ନୂଆଦିଲ୍ଲୀ, ୨୪/୦୧ : ତାଜମହଲରେ ତିନି ଦିନ ଫ୍ରି ଏଣ୍ଟ୍ରି। ଜାନୁଆରୀ ୨୬ ରୁ ୨୮ ଯାଏଁ ତାଜମହଲରେ ନିଃଶୁଳ୍କରେ କରିପାରିବେ ପ୍ରବେଶ। ମୋଗଲ ବାଦଶାହା ଶାହାଜାହାନଙ୍କ ୩୭୦ତମ ମୃତ୍ୟୁ ବାର୍ଷିକୀ ଅବସରରେ ପର୍ଯ୍ୟଟକଙ୍କ ପାଇଁ ଏହି ଘୋଷଣା କରାଯାଇଛି। ଏହି ତିନି ଦିନ ଶାହାଜାହାନ ଏବଂ ମୁମତାଜଙ୍କ କବର ଦେଖିବାକୁ ମଧ୍ୟ ସୁଯୋଗ ମିଳିବ। ଜାନୁଆରୀ ୨୬ ତାରିଖ ଦିନ ୨ଟାରୁ ତାଜମହଲର ବେସ୍ମେଣ୍ଟ ଖୋଲି ଦିଆଯିବ। ମୁସଲିମ୍ ରୀତିନୀତି ଅନୁସାରେ କବରରେ ଚାଦରପୋସି କରାଯିବ। ସେହିପରି ୨୮ ତାରିଖ ସକାଳୁ ସନ୍ଧ୍ୟା ଯାଏଁ ପର୍ଯ୍ୟଟକମାନେ ବେସମେଣ୍ଟକୁ ଯାଇ କବର ଦେଖିପାରିବେ।
ଏହି ଖବରଟିକୁ ପଢନ୍ତୁ-ଏବେ ଗୋଟିଏ ପ୍ଲାଟଫର୍ମରେ ମିଳିବ ସବୁ ସୁବିଧା, ଗୁଗୁଲ ଏବଂ ଆପଲ୍କୁ ପତ୍ର ଲେଖିଲେ ସରକାର
ପ୍ରତିବର୍ଷ ଏହି ସମୟରେ ବହୁ ସଂଖ୍ୟାରେ ପର୍ଯ୍ୟଟକ ଆସନ୍ତି। ତେଣୁ ଏହି ୩ ଦିନ ତାଜମହଲରେ ବହୁ ପର୍ଯ୍ୟଟକଙ୍କ ସମାଙ୍ଗମ ହେବାର ସମ୍ଭାବନା ରହିଛି। ସୁରକ୍ଷା ଦୃଷ୍ଟିରୁ ଅତିରିକ୍ତ ଫୋର୍ସ ନିୟୋଜିତ କରାଯାଇଛି। ସବୁ ଏଣ୍ଟ୍ରି ଗେଟ୍ରେ ସିସିଟିଭି କ୍ୟାମେରା ଏବଂ ମେଟାଲ୍ ଡିଟେକ୍ଟର ଲଗାଯାଇଛି। ସେହିପରି ଆଖପାଖ ହୋଟେଲ ଏବଂ ଗାଇଡ୍ଙ୍କ ପାଖରେ ବୁକିଂ ବଢିଲାଣି। ଏହାଦ୍ଵାରା ସ୍ଥାନୀୟ ବେପାରୀଙ୍କ ବ୍ୟବସାୟ ବଢିବ ବୋଲି ମଧ୍ୟ ଆଶା କରାଯାଉଛି।
ସେପଟେ ସ୍ଵଚ୍ଛତା ଦୃଷ୍ଟିରୁ ଏଏସଆଇ ପକ୍ଷରୁ ତାଜମହଲର ଭିତର ଏବଂ ବାହାର ରକ୍ଷଣାବେକ୍ଷଣା ଉପରେ ସ୍ଵତନ୍ତ୍ର ଧ୍ୟାନ ଦିଆଯାଇଛି। ତାଜମହଲ ଭିତରେ ଉର୍ସ ସୁଚାରୁ ରୂପେ କରିବା ପାଇଁ ବିଭିନ୍ନ ସ୍ଥାନରେ ଗାଇଡ୍ ଏବଂ ସୁରକ୍ଷା ଅଧିକାରୀଙ୍କୁ ନିୟୋଜିତ କରାଯାଇଛି। ଏତଦ୍ ବ୍ୟତୀତ ପର୍ଯ୍ୟଟକମାନେ କିଭଳି ଏହି ଐତିହାସିକ ସ୍ଥାନକୁ ବୁଲିପାରିବେ ସେଥିପ୍ରତି ଦୃଷ୍ଟି ଦିଆଯାଇଛି।
