ଶିମଲା: ହିମାଚଳ ପ୍ରଦେଶରେ ଗଞ୍ଜେଇ ଚାଷ ଲାଗି ସରକାର ଅନୁମତି ଦେଇଛନ୍ତି । ଶୁକ୍ରବାର ଆୟୋଜିତ ରାଜ୍ୟ କ୍ୟାବିନେଟ୍ ବୈଠକରେ ଗଞ୍ଜେଇ ଚାଷକୁ ଅନୁମତି ମିଳିଛି । ଏଥିପାଇଁ ହର୍ଟିକଲ୍ଚର ୟୁନିଭର୍ସିଟି ଏବଂ ପାଲମର କୃଷି ବିଶ୍ବବିଦ୍ୟାଳୟକୁ ୬ ମାସ ମଧ୍ୟରେ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି ସରକାର । ହିମାଚଳ ପ୍ରଦେଶରେ ଚାଷ ହେବାକୁ ଥିବା ଗଞ୍ଜେଇ ଔଷଧ ଏବଂ ଶିଳ୍ପ ଲାଗି ବ୍ୟବହୃତ ହେବ ।
୨୬ ଏପ୍ରିଲ ୨୦୨୩ରେ ରାଜ୍ୟ ସରକାର ଗଞ୍ଜେଇ ଚାଷକୁ ଆଇନସମ୍ମତ କରିବାକୁ ୧୦ ଜଣିଆ କମିଟି ଗଠନ କରିଥିଲେ । ନିୟନ୍ତ୍ରିତ ପରିବେଶରେ ଶିଳ୍ପ,ବିଜ୍ଞାନ ଏବଂ ଔଷଧୀୟ ଉଦ୍ଦେଶ୍ୟରେ ଗଞ୍ଜେଇ ଚାଷକୁ ଅନୁମତି ଦେବା ଉପରେ ୧୦ ସଦସ୍ୟ ବିଶିଷ୍ଟ କମିଟି ରିପୋର୍ଟ ଉପସ୍ଥାପନ କରିଛି । ରାଜସ୍ୱ ମନ୍ତ୍ରୀ ଜଗତ ସିଂ ନେଗିଙ୍କ ନେତୃତ୍ୱରେ ଗଠିତ କମିଟି ଗଞ୍ଜେଇ ଚାଷକୁ ବୈଧ କରିବା ଲାଗି ଗୁରୁତ୍ୱପୂର୍ଣ୍ଣ ସୁପାରିଶ କରିଥିଲେ ।
ହିମାଚଳ ପ୍ରଦେଶର ସୁଖବିନ୍ଦର ସିଂହ ସୁଖୁ ସରକାର ଗଞ୍ଜେଇ ଚାଷକୁ ଅନୁମତି ଦେବା ପରେ ଚର୍ଚ୍ଚା ଆରମ୍ଭ ହୋଇଯାଇଛି । ସୂଚନାଯୋଗ୍ୟ, ଉତ୍ତରାଖଣ୍ଡ ଏବଂ ମଧ୍ୟ ପ୍ରଦେଶରେ ଗଞ୍ଜେଇ ଚାଷ ଆଇନସମ୍ମତ ଥିଲା । ଏବେ ଏହି ତାଲିକାରେ ଯୋଡ଼ି ହୋଇଛି ହିମାଚଳ ପ୍ରଦେଶ । ଯଦିଓ ହିମାଚଳ ସରକାର ଗଞ୍ଜେଇ ଚାଷକୁ ଅନୁମତି ଦେଇଛନ୍ତି କିନ୍ତୁ ଏଥିପାଇଁ ସର୍ତ୍ତ ରଖିଛନ୍ତି । କେବଳ ଔଷଧ ଏବଂ ଶିଳ୍ପ କ୍ଷେତ୍ରରେ ବ୍ୟବହାର ପାଇଁ ଏହି ଗଞ୍ଜେଇର ବ୍ୟବହାର କରାଯିବ ।
