ଭୁବନେଶ୍ଵର, ୦୩/୧୨ : ବାଘ ମୃତ୍ୟୁକୁ ନେଇ ଆସିଲା ଚିନ୍ତାଜନକ ଖବର। ଗତ ୫ ବର୍ଷ ମଧ୍ୟରେ ରାଜ୍ୟରେ ମରିଛନ୍ତି ୩୪ଟି କଲରାପତରିଆ ବାଘ। ସେମାନଙ୍କ ମଧ୍ୟରୁ ୧୭ଟି ବାଘଙ୍କୁ ଶିକାର କରାଯାଇଛି। ସେହିପରି ବିଦ୍ୟୁତ୍ ଆଘାତରେ ୩, ରେଳ ଦୁର୍ଘଟଣାରେ ୧, ରାସ୍ତା ଦୁର୍ଘଟଣାରେ ୩, ରୋଗରେ ୩ ଏବଂ ପ୍ରାକୃତିକ ଭାବେ ୩ଟି ବାଘଙ୍କର ମୃତ୍ୟୁ ହୋଇଛି। 

ଏତଦ୍ ବ୍ୟତୀତ ରାଜ୍ୟରେ ୩ଟି ମହାବଳ ବାଘଙ୍କର ମୃତ୍ୟୁ ହୋଇଛି। ସେମାନଙ୍କ ମଧ୍ୟରୁ ଶିକାର ପାଇଁ ୧, ନିଜ ଭିତରେ କଳହ ପାଇଁ ୧, ଏବଂ ଅନ୍ୟ ଗୋଟିଏ ବାଘର ମୃତ୍ୟୁର କାରଣ ଅସ୍ପଷ୍ଟ ରହିଛି। ଅଲ୍ ଓଡ଼ିଶା ଟାଇଗର୍ ଏଷ୍ଟିମେସନ ରିପୋର୍ଟ ଅନୁସାରେ ବର୍ତ୍ତମାନ ଓଡ଼ିଶାରେ ୩୦ଟି ମହାବଳ ଏବଂ ୬୯୬ଟି କଲରାପତରିଆ ବାଘ ଅଛନ୍ତି। ବିଧାୟକ ତାରା ବାହିନୀପତିଙ୍କ ପ୍ରଶ୍ନରେ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶ ରାମ ଖୁଣ୍ଟିଆ ବିଧାନସଭାରେ ଉତ୍ତର ରଖିଛନ୍ତି।