ମୁମ୍ବାଇ,୨।୩: ମୁମ୍ବାଇର ସ୍ୱତନ୍ତ୍ର ଦୁର୍ନୀତି ନିବାରଣ ଅଦାଲତ ଶନିବାର ଭାରତୀୟ ପ୍ରତିଭୂତି ଏବଂ ବିନିମୟ ବୋର୍ଡ (ସେବି)ର ପୂର୍ବତନ ଅଧ୍ୟକ୍ଷା ମାଧବୀ ପୁରୀ ବୁଚ ଏବଂ ସେବି ଏବଂ ବମ୍ବେ ଷ୍ଟକ୍ ଏକ୍ସଚେଞ୍ଜ (ବିଏସଇ)ର ଶୀର୍ଷ ଅଧିକାରୀଙ୍କ ବିରୁଦ୍ଧରେ ଏଫଆଇଆର ପଞ୍ଜିକରଣ କରିବାକୁ ନିର୍ଦ୍ଦେଶ ଦେଇଛନ୍ତି।

ସ୍ୱତନ୍ତ୍ର ବିଚାରପତି ଏସ୍.ଇ. ବାଙ୍ଗର ଏହି ନିର୍ଦ୍ଦେଶ ଥାନେ ସାମ୍ବାଦିକ ସପନ ଶ୍ରୀବାସ୍ତବଙ୍କ ଦ୍ୱାରା ଦାୟର ଆବେଦନ ଉପରେ ଦେଇଛନ୍ତି। ଆବେଦନକାରୀ ଅଭିଯୋଗ କରିଛନ୍ତି ଯେ ଏକ କମ୍ପାନୀର ତାଲିକାଭୁକ୍ତକରଣ ସମୟରେ ଏକ ବଡ଼ ଆର୍ଥିକ ଦୁର୍ନୀତି ହୋଇଥିଲା, ଯେଉଁଥିରେ ସେବି ଅଧିକାରୀଙ୍କ ଭୂମିକା ମଧ୍ୟ ସନ୍ଦେହଜନକ। ଅଭିଯୋଗକାରୀଙ୍କ ଅଭିଯୋଗ ଯେ ସେବି ଅଧିକାରୀମାନେ ସେମାନଙ୍କର ଆଇନଗତ ଦାୟିତ୍ୱ ନିର୍ବାହ କରିନାହାଁନ୍ତି,ବଜାର ହେରଫେରକୁ ଅନୁମତି ଦେଇଛନ୍ତି ଏବଂ ନିର୍ଦ୍ଧାରିତ ମାନଦଣ୍ଡ ପୂରଣ କରିନଥିବା ଏକ କମ୍ପାନୀର ତାଲିକାଭୁକ୍ତକରଣକୁ ଅନୁମୋଦନ କରିଛନ୍ତି। 

ଅଭିଯୋଗ କରାଯାଇଛି ଯେ ସେବିର ଅଧିକାରୀମାନେ ନିୟାମକ ମାନଦଣ୍ଡ ପୂରଣ କରୁନଥିବା ଏକ କମ୍ପାନୀର ତାଲିକାଭୁକ୍ତ କରିବାକୁ ଅନୁମତି ଦେଇଥିଲେ, ଯାହା ଫଳରେ ବଜାରରେ ହେରଫେର ଏବଂ ନିବେଶକମାନଙ୍କୁ କ୍ଷତି ସହିବାକୁ ପଡିଲା। ଏହା ସେବି ଏବଂ କର୍ପୋରେଟ୍ ସଂସ୍ଥାଗୁଡ଼ିକ ମଧ୍ୟରେ ପ୍ଲାନିଂ ଥିଲା। ଇନସାଇଡର ଟ୍ରେଡିଂ ଓ ଲିଷ୍ଟିଂ ପରେ ସାର୍ବଜନୀକ ଧନ ହେରଫେରର ମଧ୍ୟ ଅଭିଯୋଗ ରହିଛି। ଅଭିଯୋଗରେ ପକ୍ଷଭୁକ୍ତ ହୋଇଥିବା ବ୍ୟକ୍ତିଙ୍କ ମଧ୍ୟରେ ପୂର୍ବତନ SEBI ଅଧ୍ୟକ୍ଷା ମାଧବୀ ପୁରୀ ବୁଚ, ପୂର୍ଣ୍ଣକାଳୀନ ସଦସ୍ୟ ଅଶ୍ୱନୀ ଭାଟିଆ, ଆନନ୍ଦ ନାରାୟଣ ଜି ଏବଂ କମଲେଶ ଚନ୍ଦ୍ର ବର୍ଷ୍ନେୟ, BSE ଅଧ୍ୟକ୍ଷ ପ୍ରମୋଦ ଅଗ୍ରୱାଲ ଏବଂ ସିଇଓ ସୁନ୍ଦରରମଣ ରାମମୂର୍ତ୍ତି ଅନ୍ତର୍ଭୁକ୍ତ। ତଥାପି, ଶୁଣାଣି ସମୟରେ ସେମାନଙ୍କ ମଧ୍ୟରୁ କେହି କୋର୍ଟରେ ହାଜର ହୋଇ ନଥିଲେ।

ମହାରାଷ୍ଟ୍ର ସରକାରଙ୍କ ପକ୍ଷରୁ ଅତିରିକ୍ତ ସରକାରୀ ଓକିଲ ପ୍ରଭାକର ତରଙ୍ଗେ ଏବଂ ରାଜଲକ୍ଷ୍ମୀ ଭଣ୍ଡାରୀ କୋର୍ଟରେ ସେମାନଙ୍କ ପକ୍ଷ ଉପସ୍ଥାପନ କରିଥିଲେ। ଜଷ୍ଟିସ୍ ବାଙ୍ଗର ଅଭିଯୋଗ ଏବଂ ଏହା ସହିତ ସଂଲଗ୍ନ କାଗଜପତ୍ର ସମୀକ୍ଷା କରିବା ପରେ,  ଅପରାଧର ପ୍ରାଥମିକ ପ୍ରମାଣ ପାଇଲେ ଏବଂ ଭାରତୀୟ ଦଣ୍ଡ ସଂହିତା, ଦୁର୍ନୀତି ନିବାରଣ ଆଇନ ଏବଂ ସେବି ଆଇନର ପ୍ରାସଙ୍ଗିକ ଧାରା ଅନୁଯାୟୀ ଏକ ଏଫଆଇଆର ପଞ୍ଜିକରଣ କରିବାକୁ ମୁମ୍ବାଇ ଦୁର୍ନୀତି ନିବାରଣ ବ୍ୟୁରୋ (ଏସିବି)କୁ ନିର୍ଦ୍ଦେଶ ଦେଇଛନ୍ତି। କୋର୍ଟ କହିଛନ୍ତି, ଅଭିଯୋଗଗୁଡ଼ିକର  ନିରପେକ୍ଷ ଏବଂ ସ୍ୱାଧୀନ ତଦନ୍ତ ଆବଶ୍ୟକ। ଆଇନ ପ୍ରବର୍ତ୍ତନ ସଂସ୍ଥା ଏବଂ ସେବିର ନିଷ୍କ୍ରିୟତା ଯୋଗୁଁ ନ୍ୟାୟିକ ହସ୍ତକ୍ଷେପ ଜରୁରୀ ହୋଇପଡ଼ିଛି। ACBକୁ 30 ଦିନ ମଧ୍ୟରେ ରିପୋର୍ଟ ଦାଖଲ କରିବାକୁ ପଡିବ।