ନୂଆଦିଲ୍ଲୀ,୨୪/୦୧: ୨୦୨୫-୨୬ ଆର୍ଥିକବର୍ଷ ପାଇଁ ଆସନ୍ତା ଫେବୃଆରୀ ୧ରେ ସାଧାରଣ ବଜେଟ୍କୁ ଉପସ୍ଥାପନ କରିବେ ଅର୍ଥମନ୍ତ୍ରୀ ନିର୍ମଳା ସୀତାରମଣ । ଏ ବଜେଟ୍କୁ ନେଇ ଆଶା ବାନ୍ଧି ବସିଛନ୍ତି ଅନେକ। ଆସନ୍ତା ଆର୍ଥିକବର୍ଷ ଆରମ୍ଭରୁ ପ୍ରସ୍ତାବିତ ୪ ଶ୍ରମ କୋଡ୍କୁ ଧୀରେ ଧୀରେ କାର୍ଯ୍ୟକାରୀ କରିବା ପାଇଁ ଆଗାମୀ ବଜେଟ୍ରେ ଏକ ରଣନୀତି ଆଣିପାରନ୍ତି କେନ୍ଦ୍ର ସରକାର । ବଡ଼ ବଡ଼ ପ୍ରତିଷ୍ଠାନଗୁଡ଼ିକୁ ଏଥିରେ ପ୍ରାଥମିକତା ଦିଆଯାଇପାରେ । ସରକାରୀ ସୂତ୍ରରୁ ଜଣାପଡ଼ିଛି ଯେ, ୩-ପର୍ଯ୍ୟାୟ ନିୟୋଜନ ସହିତ କେତେକ କାର୍ଯ୍ୟାନ୍ୱୟନ ବିକଳ୍ପ ଉପରେ ବିଚାର ଚାଲିଛି । ପ୍ରଥମ ବର୍ଷରେ ୫୦୦ରୁ ଅଧିକ କର୍ମଚାରୀ ଥିବା ବଡ଼ କମ୍ପାନିଗୁଡ଼ିକୁ ଆଇନ ଅନୁପାଳନ କରିବାକୁ ପଡ଼ିପାରେ । ଏହା ପରେ ଦ୍ୱିତୀୟ ବର୍ଷରେ ୧୦୦ରୁ ୫୦୦ କର୍ମଚାରୀବିଶିଷ୍ଟ ମଧ୍ୟମ ଧରଣ ସଂସ୍ଥାଗୁଡ଼ିକ ଆଇନ ପରିସରକୁ ଆସିବେ ।
ତୃତୀୟ ବର୍ଷରେ ୧୦୦ ପର୍ଯ୍ୟନ୍ତ କର୍ମଚାରୀ ଥିବା କ୍ଷୁଦ୍ର କମ୍ପାନିଗୁଡ଼ିକ ଆଇନ ପରିସରକୁ ଆସିପାରନ୍ତି । ଏହି ବ୍ୟବସ୍ଥା ଦ୍ୱାରା ଭାରତୀୟ ବ୍ୟବସାୟ କ୍ଷେତ୍ରରେ ୮୫% ଯୋଗଦାନ ରଖୁଥିବା କ୍ଷୁଦ୍ର କମ୍ପାନିଗୁଡ଼ିକୁ କୋଡ୍ ସହ ଅନୁପାଳିତ ହେବା ପାଇଁ ଦୁଇ ବର୍ଷ ସମୟ ମିଳିବ । ଏହି କୋଡ୍କୁ ନେଇ ଚିଠା ନୀତି ପ୍ରସ୍ତୁତ କରିବା ପାଇଁ ଶ୍ରମ ମନ୍ତ୍ରାଳୟ ପଶ୍ଚିମବଙ୍ଗ ଏବଂ ଦିଲ୍ଲୀ ପ୍ରଶାସନ ସହ ଆଲୋଚନା କରୁଥିବା ଜଣାପଡ଼ିଛି । ଚିଠା ନୀତି ପ୍ରସ୍ତୁତି ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ଶ୍ରମ ମନ୍ତ୍ରାଳୟର ବରିଷ୍ଠ ଅଧିକାରୀମାନେ ଉଭୟ ରାଷ୍ଟ୍ରର ମୁଖ୍ୟ ଶାସନ ସଚିବମାନଙ୍କ ସହ ଆଲୋଚନା ଆରମ୍ଭ କରିଛନ୍ତି । ୪ଟି ଯାକ କୋଡ୍ର ଚିଠାନୀତିକୁ ନେଇ ସମସ୍ତ ରାଜ୍ୟ ଚଳିତ ଆର୍ଥିକବର୍ଷ ଶେଷ ସୁଦ୍ଧା ପ୍ରସ୍ତୁତ ହୋଇଯିବେ ବୋଲି ଶ୍ରମ ମନ୍ତ୍ରାଳୟ ଆଶାବାଦୀ ରହିଛି । ସୂଚନାଯୋଗ୍ୟ, ସାମଗ୍ରିକ ସାମାଜିକ ସୁରକ୍ଷା ପାଇଁ ବ୍ୟବସାଗୁଡ଼ିକର କାରବାର ଦକ୍ଷତା ବୃଦ୍ଧି ଏବଂ ଅଗ୍ରଗତି ପାଇଁ ଶ୍ରମ ମନ୍ତ୍ରାଳୟ ୨୯ଟି କେନ୍ଦ୍ରୀୟ ଶ୍ରମ ଆଇନକୁ ମିଶାଇ ୪ଟି ଶ୍ରମ କୋଡ୍କୁ କାର୍ଯ୍ୟକାରୀ କରିବା ପାଇଁ ପ୍ରସ୍ତାବ ଦେଇଛି ।
ଆସନ୍ତା ଆର୍ଥିକବର୍ଷ ପାଇଁ ସବ୍ସିଡି ନିମନ୍ତେ ବ୍ୟୟବରାଦ ବଢ଼ାଇପାରନ୍ତି କେନ୍ଦ୍ର ସରକାର । ଖାଦ୍ୟ, ସାର ଏବଂ ରନ୍ଧନ ଗ୍ୟାସ୍ ବାବଦ ସବ୍ସିଡି ବ୍ୟୟ ୪.୧ ଲକ୍ଷ କୋଟି ଟଙ୍କାକୁ ବୃଦ୍ଧି ପାଇପାରେ ବୋଲି ଏକ ସୂତ୍ରରୁ ଜଣାପଡ଼ିଛି । ଉଚ୍ଚ ଖାଦ୍ୟ ଏବଂ ଇନ୍ଧନ ଖର୍ଚ୍ଚରୁ ଲୋକଙ୍କୁ ଆଶ୍ୱସ୍ତି ଦେବା ଲାଗି ଏଥର ବଜେଟରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ସବ୍ସିଡି ବ୍ୟୟକୁ ୮% ବଢ଼ାଇପାରନ୍ତି ବୋଲି ଜଣାପଡ଼ିଛି । ଆସନ୍ତା ୧ ତାରିଖରେ ଅର୍ଥମନ୍ତ୍ରୀ ସୀତାରମଣ ୨୦୨୫-୨୬ ଆର୍ଥିକବର୍ଷ ପାଇଁ ସାଧାରଣ ବଜେଟ୍କୁ ଉପସ୍ଥାପନ କରିବେ । ଏସିଆର ତୃତୀୟ ବୃହତ୍ ଅର୍ଥନୀତିରେ ମନ୍ଥର ଅଭିବୃଦ୍ଧି ଏବଂ ବର୍ଦ୍ଧିତ ବିଶ୍ୱ ଅନିଶ୍ଚିତତା ମଧ୍ୟରେ ଏ ବଜେଟ୍ ଗୁରୁତ୍ୱ ବହନ କରୁଛି । ସହରାଞ୍ଚଳରେ ଚାହିଦା ହ୍ରାସ ଏବଂ କମ୍ପାନିଗୁଡ଼ିକ ପକ୍ଷରୁ ନିବେଶ ଖସିବା ଦ୍ୱାରା ଅର୍ଥନୈତିକ ଅଭିବୃଦ୍ଧି ମନ୍ଥର ରହିଛି । ଏଭଳି କ୍ଷେତ୍ରରେ ସବ୍ସିଡି ବଢ଼ାଇ ଅର୍ଥନୀତିରେ ଚାହିଦା ଫେରାଇ ଆଣିବା ଲକ୍ଷ୍ୟ ରହିବ । ସରକାର ଆକଳନ କରିଛନ୍ତି ଯେ, ଆସନ୍ତା ଆର୍ଥିକବର୍ଷରେ ଦେଶର ଖାଦ୍ୟ ସବ୍ସିଡି ବିଲ୍ ପ୍ରାୟ ୫% ବଢ଼ି ୨.୧୫ ଲକ୍ଷ କୋଟି ଟଙ୍କାକୁ ବୃଦ୍ଧି ପାଇପାରେ।
