ବାରିପଦା, ୨୦।୭: ବାରିପଦା ଟାଉନ ଥାନା ପୁଲିସକୁ ବଡ଼ ସଫଳତା । ବାରିପଦା ସହର ରଥଯାତ୍ରା ମେଳାରୁ ଚୋରି ହୋଇଥିବା ୫୪ଗୋଟି ମୋବାଇଲ ଉଦ୍ଧାର କରାଯିବା ସହିତ ୬ ଜଣ ଲୁଟେରାଙ୍କୁ ପୋଲିସ ଗିରଫ କରିଛି । ଏନେଇ ବାରିପଦାସ୍ଥିତ ଜିଲ୍ଲା ପୁଲିସ ମୁଖ୍ୟାଳୟରେ ଶନିବାର ଏକ ମୋବାଇଲ ଫେରସ୍ତ ମେଳାରେ ଜିଲ୍ଲା ଆରକ୍ଷୀ ଅଧିକ୍ଷୀକା ଏସ୍ ସୁଶ୍ରୀ ମାଲିକମାନଙ୍କୁ ମୋବାଇଲ ଫେରସ୍ତ କରିଛନ୍ତି । ଏଥି ସହିତ ସାମ୍ବାଦିକ ସମ୍ମିଳନୀ ଜରିଆରେ ସବିଶେଷ ତଥ୍ୟ ପ୍ରଦାନ କରିଛନ୍ତି । ରଥଯାତ୍ରାରୁ ମୋବାଇଲ ଚୋରି ନେଇ ବାରମ୍ବାର ବାରିପଦା ଟାଉନ ଥାନାରେ ଅଭିଯୋଗ ହେଉଥିଲା । ଏନେଇ ତଦନ୍ତ କରି ପୁଲିସ ଗ୍ୟାଙ୍ଗର ୬ଜଣକୁ ଧରିବାରେ ସଫଳ ହୋଇଛି । ସେମାନେ ହେଲେ ପଶ୍ଚିମବଙ୍ଗ ରାଜ୍ୟର ବର୍ଦ୍ଧମାନ ଜିଲ୍ଲାର ପାଣ୍ଡବେଶ୍ୱର ଥାନା ଅନ୍ତର୍ଗତ ଡିଭିଏସ ପଡ଼ା ଅଞ୍ଚଳର ଲକ୍ଷଣ ସିଂ, ଶିବ ମାଲି, ଶମ୍ଭୁ ଶର୍ମା, ପ୍ରଭାତ ସିଂ ଓ ଅନ୍ୟ ୨ଜଣ ନାବାଳକ ରହିଛନ୍ତି । 

ସୂଚନା ଅନୁଯାୟୀ, ବାରିପଦା ସହରରେ ବର୍ଦ୍ଧିତ ଜନସଂଖ୍ୟା ସମେତ ଅପରାଧିକ ମାମଲାର ମାତ୍ରା ମଧ୍ୟ ବୃଦ୍ଧି ପାଇବାରେ ଲାଗିଛି । କିଛି ଦିନ ହେବ ସହରରେ ଲୁଟେରାଙ୍କ ଦୌରାତ୍ମ୍ୟ ଦିନକୁ ଦିନ ବୃଦ୍ଧି ପାଉଥିବା ବେଳେ ରଥଯାତ୍ରା ମେଳାରୁ ମୋବାଇଲ ଛିନତାଇ ନେଇ ଅଭିଯୋଗ ହୋଇଛି । ତୁଳସୀଚୌରା ଅଞ୍ଚଳର ଅନିମେଶ ଅଧିକାରୀ ତାଙ୍କ ପରିବାର ଲୋକଙ୍କ ସମେତ ବାହୁଡ଼ା ଯାତ୍ରା ଦେଖିବାକୁ ଆସିଥିଲେ । ସୁଭଦ୍ରା ରଥ ଟଣା ଯିବା ବେଳେ ଭିଡ଼ର ସୁଯୋଗ ନେଇ ଦୁର୍ବୁତ୍ତମାନେ ମୋବାଇଲ ଫୋନ୍ ଚୋରି ହୋଇଥିଲା । ଏନେଇ ବାରିପଦା ଟାଉନ ଥାନାରେ ଅଭିଯୋଗ କରିଥିଲେ । 

ଏହି ଅଭିଯୋଗକୁ ଆଧାର କରି ବେତନଟୀ ଥାନା ଅଧିକାରୀଣି ସସ୍ମିତା ମହାନ୍ତି ଓ ବଡ଼ସାହି ଥାନା ଅଧିକାରୀ ଉମାଶଙ୍କର ନାୟକଙ୍କ ନେତୃତ୍ୱରେ ଟିମ୍ ଗଠନ କରାଯାଇ ପୁଲିସ ତଦନ୍ତ ପ୍ରକ୍ରିୟା ଆରମ୍ଭ କରାଯାଇଛି । ପୁଲିସ ତଦନ୍ତ କରି ଉକ୍ତ ମୋବାଇଲ ଚୋରି ଗ୍ୟାଙ୍ଗକୁ ଧରିବାରେ ସମର୍ଥ ହୋଇଛନ୍ତି । ଗିରଫମାନେ ପେଶାଦାର ମୋବାଇଲ ଚୋର ହୋଇଥିବା ବେଳେ ସେମାନଙ୍କ ନିକଟରୁ ଚୋରି ହୋଇଥିବା ୪୯ଗୋଟି ମୋବାଇଲ ଫୋନ ସମେତ ଗିରଫ ଚୋର ମାନଙ୍କ ୫ଗୋଟି ମୋବାଇଲ ଜବତ ହୋଇଛି । ଧରା ପଡ଼ିଥିବା ସମସ୍ତ ମୋବାଇଲ ଗୁଡ଼ିକ ମୂଲ୍ୟ ଆନୁମାନିକ ୧୩ ଲକ୍ଷ ଟଙ୍କା ହେବ ବୋଲି ପୁଲିସ ପକ୍ଷରୁ ସୂଚନା ପ୍ରଦାନ କରାଯାଇଛି । 

ଜବତ ମୋବାଇଲ ଗୁଡ଼ିକ ମାଲିକମାନଙ୍କୁ ଫେରସ୍ତ କରାଯାଇଛି । ପୁଲିସ ମୁଖ୍ୟାଳୟରେ ଜିଲ୍ଲା ଆରକ୍ଷୀ ଅଧିକ୍ଷକ ଏସ ସୁଶ୍ରୀ ଜବତ ମୋବାଇଲ ଗୁଡିକ ପ୍ରକୃତ ମାଲିକଙ୍କୁ ତଦନ୍ତ କରି ଜବତ ମୋବାଇଲ ଫେରସ୍ତ ମେଳା ଜରିଆରେ ପ୍ରଦାନ କରିଛନ୍ତି । ମାଲିକମାନେ ଛିନତାଇ ହୋଇଥିବା ମୋବାଇଲ ଫେରସ୍ତ ପାଇ ବେଶ ଖୁସି ହୋଇଥିଲେ । ଗିରଫ ୪ଜଣକୁ କୋର୍ଟ ଚାଲାଣ କରାଯାଇଥିବା ବେଳେ ନାବାଳକ ୨ ଜଣକୁ ଜୁଭେନାଇଲ ଜଷ୍ଟିସ୍ ବୋର୍ଡରେ ହାଜର କରାଯାଇଛି ।