ନୂଆଦିଲ୍ଲୀ,୨୪।୧: ଜେପିସି ବୈଠକରେ ପ୍ରବଳ ହଙ୍ଗମା। ୧୦ ସାଂସଦ ନିଲମ୍ବିତ। ଓ୍ବାକଫ୍ ସଂଶୋଧନ ବିଲ୍ ଉପରେ ଗଠିତ ବୈଠକରେ ଦେଖିବାକୁ ମିଳିଛି ଏହି ବିବାଦ। ଶେଷରେ ଏହା ଏତେ ବଢିଯାଇଥିଲା ଯେ, ମାର୍ଶଲଙ୍କୁ ଡାକିବାକୁ ପଡିଥିଲା। ଅସଦୁଦ୍ଧିନ୍ ଓଓ୍ବେସୀ ଓ କଲ୍ୟାଣ ବାନାର୍ଜୀଙ୍କ ସମେତ ୧୦ ଜଣ ବିରୋଧି ସାଂସଦଙ୍କୁ ଜେପିସି ସଦସ୍ୟତାରୁ ଦିନକ ପାଇଁ ନିଲମ୍ବିତ କରାଯାଇଛି।
ଓ୍ବାକଫ୍ ସଂଶୋଧନ ବିଲ୍ ଉପରେ ସଂସଦୀୟ କମିଟିର ବୈଠକରେ ଜୋରସାର ହଙ୍ଗାମା। ଅସଦୁଦ୍ଧିନ୍ ଓଓ୍ବେସୀ ଓ କଲ୍ୟାଣ ବାନାର୍ଜୀଙ୍କ ସମେତ ୧୦ ବିରୋଧି ଦଳ ସାଂସଦଙ୍କୁ ଦିନକ ପାଇଁ ନିଲମ୍ବିତ କରାଯାଇଛି। ବିରୋଧି ସାଂସଦଙ୍କ ଅଭିଯୋଗ ଯେ, ତାଙ୍କର କୌଣସି କଥାକୁ ଶୁଣାଯାଉ ନାହିଁ। ଶେଷରେ ହଙ୍ଗାମା ଏତେ ଅଧିକ ବଢିଯାଇଥିଲା ଯେ, ମାର୍ଶଲଙ୍କୁ ଡାକିବାକୁ ପଡିଥିଲା। ଯେଉଁ ସାଂସଦଙ୍କୁ ନିଲମ୍ବିତ କରାଯାଇଛି ସେମାନେ ହେଲେ ଅସଦୁଦ୍ଧିନ୍ ଓଓ୍ବେସୀ, ଇମ୍ରାନ୍ ମସୁଦ, କଲ୍ୟାଣ ବାନାର୍ଜୀ, ଅରବିନ୍ଦ ସାଓ୍ବନ୍ତ, ନାସିର ହୁସେନ, ଏ.ରାଜା, ମୋହିବୁଲ୍ଲାହ ନଦଭି, ଏମଏମ୍ ଅବଦୁଲ୍ଲା, ନଦିମୁଲ ହକ୍, ମହମ୍ମଦ ଜାଭେଦ। ଏହା ପ୍ରଥମ ଥର ନୁହେଁ ଯେତେବେଳେ ଜେପିସି ବୈଠକରେ ହଙ୍ଗାମା ହୋଇଛି। ଏହା ପର୍ବରୁ ମଧ୍ୟ ଏହି ବୈଠକରେ ହଙ୍ଗାମା ହୋଇସାରିଛି। କମିଟି ସଦସ୍ୟମାନଙ୍କର ଦାବି ଥିଲା ରିପୋର୍ଟ ଗ୍ରହଣ କରିବାର ତାରିଖ ୩୧ ଜାନୁଆରୀ ସ୍ଥିର କରାଯାଉ। କମିଟି ରିପୋର୍ଟ ପ୍ରସ୍ତୁତ କରିବା ପୂର୍ବରୁ ସଂଶୋଧନ ଉପରେ ଆଲୋଚନା ପାଇଁ ଜାନୁଆରୀ ୨୪ ଏବଂ ୨୫ ତାରିଖ ସ୍ଥିର କରାଯାଇଥିଲା। କିନ୍ତୁ ଗୁରୁବାର ବିଳମ୍ବିତ ରାତିରେ ତାରିଖକୁ ୨୭ ଜାନୁଆରୀକୁ ପରିବର୍ତ୍ତନ କରାଯାଇଥିଲା। ଫଳରେ ବିରୋଧି ଦଳର ସାଂସଦ କରିଥିଲେ ପ୍ରବଳ ହଙ୍ଗାମା।
ବିଜେପି ସାଂସଦ ଜଗଦମ୍ବିକା ପାଲ୍ଙ୍କ ଅଧ୍ୟକ୍ଷତାରେ ଗଠିତ ପ୍ୟାନେଲରେ ୨୧ ଲୋକସଭା ଓ ୧୦ ରାଜ୍ୟସଭାରୁ ସାଂସଦ ରହିଛନ୍ତି। ତାଙ୍କ ଭିତରେ ମୋଟ୧୩ ଜଣ ବିରୋଧି ଦଳ ସାଂସଦ ରହିଛନ୍ତି। ଭାରତରେ ପ୍ରାୟ ୩୦ ଓ୍ବାକଫ୍ ବୋର୍ଡ ରହିଛି। ଯାହାର ୯ ଲକ୍ଷ ଏକରରୁ ଅଧିକ ଜମି ଉପରେ ଥିବା ସମ୍ପତ୍ତିର ପରିଚାଳନନା କରିଥାଏ। ଏହାର ଆନୁମାନିକ ମୂଲ୍ୟ ୧.୨ ଲକ୍ଷ କୋଟି। ଭାରତୀୟ ରେଲଓ୍ବେ ଏବଂ ପ୍ରତିରକ୍ଷା ମନ୍ତ୍ରଣାଳୟ ପରେ ଦେଶରେ ସବୁଠାରୁ ଅଧିକ ଜମି ଓ୍ବାକଫ୍ ବୋର୍ଡ ନିକଟରେ ରହିଛି। ଏହି ବିଲ୍ ଉପରେ ଗତ ବର୍ଷ ଅଗଷ୍ଟରେ ବୈଠକ ବସିଥିଲା। ଆଗକୁ କମିଟି ଆଗାମୀ ବଜେଟ ଅଧିବେଶନରେ ଏହାର ୫୦୦ ପୃଷ୍ଠାର ରିପୋର୍ଟ ଉପସ୍ଥାପନ କରିପାରେ।
