ମୁମ୍ବାଇ,୧୧।୯: ବଲିଉଡ ଅଭିନେତ୍ରୀ ମଲାଇକା ଅରୋରାଙ୍କ ବାପାଙ୍କ ଆତ୍ମହତ୍ୟା। ସକାଳ ୯ଟାରେ ଏହି ଘଟଣା ଘଟିଛି। ଘଟଣାସ୍ଥଳରେ ମୁମ୍ୱାଇ ପୋଲିସ ପହଞ୍ଚି ତଦନ୍ତ ଜାରି ରଖିଛି । ଆତ୍ମହତ୍ୟାର କାରଣ ଅସ୍ପଷ୍ଟ  ରହିଛି। ମଲାଇକା ଏବଂ ତାଙ୍କ ପରିବାର ପାଇଁ ଏହା ଅତ୍ୟନ୍ତ ଦୁଃଖଦାୟକ ଏବଂ କଷ୍ଟକର ସମୟ । ଏହି ଦୁଃଖ ସମୟରେ ମଲାଇକାଙ୍କ ପୂର୍ବତନ ସ୍ବାମୀ ତଥା ବଲିଉଡ ଅଭିନେତା ଅରବାଜ ଖାନ ତାଙ୍କ ଘରେ ପହଞ୍ଚିଛନ୍ତି। ଅରବାଜ ଖାନ ମଲାଇକାଙ୍କ ଘର ବାହାରେ ପୋଲିସ ଏବଂ ଅନ୍ୟ ଲୋକଙ୍କ ସହ କଥାବାର୍ତ୍ତା ହେଉଥିବା ନଜର ଆସିଛନ୍ତି । 

କୁହାଯାଉଛି ଯେ, ବୁଧବାର ସକାଳୁ ସେ ଛାତ ଉପରୁ ଡେଇଁ ଆତ୍ମହତ୍ୟା କରିଛନ୍ତି। ଏହାପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କୁ ଡାକ୍ତର ମୃତ ଘୋଷିତ କରିଛନ୍ତି।ରିପୋର୍ଟ ଅନୁସାରେ, ମଲାଇକାଙ୍କ ବାପା ଆତ୍ମହତ୍ୟା କରିଥିବା ଜାଣିବା ପରେ ତାଙ୍କୁ ହସ୍ପିଟାଲ ନିଆଯାଇଥିଲା। ଏଏନ୍‌ଆଇର ରିପୋର୍ଟ ଅନୁସାରେ, ସେଠାରେ ଚିକିତ୍ସା ପରେ ତାଙ୍କୁ ବଞ୍ଚାଇବା ସମ୍ଭବ ହୋଇନଥିଲା। ପୋଲିସ ମାମଳାର ତଦନ୍ତ କରୁଛି। ଅନିଲ ଆରୋଡା କାହିଁକି ଆତ୍ମହତ୍ୟା କଲେ, ତାହାର କାରଣ ଏବେ ବି ସ୍ପଷ୍ଟ ହୋଇପାରିନି।

ମଲାଇକା ପୂର୍ବରୁ ଏକ ଇଣ୍ଟରଭ୍ୟୁରେ କହିସାରିଛନ୍ତି ଯେ, ତାଙ୍କ ବାପା-ମା’ଙ୍କର ଡିଭୋର୍ସ ହୋଇସାରିଛି। ଦୁହେଁ ଯେତେବେଳେ ଅଲଗା ହୋଇଥିଲେ ତାଙ୍କୁ ସେତେବେଳେ ୧୧ ବର୍ଷ ହୋଇଥିଲା। ଦୁଇ ଝିଅ ମଲାଇକା ଓ ଅମୃତା ତାଙ୍କ ମା’ ଜୟସ୍‌ଙ୍କ ସହ ରହୁଥିଲେ। ମଲାଇକାଙ୍କ ମା’ ମାଲାୟାଲି କ୍ରିଷ୍ଟିଆନ୍‌ ହୋଇଥିବା ବେଳେ ବାପା ପଞ୍ଜାବୀ ହିନ୍ଦୁ ଥିଲେ।