ଫିରିଙ୍ଗିଆ, ୫/ ୮ :  କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଫିରିଙ୍ଗିଆ ପଞ୍ଚାୟତର ଖଜୁରୀପଡା ଗାଁ ନିକଟରେ ବଜ୍ରାଘାତରେ ୮ଟି ଛେଳିର ମୃତ୍ୟୁ ହୋଇଥିବାବେଳେ ଛେଳି ଚରାଳୀ ଆହତ ହୋଇଥିବା ଜଣାପଡିଛି l ସୂଚନା ଅନୁସାରେ ଆଜି ଫିରିଙ୍ଗିଆ ଅଞ୍ଚଳରେ ପ୍ରବଳ ବର୍ଷା ସାଙ୍ଗକୁ ବିଜୁଳି ଘଡ଼ ଘଡ଼ି ହୋଇଥିଲା l ଖଜୁରୀପଡା ଅଞ୍ଚଳର ଛେଳି ଗୋଠ ନେଇ ଚରାଳୀ ଯାଇଥିବାବେଳେ ପ୍ରବଳ ବର୍ଷାରେ ଗୋଠରୁ କିଛି ଛେଳି ବର୍ଷା ଯୋଗୁଁ ବାଉଁଶ ଗଛ ତଳେ ଲୁଚିଥିଲେ l ଚାରାଳି ଖଜୁରୀପଡ଼ା ଈଶ୍ୱର ଚନ୍ଦ୍ର କହଁର ବର୍ଷାରେ ଧାଇଁ ଧାଇଁ ଯାଉଥିବାବେଳେ ହଠାତ ବଜ୍ରାଘାତ ହୋଇଥିଲା । ପ୍ରବଳ ବଜ୍ରାଘାତରେ ବାଉଁଶ ଗଛ ତଳେ ଥିବା ୪ ଜଣ ଛେଳି ଚାଷୀଙ୍କର ଆଠଟି ଛେଳିର ମୃତ୍ୟୁ ହୋଇଥିବାବେଳେ ଛେଳି ଚାରାଳି ଈଶ୍ୱରଙ୍କୁ ଆଘାତ ଲାଗିଥିବାରୁ ସେ ଆହତ ହୋଇଥିବାବେଳେ ଫିରିଙ୍ଗିଆ ମେଡିକାଲକୁ ତୁରନ୍ତ ନିଆ ଯାଇଛି l

ତେବେ ୮ଟି ଛେଳି ମଧ୍ୟରୁ ଖଜୁରୀପଡା ଗାଁର ସାରଳା କହଁରଙ୍କ ୨ଟି, ରମାକାନ୍ତ କହଁରଙ୍କ ୨ଟି, କସମତି ବିନ୍ଧାଣିଙ୍କ ୨ଟି ଏବଂ ବାଙ୍ଗର କହଁରଙ୍କ ୨ଟି ବୋଲି ସୂଚନା ମିଳିଛି l ସମସ୍ତ କ୍ଷତି ଗ୍ରସ୍ତ ଛେଳି ଚାଷୀ ସହାୟତା ଦାବି କରି ସ୍ଥାନୀୟ ତହସିଲଦାର ଜ୍ୟୋତି ପ୍ରକାଷ ସେଠି ଓ ପ୍ରାଣୀ ସମ୍ପଦ ଅଧିକାରୀ ପ୍ରିୟରଞ୍ଜନ ମିଶ୍ରଙ୍କୁ ଲିଖିତ ଭାବେ ଜଣାଇଛନ୍ତି l ଏହି ଘଟଣାକୁ ନେଇ ସ୍ଥାନୀୟ ପ୍ରାଣୀ ସମ୍ପଦ ଅଧିକାରୀ ପ୍ରିୟରଞ୍ଜନ ମିଶ୍ରଙ୍କୁ ପଚାରିବାରୁ ଘଟଣାସ୍ଥଳକୁ ଯାଇ ଦେଖିବା ପରେ ଚାଷୀଙ୍କ ପାଇଁ ତହସିଲଦାରଙ୍କ ସହ ଯୋଗାଯୋଗ କରି ସହାୟତା ବ୍ୟବସ୍ଥା କରାଯିବାକୁ ଚେଷ୍ଟା କରାଯିବ ବୋଲି କହିଛନ୍ତି l