ଇମ୍ଫାଲ୍, ୨୭/୦୯: ପୂର୍ବତ୍ତୋର ରାଜ୍ୟ ମଣିପୁର ସ୍ଥିତି ପୁଣି ବିଗିଡ଼ିଛି । ସ୍ଥିତି ପୁଣି ଥରେ ଉତ୍ତେଜନାପୂର୍ଣ୍ଣ ହେଉଥିବାରୁ ଇଣ୍ଟରନେଟ୍ ସେବାକୁ ବନ୍ଦ କରି ଦିଆଯାଇଛି ।ସମ୍ପୂର୍ଣ୍ଣ ରାଜ୍ୟକୁ ସରକାର ଅଶାନ୍ତ ଅଞ୍ଚଳ ଘୋଷଣା କରିଛନ୍ତି । ମେ ୩ରେ ମଣିପୁରରେ ଆରମ୍ଭ ହୋଇଥିବା ହିଂସା ପରେ ଇଣ୍ଟରେନେଟ୍ ସେବାକୁ ବନ୍ଦ କରି ଦିଆଯାଇଥିଲା । ସେପ୍ଟେମ୍ବର ୨୩ରେ ମୋବାଇଲ୍ ଇଣ୍ଟରେନେଟ୍ ସେବା ଆରମ୍ଭ ହୋଇଥିଲା ।
ମଣିପୁର ଗୃହ ବିଭାଗ ପକ୍ଷରୁ ଆଜି ଜାରି ସୂଚନା ପ୍ରକାରେ, ବିଭିନ୍ନ ଉଗ୍ରପନ୍ଥୀ ସମୂହର ହିଂସାତ୍ମକ ଗତିବିଧି ପାଇଁ ସମ୍ପୂର୍ଣ୍ଣ ମଣିପୁରରେ ସେନାର ଆବଶ୍ୟକତା ରହିଛି । ଇମ୍ଫାଲ୍, ଲାମ୍ଫେଲ୍, ସିଟି, ସିଙ୍ଗଜାମେଇ, ସେକମାଇ, ଲାମାସାଙ୍ଗ, ପାଟସୋଇ, ବାଙ୍ଗୋଇ, ପୋରୋମ୍ପ୍ୟାଟ୍, ହେଇଙ୍ଗାଙ୍ଗ, ଲାମଲାଇ, ହରିଲବୁଙ୍ଗ, ଲିମାଖୋଙ୍ଗ, ବିଷ୍ଣୁପୁର, ନାମବୋଲ, ମୋଇରାଙ୍ଗ, କାକାଚିଙ୍ଗ ଓ ଜିରିବାମକୁ ଅଶାନ୍ତ କ୍ଷେତ୍ର ଘୋଷଣା କରାଯାଇଛି । ରାଜ୍ୟର ୧୯ଟି ପୋଲିସ ଥାନା ଅଞ୍ଚଳରେ ଶାନ୍ତି ରହିଛି ।
ପୃଥିବୀରୁ କେବେ ଲୋପ ପାଇବ ମଣିଷ? ତାରିଖ ଓ କାରଣ ବତାଇଲେ ବୈଜ୍ଞାନିକ
୨ ନିଖୋଜ ଛାତ୍ରଙ୍କ ମୃତ୍ୟୁ ପରେ ସ୍ଥିତି ପୁଣି ଉତ୍ତେଜନାପୂର୍ଣ୍ଣ ହୋଇଛି । ଇମ୍ଫାଲ୍ ସହ ଉପତ୍ୟକାର ଅନ୍ୟ ଅଞ୍ଚଳରେ ପ୍ରଦର୍ଶନ ଜୋରଦାର ହେଉଛି । ତେବେ ଏବେ ଯାଏ କୌଣସି ବଡ଼ ହିଂସା ଘଟି ନାହିଁ । ତଥାପି ମଣିପୁରରେ ସ୍ଥିତି ଉତ୍ତେଜନାପୂର୍ଣ୍ଣ ରହିଛି । ବୁଧବାର ରାତିରେ ଇମ୍ଫାଲରେ ଜୋରଦାର ବିକ୍ଷୋଭ ପ୍ରଦର୍ଶନ କରାଯାଇଛି ।
ମଣିପୁରରେ ଇଣ୍ଟରନେଟ୍ ସେବା ପୁଣି ଥରେ କାର୍ଯ୍ୟକ୍ଷମ ହେବା ପରେ ସୋସିଆଲ୍ ମିଡିଆରେ ହିଂସାର ଅନେକ ଭିଡିଓ ଭାଇରାଲ୍ ହୋଇଥିଲା । ସରକାରଙ୍କ ଅନୁସାରେ, ଭାଇରାଲ୍ ପୋଷ୍ଟରେ ଅନେକ ଭ୍ରମାତ୍ମକ ଥିଲା । ଯାହାଦ୍ୱାରା ପୁଣି ଥରେ ହିଂସା ସୃଷ୍ଟି ପାଇଁ ପ୍ରୟାସ କରାଯାଇଛି ।
ମଣିପୁରର ୨ ନିଖୋଜ ଛାତ୍ରଙ୍କ ମୃତ୍ୟୁ ଖବର ଓ ଫଟୋ ସୋସିଆଲ୍ ମିଡିଆରେ ପୋଷ୍ଟ ପରେ ଉପତ୍ୟକାରେ ସ୍ଥିତି ଖରାପ ଆଡ଼କୁ ଯାଉଛି । ସ୍ଥିତିକୁ ଦେଖି ମଣିପୁରର ବିଧାୟକ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହଙ୍କୁ ଚିଠି ଲେଖି ସିବିଆଇ ତଦନ୍ତ ପାଇଁ ଦାବି କରିଛନ୍ତି । ଚିଠି ପାଇ ଗୁରୁବାର ସକାଳେ ସିବିଆଇର ବରିଷ୍ଠ ଅଧିକାରୀ ଇମ୍ଫାଲରେ ପହଞ୍ଚିଛନ୍ତି । ପୂର୍ବରୁ ମଣିପୁର ହିଂସା ଓ ଅନ୍ୟ କେତେକ ମାମଲାର ତଦନ୍ତ ସିବିଆଇ କରୁଛି ।