ନୂଆଦିଲ୍ଲୀ: କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ନୂଆଦିଲ୍ଲୀରେ ଶନିବାର ଏକ ଉଚ୍ଚସ୍ତରୀୟ ବୈଠକର ଆୟୋଜନ କରିଥିଲେ। ଅମିତ ସାହ ଏହି ବୈଠକରେ ମଣିପୁରର ବର୍ତ୍ତମାନ ଆଇନକାନୁନ ପରିସ୍ଥିତି ସମ୍ପର୍କରେ ଅଧିକାରୀମାନଙ୍କ ସହ ଆଲୋଚନା କରିବା ପରେ ଆସନ୍ତା ମାର୍ଚ୍ଚ ୮ ତାରିଖ ସୁଦ୍ଧା ସମଗ୍ର ମଣିପୁରରେ ବିନା କଟକଣାରେ ଲୋକମାନଙ୍କ ଚଳପ୍ରଚଳ ପାଇଁ ଅନୁମତି ପ୍ରଦାନ କରିବାକୁ ଆଦେଶ ପ୍ରଦାନ କରିଛନ୍ତି। ଏହା ସହ ଯଦି କେହି ମଣିପୁରର ଶାନ୍ତିରେ ବାଧା ସୃଷ୍ଟି କରିବାକୁ ଚେଷ୍ଟା କରନ୍ତି ତେବେ ତାଙ୍କ ବିରୁଦ୍ଧରେ ତୁରନ୍ତ କାର୍ଯ୍ୟନୁଷ୍ଠାନ ଗ୍ରହଣ କରିବାକୁ ମଧ୍ୟ ସେ ଆଦେଶ ଦେଇଛନ୍ତି।
ଏହି ବୈଠକରେ ଯୋଗ ଦେଇ ଅମିତ ଶାହ କହିଛନ୍ତି ଯେ “ଆସନ୍ତା ମାର୍ଚ୍ଚ ୮ ତାରିଖରୁ ମଣିପୁରରେ ସମସ୍ତ ଲୋକମାନଙ୍କୁ ବିନା କଟକଣାରେ ଚଳପ୍ରଚଳ କରିବାକୁ ନିଶ୍ଚିନ୍ତ କରିବାକୁ ପଡିବ। ଏହାସହ ଯଦି କେହି ଶାନ୍ତି ଭଙ୍ଗ କରିବାକୁ ଚେଷ୍ଟା କରନ୍ତି ତେବେ, ତାଙ୍କ ଉପରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ଆବଶ୍ୟକତା ରହିଛି।” ସେ ଆହୁରି ମଧ୍ୟ କହିଛନ୍ତି ଯେ “କେନ୍ଦ୍ର ସରକାର ମଣିପୁରକୁ ଶାନ୍ତି ଫେରାଇ ଆଣିବାକୁ ପ୍ରତିଶ୍ରୁତିବଦ୍ଧ ରହିଛନ୍ତି। ଶାନ୍ତି ପ୍ରତିଷ୍ଠା ପାଇଁ ଯାହାବି ସହୟତା ଦରକାର କେନ୍ଦ୍ର ସରକାର ସମସ୍ତ ସହାୟତା ଯୋଗାଇ ଦେବେ।”
ସୀମା ସୁରକ୍ଷାକୁ ନେଇ ଅମିତ ଶାହ ଚିନ୍ତାବ୍ୟକ୍ତ କରିଛନ୍ତି। ସୀମାର ଉଭୟପଟେ ତୁରନ୍ତ ଫେନସିଂ କାମ ସାରି ମଣିପୁର ଆନ୍ତର୍ଜାତିୟ ପ୍ରବେଶ ପଥ ପାଇଁ ଜାଗା ନିର୍ଧାରଣ କରିବାକୁ ସେ ଅଧିକାରୀମାନଙ୍କୁ ଆଦେଶ ଦେଇଛନ୍ତି। ଏହାସହ ମଣିପୁର ଦେଇ ହେଉଥିବା ଅବୈଧ ଡ୍ରଗ କାରବାରକୁ ସମ୍ପୂର୍ଣ୍ଣ ବନ୍ଦ କରି ମଣିପୁରକୁ ଏକ ଡ୍ରଗମୁକ୍ତ ରାଜ୍ୟ ଭାବେ ଗଢିତୋଳିବା ପାଇଁ ସେ ଅଧିକାରୀମାନଙ୍କ ସହ କଥା ହୋଇଛନ୍ତି।
ନୂଆଦିଲ୍ଲୀରେ ଥିବା କେନ୍ଦ୍ର ଗୃହ ମନ୍ତ୍ରଣାଳୟ ଅଫିସରେ ଏହି ବୈଠକର ଆୟୋଜନ କରାଯାଇଥିଲା। ଏହି ବୈଠକରେ ଅନେକ ବରିଷ୍ଠ ଅଧିକାରୀଙ୍କ ସହ ମଣିପୁର ରାଜ୍ୟପାଳ ଅଜୟ କୁମାର ଭଲ୍ଲା, ମଣିପୁର ସରକାରଙ୍କ ଉଚ୍ଚସ୍ତରୀୟ ଅଧିକାରୀ, ଉଚ୍ଚସ୍ତରୀୟ ସେନା ଅଧିକାରୀ, ବରିଷ୍ଠ ପାରାମିଲିଟାରି ଅଧିକାରୀମାନେ ଏହି ବୈଠକରେ ଯୋଗଦାନ କରିଥିଲେ। ମଣିପୁରରେ ରାଷ୍ଟ୍ରପତି ଶାସନ ଜାରି ହବା ପରେ ମଣିପୁରର ସୁରକ୍ଷାକୁ ନେଇ ଏହା ଅମିତ ଶାହଙ୍କ ପ୍ରଥମ ମିଳିତ ବୈଠକ।
ତେବେ ମୁଖ୍ୟମନ୍ତ୍ରୀ ପଦରୁ ଏନ ବିରେନ୍ ସିଂ ଇସ୍ତଫା ଦେବା ପରେ ଗତ ଫେବୃୟାରି ୧୩ ତାରିଖରେ ମଣିପୁରରେ ରାଷ୍ଟ୍ରପତି ଶାସନ ଲାଗୁ କରାଯାଇଥିଲା। ରାଜ୍ୟ ବିଧାନସଭାର କାର୍ଯ୍ୟକାଳ ୨୦୨୭ ପର୍ଯ୍ୟନ୍ତ ରହିଥିବାବେଳେ, ବର୍ତ୍ତମାନ ତାହକୁ ରଦ୍ଧ କରିଦିଆଯାଇଛି।
