ଛତ୍ରପୁର, ୨୨/୧୦ : ଗଞ୍ଜାମରେ ବାତ୍ୟା ମୁକାବିଲା ପାଇଁ ଜିଲ୍ଲାପାଳ ଦିବ୍ୟଜ୍ୟୋତି ପରିଡାଙ୍କ ଅଧ୍ୟକ୍ଷତାରେ ବୈଠକ ହୋଇଛି। ଜିଲ୍ଲା ପ୍ରଶାସନ ସଜାଗ ରହିଛି। ବାତ୍ୟା ସମୟରେ ଗଞ୍ଜାମରେ ଅଧିକ ବର୍ଷା ହେବାର ସମ୍ଭାବନା ରହିଛି। ଜିରୋ କାଜୁଆଲିଟି ମୁଖ୍ୟ ଫୋକସ୍ରେ ରହିଛି। ଏହାକୁ ଦୃଷ୍ଟିରେ ରଖି ପାହାଡିଆ ଅଞ୍ଚଳ, ନଦୀ କୂଳିଆ, ଚିଲିକା କୂଳିଆ ଓ କଚ୍ଚା ଘରେ ରହୁଥିବା ଲୋକଙ୍କୁ ଆଜି ସନ୍ଧ୍ୟା ସୁଦ୍ଧା ସ୍ଥାନନ୍ତର କରିବାକୁ ନିର୍ଦ୍ଦେଶ ଦିଆଯାଇଛି। ଜିଲ୍ଲାରେ ଆନୁମାନିକ ୨୫ ହଜାର ଲୋକ ସ୍ଥାନାନ୍ତର ହେବେ। ବାତ୍ୟା ଆଶ୍ରୟସ୍ଥଳୀରେ ସେମାନଙ୍କ ପାଇଁ ଖାଦ୍ୟ ବ୍ୟବସ୍ଥା କରାଯିବ। ପିଲାଙ୍କ ଖାଦ୍ୟ ମଧ୍ୟ ଯୋଗାଇ ଦିଆଯିବ।
ଜିଲ୍ଲାରେ ୧୯୨ ଗର୍ଭବତୀ ମହିଳାଙ୍କୁ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଜିଲ୍ଲାରେ ୧୦୯ ବାତ୍ୟା ଓ ବନ୍ୟା ଆଶ୍ରୟସ୍ଥଳୀ ରହିଥିବା ବେଳେ ଅତିରିକ୍ତ ୭୦୦ ଆଶ୍ରୟସ୍ଥଳୀ ଚିହ୍ନଟ ହୋଇଛି। ସମସ୍ତ ଆଶ୍ରୟସ୍ଥଳୀରେ ଅନୁସାଙ୍ଗିକ ବ୍ୟବସ୍ଥା ରଖିବାକୁ କୁହାଯାଇଛି। ଚିଲିକା, ସମୁଦ୍ର ଓ ନଦୀରେ ମାଛ ଧରିବାକୁ ବାରଣ କରାଯାଇଛି। ଏହି ସବୁ ଅଞ୍ଚଳରେ ଟିମ୍ ଗଠନ କରାଯାଇ ତଦାରଖ କରିବାକୁ ନିର୍ଦ୍ଦେଶ ଦିଆଯାଇଛି।
ସେପଟେ କଳାବଜାରୀକୁ ରୋକିବା ନେଇ ଯୋଗାଣ ବିଭାଗ ପକ୍ଷରୁ ଚଢ଼ାଉ କରିବାକୁ କୁହାଯାଇଛି। ବୈଠକରେ ଗଞ୍ଜାମ ଜିଲ୍ଲା ଅତିରିକ୍ତ ଜିଲ୍ଲାପାଳ ସୁଧାଂଶୁ କୁମାର ଭୋଇ, ଜିଲ୍ଲା ଜରୁରୀକାଳୀନ ଅଧିକାରୀ ଆୟୁଷ ପତି, ଜିଲ୍ଲା ମୁଖ୍ୟ ଯୋଗାଣ ଅଧିକାରୀ ପୁଷା ମୁଣ୍ଡାଙ୍କ ସମେତ ଶକ୍ତି ବିଭାଗ ଓ ବିଭାଗୀୟ ଅଧିକାରୀମାନେ ଆଭାସୀ ମାଧ୍ୟମରେ ଉପସ୍ଥିତ ଥିଲେ।