ମୁମ୍ବାଇ,୨୪।୧: ଅଭିନେତା ସୈଫ ଅଲ୍ଲୀ ଖାନ୍ଙ୍କ ଉପରେ ଆକ୍ରମଣ ଘଟଣାରେ ଗିରଫ ହୋଇଛନ୍ତି ବାଂଲାଦେଶୀ ନାଗରିକ। ଶରିଫୁଲା ଇସ୍ଲାମ ଶହଜାଦ ଏବେ ପୋଲିସ ହେପାଜତରେ ଅଛି। ହେଲେ ସେପେଟ ଶରିଫୁଲାର ବାପା ରହୁଲ ଅମିନ ଫକିରଙ୍କର ଏହି ଘଟଣା ନେଇ ଆସିଛି ବୟାନ। ସେ କହିଛନ୍ତି, ତାଙ୍କ ପୁଅ ନିର୍ଦୋଷୀ। ସେ ଆକ୍ରମଣକାରୀ ଭଳି ଦେଖାଯାଉଥିବାରୁ ତାକୁ ଗିରଫ କରାଯାଇଛି। ରହୁଲ ଅମିନ ସାହାଯ୍ୟ ପାଇଁ ବାଂଲାଦେଶ ସରକାରଙ୍କୁ ଗୁହାରୀ କରିଛନ୍ତି।
ଏଏନ୍ଆଇର ଏକ ରିପୋର୍ଟ ଅନୁସାରେ, ରହୁଲ ଅମିନ କହିଛନ୍ତି ମୋତେ ଏସବୁ ୟୁଟ୍ୟୁବ ଚ୍ୟାନେଲ ଓ ସାମ୍ବାଦିକଙ୍କ ସହ ଫୋନ୍ ଜରିଆରେ ଜଣାପଡିଛି। ଭାରତରେ ମୋ ପୁଅକୁ ଗିରଫ କରାଯାଇଛି। ମୋ ପୁଅକୁ ଏଥିପାଇଁ ଗିରଫ କରାଯାଇଛି, କାରଣ ତା’ର ମୁହଁ ଆକ୍ରମଣକାରୀ ଭଳି ମିଶୁଛି। ମୋ ପୁଅ ନିର୍ଦୋଷୀ। ମୁଁ ଏବେ ୩-୪ ଦିନ ପରେ ବାଂଲାଦେଶର ବୈଦେଶିକ ମନ୍ତ୍ରଣାଳୟ ଯିବ ଓ ତାଙ୍କୁ ମୋ ପୁଅକୁ ଛଡାଇବାକୁ ଗୁହାରୀ କରିବି। ରହୁଲ ଅମିନ କହିଛନ୍ତି, ତାଙ୍କ ପୁଅ ୬-୭ ମାସ ପୂର୍ବରୁ ହିଁ ଭାରତ ଯାଇଥିଲା। ଏତେ କମ୍ ସମୟରେ ଏତେ ବଡ଼ ଲୋକଙ୍କ ଘରେ କିଭଳି ସେ ପଶିପାରିବ ?
ରହୁଲ ଅମିନ ନିଜ ପୁଅ ବାଂଲାଦେଶ କାହିଁକି ଛାଡିଛି ସେ ନେଇ ମଧ୍ୟ କହିଛନ୍ତି। ସେ କହିଛନ୍ତି, ମୋର ପରିବାର ଖାଲିଦା ଜିୟାଙ୍କ ବାଂଲାଦେଶ ନ୍ୟାସନାଲ ପାର୍ଟି ସହ ଜଡିତ। ଶେଖ ହାସିନାଙ୍କୁ କ୍ଷମତାକୁ ଆସିବା ପରେ ଆମକୁ ନିର୍ଯାତିତ କରାଯାଇଥିଲା। ମୋର ପୁଅ ଖାଲିଦା ଜିୟାଙ୍କ ବହୁତ ବଡ଼ ସମର୍ଥକ ଥିଲା, ତେଣୁ ତାକୁ ଆହୁରି ଅଧିକ ନିର୍ଯାତିତ କରାଯାଇଥିଲା। ଏଥିରେ ସେ ଅତିଷ୍ଟ ହୋଇ ବାଂଲାଦେଶ ଛାଡି ଭାରତ ଯିବାକୁ ଯୋଜନା କରିଥିଲା। ଶରିଫୁଲାର ଭୁଲ ଏହା ଯେ, ସେ ବେଆଇନ ଭାବରେ ଭାରତରେ ପ୍ରବେଶ କରିଥିଲା। ସିସିଟିଭିରେ ଯାହାକୁ ଦେଖାଯାଉଛି ତା’ର ଲମ୍ବା କେଶ ଅଛି, ମୋ ପୁଅ କେବେ ବଡ଼ ଚୁଟି ରଖିବାକୁ ପସନ୍ଦ କରେନି। ଉଲ୍ଲେଖନୀୟ ଯେ, ଗତ ୧୬ ଜାନୁଆରୀ ଭୋର ସମୟରେ ସୈଫ ଅଲ୍ଲୀ ଖାନ୍ଙ୍କ ଘରେ ପଶି ଶରିଫୁଲା ତାଙ୍କୁ ଛୁରାମାଡ଼ କରିଥିଲା। ଏହି ଆକ୍ରମଣରେ ସୈଫ୍ ଗୁରୁତର ଆହତ ହୋଇଥିଲେ। ତାଙ୍କ ମେରୁଦଣ୍ଡ ହାଡରେ ଛୁରୀ ଫଶି ଯାଇଥିଲା। ଲୀଳାବତି ହସ୍ପିଟାଲରେ ସର୍ଜରୀ ପରେ ୫ ଦିନ ରହିବା ପରେ ଘରକୁ ଫେରିଛନ୍ତି ସୈଫ୍।
