୍ତି। ଗୁପ୍ତଚରଙ୍କ ନିରନ୍ତର ଗିରଫଦାରୀ ମଧ୍ୟରେ, ଦିଲ୍ଲୀ ପୋଲିସର ସ୍ପେଶାଲ୍ ସେଲ୍ (NDR) ମଧ୍ୟ ଏକ ବଡ଼ ସଫଳତା ହାସଲ କରିଛି। ଏନଡିଆର ପାକିସ୍ତାନର ଗୁଇନ୍ଦା ସଂସ୍ଥା ISI ପାଇଁ ଗୁପ୍ତ ତଥ୍ୟ ବାଣ୍ଟିବା ଅଭିଯୋଗରେ କାସିମ୍ ନାମକ ଜଣେ ଯୁବକଙ୍କୁ ଗିରଫ କରିଛି। ଅଭିଯୁକ୍ତ ଜଣକ ରାଜସ୍ଥାନର ଭରତପୁରର ବାସିନ୍ଦା ବୋଲି ଜଣାପଡିଛି।

ପ୍ରାରମ୍ଭିକ ସୂଚନା ଅନୁଯାୟୀ, କାସିମ ଭରତପୁରର ଡିଗ୍ ସହରର ବାସିନ୍ଦା ବୋଲି ଜଣାପଡିଛି। ତାଙ୍କ ଭାଇ ମଧ୍ୟ ଜଣେ ISI ଏଜେଣ୍ଟ ଥିଲେ, ତେବେ ସିଏ ବର୍ତ୍ତମାନ ଫେରାର ଅଛନ୍ତି। କାସିମ ଗତବର୍ଷ ପାକିସ୍ତାନ ଯାଇଥିଲେ ଏବଂ ସେଠାରେ ଗୋଟିଏ ମାସ ରହି ପୁଣି ଭାରତ ଫେରି ଆସିଥିଲେ। ଏହି ସମୟକାଳ ମଧ୍ୟରେ କାସିମ ପାକିସ୍ତାନରେ ଗୁପ୍ତଚର କରିବାର ତାଲିମ ନେଇଥିଲେ। ତାଙ୍କୁ ISI ହ୍ୟାଣ୍ଡଲର ଏବଂ ବରିଷ୍ଠ ଅଧିକାରୀମାନେ ଗୋଟିଏ ମାସ ପାଇଁ ତାଲିମ ଦେଇଥିଲେ ବୋଲି ସେ ପ୍ରକାଶ କରିଛନ୍ତି।

ଆପଣ ଜାଣି ଆଶ୍ଚର୍ଯ୍ୟ ହୋଇଯିବେ ଯେ କାସିମ ବୃତ୍ତିରେ ଜଣେ ମୌଲବୀ। ତାଙ୍କ ଅଧିନରେ ଏକ ମଦ୍ରାସା ଥିବା ସମ୍ପର୍କରେ ମଧ୍ୟ ଜଣାପଡିଛି। ଅନ୍ୟପଟେ ଆଜି ଜୟପୁରରୁ ଗିରଫ ହୋଇଥିବା ଆଉଜଣେ ଗୁପ୍ତଚରଙ୍କ ସହିତ ତାଙ୍କର ମଧ୍ୟ ସମ୍ପର୍କ ରହିଛି। କାସିମ ଅନେକ ଲୋକଙ୍କୁ ମୌଳବାଦୀ ଚିନ୍ତାଧାରା ତଥା ଦେଶ ବିରୋଧି ଚିନ୍ତାଧାରାରେ ପକାଇଦେଇଛନ୍ତି ବୋଲି ଦୋଷ ସ୍ୱୀକାର କରିଛନ୍ତି। ତେବେ ତାଙ୍କ ସହିତ ଆହୁରି କେତେ ଜଣ ଥିବା ନେଇ ମଧ୍ୟ ଗୁଇନ୍ଦା ବିଭାଗକୁ ସୂଚନା ମିଳିଛି ଓ ସେମାନଙ୍କୁ ମଧ୍ୟ ଖୋଜା ଚାଲିଛି। ଆଗାମୀ ଦିନରେ ଏହି ମାମଲାରେ ଆଉ କେତେକ ଲୋକ ଗିରଫ ହୋଇପାରନ୍ତି ବୋଲି ଅନୁମାନ କରାଯାଉଛି।