ନୂଆଦିଲ୍ଲୀ,୨୪/୦୧: ଦିଲ୍ଲୀ ବିଧାନସଭା ନିର୍ବାଚନକୁ ନେଇ ସରଗରମ ରାଜନୀତି । ଏହାରି ମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ଉପରୁ ସୁରକ୍ଷା ବ୍ୟବସ୍ଥାକୁ ହଟାଇଛି ପଞ୍ଜାବ ପୋଲିସ । ତେବେ ଦିଲ୍ଲୀ ପୋଲିସ କେଜରିୱାଲଙ୍କୁ ‘ଜେଡ୍ ପ୍ଲସ୍’ ସୁରକ୍ଷା ଦେଉଥିବା ନେଇ ପଞ୍ଜାବ ପୋଲିସକୁ ପତ୍ର ଲେଖି ଦିଲ୍ଲୀ ପୋଲିସ୍ ଜଣାଇ ଦେଇଛି। ଯାହାକୁ ନେଇ କେଜରିୱାଲଙ୍କୁ ପଞ୍ଜାବ ପୋଲିସ ପକ୍ଷରୁ ମିଳୁଥିବା ସୁରକ୍ଷା ହଟାଇ ଦିଆଯାଇଛି।
ଏନେଇ ଜଣେ ପୋଲିସ ଅଧିକାରୀ କହିଛନ୍ତି ଯେ, ଦିଲ୍ଲୀ ପୋଲିସ ଅନେକ ପୂର୍ବରୁ କେଜରିୱାଲଙ୍କୁ ଜେଡ୍ ପ୍ଲସ୍ ସୁରକ୍ଷା ଦେଇଛି। ଏଣୁ ତାଙ୍କ ସୁରକ୍ଷାରେ ପଞ୍ଜାବ ପୋଲିସ ଜବାନଙ୍କ କୌଣସି ଆବଶ୍ୟକତା ନାହିଁ। ଅଧିକାରୀ କହିଛନ୍ତି ଯେ ଦିଲ୍ଲୀ ପୋଲିସ ପଞ୍ଜାବ ପୋଲିସ ପକ୍ଷରୁ କେଜରିୱାଲଙ୍କୁ ଦିଆଯାଇଥିବା ସ୍ୱତନ୍ତ୍ର ସୁରକ୍ଷାକୁ ହଟାଇ ଦିଆଯାଇଛି। ଏ ନେଇ ପଞ୍ଜାବ ପୋଲିସ ଅଧିକାରୀଙ୍କୁ ସୂଚିତ କରିଦିଆଯାଇଛି।
ଅଧିକାରୀ କହିଛନ୍ତି ଯେ, ଗତ ସପ୍ତାହରେ ଦିଲ୍ଲୀ ପୋଲିସ ପତ୍ର ଲେଖି ପଞ୍ଜାବ ପୋଲିସକୁ ସୂଚନା ଦେଇଛି ଯେ ଯଦି ପଞ୍ଜାବରୁ କୌଣସି ଭିଆଇପି ଅଥବା ଏପରି କୌଣସି ବ୍ୟକ୍ତି ଦିଲ୍ଲୀ ଆସୁଛନ୍ତି ଯାହାଙ୍କୁ ସୁରକ୍ଷା ମିଳିବା ଉଚିତ୍। ତେବେ ପଞ୍ଜାବ ପୋଲିସ ଏହାର ସୂଚନା ଦିଲ୍ଲୀ ପୋଲିସକୁ ଦେବ। ଏହା ଦ୍ୱାରା ଦିଲ୍ଲୀ ପୋଲିସ ସେହି ଭିଆଇପିଙ୍କୁ ମିଳିଥିବା ଧମକ ଅଥବା ତାଙ୍କ ପଦବୀକୁ ଦେଖି କଡା ସୁରକ୍ଷାର ବ୍ୟବସ୍ଥା କରିବ। ତେବେ ଇଣ୍ଟେଲିଜେନ୍ସି ବ୍ୟୁରୋ କେଜରିୱାଲଙ୍କ ଜୀବନ ପ୍ରତି ବିପଦ ଥିବା ନେଇ ଦିଲ୍ଲୀ ପୋଲିସକୁ ଇନପୁଟ୍ ଦେଇଥିଲେ। ଗୁଇନ୍ଦା ରିପୋର୍ଟରେ କୁହାଯାଇଥିଲା ଖାଲିସ୍ତାନୀ ତତ୍ୱ ତାଙ୍କ ଉପରେ ଆକ୍ରମଣ କରିପାରନ୍ତି। ଏଥିପାଇ କେନ୍ଦ୍ର ଗୃହମନ୍ତ୍ରାଳୟ ଗତ ଦିନରେ ଦିଲ୍ଲୀ ପୋଲିସକୁ ଆଲର୍ଟ ମଧ୍ୟ କରିଥିଲା। ସେପଟେ ଏନେଇ କେଜରିୱାଲ ଦିଲ୍ଲୀ ବିଜେପିକୁ ଟାର୍ଗେଟ କରିଥିବା ଜଣାପଡ଼ିଛି।
