ନୂଆଦିଲ୍ଲୀ ୧୨/୦୯: ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ସାଇନ୍ସ (ଆଇଆଇଏସ୍ସି)ର ବୈଜ୍ଞାନିକମାନେ କର୍କଟ ଅନୁସନ୍ଧାନ କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ସଫଳତା ହାସଲ କରିଛନ୍ତି । ସେମାନେ ଏକ ନୂଆ ପଦ୍ଧତିର ବିକାଶ କରିଛନ୍ତି, ଯାହା କର୍କଟ ରୋଗ ଚିହ୍ନଟ ସହିତ କର୍କଟ କୋଷିକାଗୁଡ଼ିକୁ ନଷ୍ଟ କରିବ । ସେମାନେ ସୁନା ଓ ତମ୍ବା ସଲ୍ଫାଇଡ୍ରେ ହାଇବ୍ରିଡ୍ ନାନୋପାର୍ଟିକଲ୍ସ ପ୍ରସ୍ତୁତ କରିଛନ୍ତି । ଧ୍ୱନି ତରଙ୍ଗ ପ୍ରୟୋଗ କରି କର୍କଟ କୋଷିକା ଚିହ୍ନଟ ସହିତ ଉତ୍ତାପ ଉତ୍ପନ୍ନ ଜରିଆରେ ଏହା ସେଗୁଡ଼ିକୁ ନଷ୍ଟ କରିପାରିବ ।
ଏସିଏସ୍ ଆପ୍ଲାଏଡ୍ ନାନୋ ମ୍ୟାଟେରିଆଲ୍ସରେ ଏହି ଅଭିନବ ଉଦ୍ଭାବନର ବିସ୍ତୃତ ବିବରଣୀ ରହିଛି । ହାଇବ୍ରିଡ୍ ନାନୋପର୍ଟିକଲ୍ଗୁଡ଼ିକ ଫଟୋଥର୍ମାଲ, ଅକ୍ସିଡେଟିଭ୍ ଷ୍ଟ୍ରେସ୍ ଓ ଫଟୋଆକୋଷ୍ଟିକ୍ ଗୁଣ ପ୍ରଦର୍ଶନ କରେ । ଯେତେବେଳେ ଆଲୋକ ସଂସ୍ପର୍ଶରେ ଆସେ, ଏହି ନାନୋ (ସୂକ୍ଷ୍ମ) କଣିକାଗୁଡ଼ିକ ତାକୁ ଅବଶୋଷଣ କରେ ଏବଂ ଉତ୍ତାପ ଉତ୍ପନ୍ନ କରେ । ଏହା କର୍କଟ କୋଷିକାଗୁଡ଼ିକୁ ନଷ୍ଟ କରିବାରେ ଫଳପ୍ରଦ ହୋଇଥାଏ । ସେଗୁଡ଼ିକ ବିଷାକ୍ତ ଏକକ ଅମ୍ଳଜାନ ପରମାଣୁ ମଧ୍ୟ ଉତ୍ପନ୍ନ କରନ୍ତି, ଯାହା ପରବର୍ତ୍ତୀ ପର୍ଯ୍ୟାୟରେ କର୍କଟ କୋଷିକା ନଷ୍ଟ କରିବାରେ ସହାୟକ ହୋଇଥାନ୍ତି । ଚିକିତ୍ସକୀୟ ସାମର୍ଥ୍ୟ ସମେତ ନାନୋ କଣିକାଗୁଡ଼ିକର ଚମତ୍କାର କର୍କଟ ଚିହ୍ନଟ କ୍ଷମତା ମଧ୍ୟ ରହିଛି । ଏଗୁଡ଼ିକ ଆଲୋକକୁ ଅବଶୋଷଣ କରି ଅଲ୍ଟ୍ରାସାଉଣ୍ଡ୍ ତରଙ୍ଗ ଉତ୍ପନ୍ନ କରନ୍ତି, ଯାହା ଦ୍ୱାରା ଉଚ୍ଚ ସ୍ତରରେ କର୍କଟ କୋଷିକାଗୁଡ଼ିକୁ ଚିହ୍ନଟ କରିପାରନ୍ତି ।
ନାନୋ କଣିକାଗୁଡ଼ିକର ଏହି ଗୁଣ କର୍କଟ ଚିହ୍ନଟର ସଠିକତା ସ୍ତରକୁ ବଢ଼ାଇ ପାରିବ । କାରଣ ଶରୀରରେ ଟିସୁ ଦେଇ ଗତି କରିବା ସମୟରେ ଧ୍ୱନି ତରଙ୍ଗ ଆଲୋକ ତୁଳନାରେ କମ୍ ବିଚ୍ଛୁରିତ ହୁଏ । ଟ୍ୟୁମର୍ରେ ଅମ୍ଳଜାନ ସଂପୃକ୍ତିର ଅପେକ୍ଷାକୃତ ସ୍ପଷ୍ଟ ଛବି ଓ ଅଧିକ ସଠିକ୍ ମାପ ପ୍ରଦାନ କରେ । ଏହି ଉଦ୍ଭାବନ ପୂର୍ବରୁ ବିକଶିତ ନାନୋପାର୍ଟିକଲ୍ଗୁଡ଼ିକର ମୁଖ୍ୟ ସୀମା ବିଷୟରେ ବୈଜ୍ଞାନିକ ଟିମ୍ ବର୍ଣ୍ଣନା କରିଛନ୍ତି । ତାହା ହେଉଛି ଅପେକ୍ଷାକୃତ ବଡ଼ ଆକାରଯୁକ୍ତ ନାନୋପାର୍ଟିକଲ୍ସ । ଏହାର ଏକ ଅଭିନବ ହ୍ରାସ ପଦ୍ଧତି ପ୍ରୟୋଗ କରି ସେମାନେ ତମ୍ବା ସଲ୍ଫାଇଡ୍ ପୃଷ୍ଠରେ ସୂକ୍ଷ୍ମ ସୁନା ଗଚ୍ଛିତ କରିବାରେ ସକ୍ଷମ ହେଲେ । ଏହା ଜରିଆରେ ୮ ଏନ୍ଏମ୍ରୁ କମ୍ ଆକାରଯୁକ୍ତ ହାଇବ୍ରିଡ୍ ନାନୋପାର୍ଟିକଲ୍ସ ସୃଷ୍ଟି କଲେ। ଏହି ସୂକ୍ଷ୍ମ କଣିକାଗୁଡ଼ିକ ଟିସୁରେ ସହଜରେ ଗତି କରି ଟ୍ୟୁମର୍ ପାଖରେ ପହଞ୍ଚି ପାରିବେ । ଅତି ଛୋଟ ହୋଇଥିବାରୁ ଏଗୁଡ଼ିକୁ ମାନବ ଶରୀରକୁ ସହଜରେ ଛଡ଼ାଯାଇ ପାରିବ । ଅଦ୍ୟାବଧି ପ୍ରୟୋଗଶାଳାରେ ନାନୋପାର୍ଟିକଲ୍ଗୁଡ଼ିକୁ ଫୁସ୍ଫୁସ୍ ଓ ସର୍ଭାଇକାଲ କର୍କଟ କୋଷିକା ରେଖା ଉପରେ ପରୀକ୍ଷା କରାଯାଇଛି । ଏହାର ଫଳପ୍ରଦ ପରିଣାମ ପରେ ଚିକିତ୍ସା କ୍ଷେତ୍ରରେ ପରୀକ୍ଷଣ ହେବ, ଯାହା କର୍କଟ ବିରୋଧୀ ଲଢ଼େଇରେ ଗୁରୁତ୍ୱପୂର୍ଣ୍ଣ ଉପଲବ୍ଧି ହେବ ବୋଲି ବୈଜ୍ଞାନିକମାନେ କହିଛନ୍ତି ।