ବୌଦ୍ଧ, ୦୧/୧୧: ଦାମୀ କାର୍‌ରେ ଗଞ୍ଜେଇ ଚାଲାଣ । କୁରୁକୁପା ଛକ ନିକଟରେ କାର୍‌ରୁ ଜବତ ହେଲା ୨୩ କେଜି ଗଞ୍ଜେଇ । ଘଟଣାରେ ୪ ଜଣ ଚାଲାଣକାରୀଙ୍କୁ ଗିରଫ କଲା ପୋଲିସ । ଗିରଫ ଅଭିଯୁକ୍ତ ଭବାନୀପାଟଣା ଜିଲ୍ଲାର ଜିତୁ ମାଝୀ, ଜୟଲାଲ୍ ଲୁହାଜ୍ ବ୍ୟାଲ, ଚନ୍ଦ୍ର ବେହେରା ଓ କନ୍ଦର୍ପ ଘିବେଲା ବୋଲି ଜଣାପଡ଼ିଛି । ବୌଦ୍ଧ ଜିଲ୍ଲା ଘଣ୍ଟାପଡ଼ା ଥାନା ଅନ୍ତର୍ଗତ କୁରୁକୁପା ଛକ ନିକଟରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ଘଣ୍ଟାପଡ଼ା ଅଞ୍ଚଳରେ ଗଞ୍ଜେଇ ଚୋରା ଚାଲାଣ ହେଉଥିବା ନେଇ ଏକ ବିଶେଷ ସୂତ୍ରରୁ ଖବର ପାଇଥିଲା ଘଣ୍ଟାପଡ଼ା ଥାନା ପୋଲିସ । ଖବର ପାଇ ପୋଲିସ ୪୧ନଂ ମନମୁଣ୍ଡା -ସିନ୍ଧୁଗୋରା ରାଜ୍ୟ ରାଜପଥର କୁରୁକୁପା ଛକ ନିକଟରେ ଛକି ରହିଥିଲା । କିଛି ସମୟ ପରେ ଏକ କାର୍‌ ଦ୍ରୁତ ଗତିରେ ଆସୁଥିବା ଦେଖି ତାକୁ ଅଟକାଇଥିଲା ପୋଲିସ । ଗାଡ଼ିଟିକୁ ଯାଞ୍ଚ କରିବା ବେଳେ ଉକ୍ତ ଗାଡ଼ିରୁ ୨୩ କେଜି ଗଞ୍ଜେଇ ବାହାରିଥିଲା । ଏହି କାର୍‌ରେ ଥିବା ୪ ଜଣ ଗଞ୍ଜେଇ ମାଫିଆଙ୍କୁ ପୋଲିସ ଗିରଫ କରିଥିଲା ଏବଂ ମିଳିଥିବା ଗଞ୍ଜେଇକୁ ଜବତ କରିଥିଲା । ଗଞ୍ଜେଇ ଜବତ କରି ତଦନ୍ତ ଜାରି ରଖିଥିବା ବେଳେ ଏକ ମାମଲା ରୁଜୁ କରି ୪ ଜଣ ଅଭିଯୁକ୍ତଙ୍କୁ କୋର୍ଟ ଚାଲା କରାଯିବା ନେଇ ଘଣ୍ଟାପଡ଼ା ଥାନା ଅଧିକାରୀ ନରସିଂହ ମହାପାତ୍ର ସୂଚନା ଦେଇଛନ୍ତି ।