ମୁମ୍ବାଇ ୧୫/୦୭: ବିଜ୍ନେସ ଟାଇକୁନ ମୁକେଶ ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନୀ ଏବଂ ରାଧିକାଙ୍କ ବିବାହ ଗତ ୧୨ ତାରିଖରେ ଶେଷ ହୋଇଛି । ନ୍ୟାସନାଲ ଏବଂ ଇଣ୍ଟରନ୍ୟାସନାଲ ଭିଭିଆଇପି ଅତିଥିଙ୍କୁ ଆତିଥ୍ୟ ଓ କୋଟି କୋଟି ଟଙ୍କା ଖର୍ଚ୍ଚ ଲାଗି ଏହି ବିବାହ ବେଶ୍ ଚର୍ଚ୍ଚିତ ଥିଲା । ସଦ୍ୟ ରିପୋର୍ଟ ଅନୁସାରେ, ଅନନ୍ତ ଅମ୍ବାନୀ ବିବାହ ଦିନ ନିଜ ୨୫ ନିକଟତମ ବନ୍ଧୁଙ୍କୁ ୧.୬୭ କୋଟି ଟଙ୍କାର ଗୋଟିଏ ଲେଖାଏ ଲକ୍ଜରୀ ଘଣ୍ଟା ଉପହାର ଦେଇଛନ୍ତି । ବରପକ୍ଷରେ ଶାହରୁଖ ଖାନ୍, ସଲମାନ ଖାନ୍, ରଣବୀର ସିଂ, ବୀର ପାହାଡ଼ିଆ, ମିଜାନ ଜାଫରୀ, ଶିଖର ପାହାଡ଼ିଆଙ୍କ ସମେତ ଅନନ୍ତଙ୍କ ୨୫ ଜଣ ବନ୍ଧୁ ବିବାହ ଉତ୍ସବରେ ବେଶ୍ ମସ୍ତି କରୁଥିବା ଦେଖିବାକୁ ମିଳିଥିଲା । ସେମାନଙ୍କୁ ଅନନ୍ତ ଏହି ସୁନା ଘଣ୍ଟା ଗିଫ୍ଟ କରିଛନ୍ତି ।
ଅଡେମାର୍ସ ପିଗ୍ୟୁଟ ବ୍ରାଣ୍ଡ୍ର ରୟାଲ ଓକ୍ ପରପେଚୁଆଲ କ୍ୟାଲେଣ୍ଡର ପ୍ରିମିୟର ୱାଚ୍ର ଲିମିଟେଡ୍ ଏଡିସନର ଏହି ଘଣ୍ଟା ୧୮ କ୍ୟାରେଟ ସୁନାରେ ତିଆରି ହୋଇଛି । ଏହାର ମୂଲ୍ୟ ପ୍ରାୟ ୧ କୋଟି ୬୭ ଲକ୍ଷ ଟଙ୍କା । ୯.୫ ଏମ୍ଏମ୍ ମୋଟା ଏହି ଘଣ୍ଟାରେ ୪୧ ଏମ୍ଏମ୍ର ୧୮ କ୍ୟାରେଟ ପିଙ୍କ୍ ଗୋଲ୍ଡ କେସ୍ ରହିଛି । ଏଥିରେ ଏକ ସାଫାୟାର କ୍ରିଷ୍ଟାଲ ବ୍ୟାକ୍ ଏବଂ ସ୍କ୍ରିଉ-ଲକ୍ଡ କ୍ରାଉନ ମଧ୍ୟ ଅଛି । ଜୁଲାଇ ୧୩ ଅର୍ଥାତ ଶନିବାର ଅନନ୍ତ-ରାଧିକା ଆଶୀର୍ବାଦ ଉତ୍ସବ ରଖିଥିଲେ । ରବିବାର ଉଭୟେ ରିସେପ୍ସନ ପାର୍ଟି ଦେଇଛନ୍ତି । ଏହି ଉତ୍ସବରେ ମଧ୍ୟ ଅନେକ ଅଭିନେତା, କ୍ରିକେଟର ଏବଂ ଅନ୍ୟ ସେଲିବ୍ରିଟିମାନେ ଯୋଗ ଦେଇଛନ୍ତି ।
