ଭୁବନେଶ୍ୱର: ଭାରତୀୟ ଆଥଲେଟିକ୍ସ ଓ ଓଡ଼ିଶା ରାଜ୍ୟ ପାଇଁ ଏକ ଐତିହାସିକ ମୁହୂର୍ତ୍ତରେ, ଓଡ଼ିଶା ରିଲାଏନ୍ସ ଫାଉଣ୍ଡେସନ ହାଇ ପରଫରମାନ୍ସ ସେଣ୍ଟରର ଅନିମେଷ କୁଜୁର ୨୦୨୫ ଏସୀୟ ଆଥଲେଟିକ୍ସ ଚାମ୍ପିଅନସିପରେ ୨୦୦ ମିଟର ଦୌଡ଼ରେ ବ୍ରୋଞ୍ଜ ପଦକ ଜିତି ଇତିହାସ ରଚିଛନ୍ତି। ଏହି ଚାମ୍ପିଅନସିପ ଦକ୍ଷିଣ କୋରିଆର ଗୁମିରେ ଅନୁଷ୍ଠିତ ହୋଇଥିଲା।
ଓଡ଼ିଶା ସରକାର ଓ ରିଲାଏନ୍ସ ଫାଉଣ୍ଡେସନର ସହଭାଗିତାରେ ଟ୍ରେନିଂ ନେଉଥିବା ଅନିମେଷ ମାତ୍ର ୨୦.୩୨ ସେକେଣ୍ଡରେ ଦୌଡ଼ ସାରି ଚଳିତ ବର୍ଷ ଆରମ୍ଭରେ ନିଜେ ସ୍ଥାପନ କରିଥିବା ଜାତୀୟ ରେକର୍ଡକୁ ପୁନର୍ବାର ଭାଙ୍ଗି ଦେଇଛନ୍ତି। ଏହା ଓଡ଼ିଶାରେ ବିଶ୍ୱସ୍ତରୀୟ ଭିତ୍ତିଭୂମି ଏବଂ କୋଚିଂ ବ୍ୟବସ୍ଥାର ସଫଳତାକୁ ପ୍ରମାଣ କରୁଛି।
୨୧ ବର୍ଷୀୟ ଅନିମେଷଙ୍କୁ ପ୍ରଶଂସା କରି ଓଡ଼ିଶା ରିଲାଏନ୍ସ ଫାଉଣ୍ଡେସନ ହାଇ ପରଫରମାନ୍ସ ସେଣ୍ଟରର ମୁଖ୍ୟ କୋଚ ମାର୍ଟିନ ଓୱେନ୍ସ କହିଛନ୍ତି, "ଅନିମେଷ ଆଜି ଗୁମିରେ ଅସାଧାରଣ ପ୍ରଦର୍ଶନ କରିଛନ୍ତି ଏବଂ ୨୧ ବର୍ଷ ବୟସରେ ତାଙ୍କ ପ୍ରଥମ ବଡ଼ ଚାମ୍ପିଅନସିପରେ ଉଚ୍ଚ ସ୍ତରୀୟ ପ୍ରଦର୍ଶନ କରିଛନ୍ତି। ବ୍ରୋଞ୍ଜ ପଦକ ହାସଲ କରିବା ହାଇ ପରଫରମାନ୍ସ ସେଣ୍ଟର ଟିମ ଏବଂ ଓଡ଼ିଶାର ସମସ୍ତ ସମ୍ପୃକ୍ତ ଲୋକଙ୍କ ପାଇଁ ଏକ ଉଲ୍ଲେଖନୀୟ ସଫଳତା। ଆମ ସେଣ୍ଟରରେ ସମର୍ଥନ ଏବଂ ସାମଗ୍ରିକ ଦୃଷ୍ଟିକୋଣ ରହିଛି। ଆଗକୁ ଯାଇ ଯଦି ସମସ୍ତ ପ୍ରସ୍ତୁତି ଠିକ୍ ହୁଏ, ତେବେ ବିଶ୍ୱ ଚାମ୍ପିଅନସିପ ଅନିମେଷଙ୍କ ପାଇଁ ଅସମ୍ଭବ ନୁହେ।"
ଚାମ୍ପିଅନସିପରେ ନିଜର ସଫଳତା ପରେ ଉତଫୁଲ୍ଲିତ ଅନିମେଷ କୁଜୁର କହିଛନ୍ତି ଯେ, "ମୋର ପ୍ରଥମ ଆନ୍ତର୍ଜାତୀୟ ଚାମ୍ପିଅନସିପରେ ବ୍ରୋଞ୍ଜ ପଦକ ଜିତି ମୁଁ ବହୁତ ଗର୍ବିତ। ଷ୍ଟାର୍ଟିଂ ଲାଇନରେ ମୁଁ ମାନସିକ ଭାବେ ସୁସ୍ଥ ଥିଲି ଏବଂ ମୋ କ୍ଷମତା ଉପରେ ଆତ୍ମବିଶ୍ୱାସୀ ଥିଲି। ଫାଇନାଲ ରେସ୍ରେ ମୁଁ ଧୈର୍ଯ୍ୟ ବଜାୟ ରଖିଥିଲି ଏବଂ ପୁନର୍ବାର ଜାତୀୟ ରେକର୍ଡ ଭାଙ୍ଗି ଖୁସି ଲାଗୁଛି। ତେବେ ଏହା ଏକ ଆରମ୍ଭ ମାତ୍ର ଏବଂ ନିକଟ ଭବିଷ୍ୟତରେ ମୁଁ ଆହୁରି ଉଚ୍ଚତା ହାସଲ କରିବି।"
ଏହି ଚାମ୍ପିଅନସିପରେ ରିଲାଏନ୍ସ ଫାଉଣ୍ଡେସନ ଦ୍ୱାରା ସମର୍ଥିତ ଆଥଲେଟମାନେ ସର୍ବକାଳୀନ ସର୍ବୋତ୍କୃଷ୍ଟ ପ୍ରଦର୍ଶନ କରି ମୋଟ ୫ଟି ପଦକ ଯାହା ମଧ୍ୟରେ ୩ଟି ସ୍ୱର୍ଣ୍ଣ, ୧ଟି ରୌପ୍ୟ ଓ ୧ଟି ବ୍ରୋଞ୍ଜ ପଦକ ଜିତିଛନ୍ତି। ଏହା ଭାରତକୁ ୨୪ଟି ପଦକ ସହ ଦ୍ୱିତୀୟ ସ୍ଥାନରେ ସ୍ଥାନିତ କରିଛି। ଯାହା ଚାମ୍ପିଅନସିପ ଇତିହାସରେ ଭାରତର ସର୍ବୋତ୍କୃଷ୍ଟ ପ୍ରଦର୍ଶନ। ଜ୍ୟୋତି ୟାରାଜି (୧୦୦ ମିଟର ହର୍ଡଲ), ଗୁଲବୀର ସିଂ (୫୦୦୦ ମିଟର ଓ ୧୦୦୦୦ ମିଟର) ସ୍ୱର୍ଣ୍ଣ ଜିତିଥିବା ବେଳେ ଆନ୍ସି ସୋଜାନ (ମହିଳା ଲଙ୍ଗ ଜମ୍ପ) ରୌପ୍ୟ ଏବଂ ଅନିମେଷଙ୍କ ବ୍ରୋଞ୍ଜ ଟିମର ସଫଳତାକୁ ପୂର୍ଣ୍ଣ କରିଛି।
ଗୁମିରେ ରିଲାଏନ୍ସ ଫାଉଣ୍ଡେସନ ଆଥଲେଟମାନଙ୍କର ଏହି ଗୁରୁତ୍ୱପୂର୍ଣ୍ଣ ସଫଳତା କ୍ରୀଡ଼ା ସଂସ୍କୃତିକୁ ପ୍ରୋତ୍ସାହନ ଦେବା ଏବଂ ଭାରତୀୟ ଯୁବକମାନଙ୍କୁ ବିଶ୍ୱ ସ୍ତରରେ ସେମାନଙ୍କର ପୂର୍ଣ୍ଣ ସାମର୍ଥ୍ୟ ପ୍ରଦର୍ଶନ କରିବା ପାଇଁ ସଶକ୍ତ କରିବାରେ ଏହାର ଦୃଷ୍ଟିକୋଣକୁ ପ୍ରମାଣ କରିଛି।
