ଫୁଲବାଣୀ,୦୫/୧୨: ବୁଧବାର ବିଳମ୍ବିତ ରାତିରେ ସ୍ଥାନୀୟ ଫୁଲବାଣୀ ସାହିରେ ଥିବା ଏକ ଘରୋଇ ଫାଇନାନ୍ସ କମ୍ପାନୀ କାର୍ଯ୍ୟାଳୟରୁ ଲୁଟ୍ ଉଦ୍ୟମ ହୋଇଛି । ଦୁର୍ବୁତ୍ତଙ୍କ ସହ ଧସ୍ତାଧସ୍ତି ବେଳେ ଦୁଇ କର୍ମଚାରୀ ଆହତ ହୋଇଛନ୍ତି । ଆହତ ହୋଇଥିବା କର୍ମଚାରୀ ଦ୍ୱୟ ଶ୍ରୀକାନ୍ତ ପ୍ରଧାନ ଓ ଲିଖନ ମଲ୍ଲିକ ବୋଲି ଜଣା ପଡିଛି । ଏହି ଘଟଣାରେ ଜଣଙ୍କୁ ପେଲିସ ଅଟକ ରଖିଥିବା ବେଳେ ଅନ୍ୟ ଦୁଇ ଜଣ ଫେରାର ହୋଇ ଯାଇଛନ୍ତି । କନ୍ଧମାଳ ଜିଲ୍ଲା ଫୁଲବାଣୀ ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଅଧିକାରୀ ଫାଇନାନ୍ସ କମ୍ପାନୀର ତିନିଜଣ କର୍ମଚାରୀ ଦୁଇ ଲକ୍ଷରୁ ଉର୍ଦ୍ଧ୍ବ ଋଣ ଟଙ୍କା ଆଦାୟ କରି କାର୍ଯ୍ୟାଳୟରେ ବସି ଗଣତି କରୁଥିଲେ । ଏହି ସମୟରେ ହଠାତ୍ ତିନି ଜଣ ମୁଖାଧାରୀ ସେଠାରେ ପହଞ୍ଚି ଥିଲେ । ଜଣେ କାର୍ଯ୍ୟାଳୟ ବାହାରେ ଥିବା ବେଳେ ଅନ୍ୟ ଦୁଇଜଣ ଭିତରେ ପଶି କର୍ମଚାରୀଙ୍କ ମୁଣ୍ଡରେ ବନ୍ଧୁକ ଲଗାଇ ଟଙ୍କା ମାଗିଥିଲେ । କର୍ମଚାରୀମାନେ ଟଙ୍କା ନଦେବାରୁ ଦୁର୍ବୃତ୍ତଙ୍କ ସହ ଧସ୍ତାଧସ୍ତି ହୋଇଥିଲା । ଏଥିରେ ଦୁଇ କର୍ମଚାରୀ ଶ୍ରୀକାନ୍ତ ପ୍ରଧାନ ଓ ଲିଖନ ମଲ୍ଲିକ ଆହତ ହୋଇଥିଲେ । ଏହା ଦେଖି ସ୍ଥାନୀୟ ଲୋକେ ଜଣେ ଦୁର୍ବୃତ୍ତକୁ କାବୁ କରିବାରେ ସକ୍ଷମ ହୋଇଥିବା ବେଳେ ଅନ୍ୟ ଦୁଇଜଣ ଘଟଣା ସ୍ଥଳରୁ ଫେରାର ହୋଇ ଯାଇଥିଲେ । ପରେ ତୁରନ୍ତ ଏହି ଘଟଣା ସମ୍ପର୍କରେ ପୋଲିସକୁ ଖତବର ଦେଇଥିଲେ । ଖବର ପାଇ ଟାଉନ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ସେଠାରେ ପହଞ୍ଚି ଆହତଙ୍କୁ ଚିକିତ୍ସା କରାଇବା ସହ ଜଣେ ଦୁର୍ବୃତ୍ତକୁ ଥାନାରେ ଅଟକ ରଖି ପଚରାଉଚରା କରୁଛି ପୋଲିସ । ଘଟଣା ସ୍ଥଳରୁ ଗୋଟିଏ ରିଭଲଭର ଜବତ ହୋଇଛି । ତେବେ କେତେ ଟଙ୍କା ଲୁଟ୍ ହୋଇଛି, ସେ ନେଇ ସ୍ପଷ୍ଟ ସୂଚନା ମିଳି ପାରିନାହିଁ । ଏନେଇ ତଦନ୍ତ ଚାଲିଥିବା ଥାନା ଅଧିକାରୀ କନକ କୁମାର ମାଝୀ ସୂଚନା ଦେଇଛନ୍ତି ।
