ସୁନାର ସଂସାର ଉଜାଡ଼ି ଦେଇଛି ମଦ । କୋଉଠି ମା’ ବେସାହାରା ହୋଇଛି ତ କୋଉଠି ପରିବାର ଏବେ ବି ରାସ୍ତାରେ । ସେ ଗୋଳାବନ୍ଧ ମଦମୃତ୍ୟୁ ହେଉ କି ଟୁକୁଲିପଡ଼ାର ଛାତିଥରା ଘଟଣା । ରମ୍ଭା ମଦମୃତ୍ୟୁ ଏବଂ କୁମର-ଭୁନ୍ଦୁପାଲି ମଦମୃତ୍ୟୁର କ୍ଷତ ବି ଭରି ପାରିନି । କେବଳ ମଦ କାହିଁକି, ବିଷାକ୍ତ କଫ୍ ସିରପ୍ ବି ଖୋଜି ଛଡ଼ାଇ ନେଇଛି ରୋଜଗାରିଆ ପୁଅକୁ । ଏବେ ମଧ୍ୟ ମଦ ଫାଶରୁ ମିଳୁନି ମୁକ୍ତି...
ଛତ୍ରପୁର/ଗଞ୍ଜାମ,(ରବୀନ୍ଦ୍ର ପଣ୍ଡା): ୨୦୦୬ ମସିହାର କଥା । ଗଞ୍ଜାମ ଜିଲ୍ଲା ରମ୍ଭା ଥାନା ହୁମ୍ମାରେ ପଞ୍ଚୁ ଦୋଳଯାତ୍ରାର ଅବସର । ଆଖପାଖ ଅଞ୍ଚଳର ଦିନ ମଜୁରିଆ ଟିକିଏ ମଉଜ୍ କରିବାକୁ ମଦ ପିଇଥିଲେ । ସେହି ମଉଜ୍ ସେମାନଙ୍କ ପାଇଁ ଭୟଙ୍କର ଜୀବନସଜା ପାଲଟିଯିବ ସେକଥା କେହି କଳ୍ପନା କରି ନ ଥିଲେ । ମଦମୃତ୍ୟୁର ବିଭୀଷିକା ଆରମ୍ଭ ହୋଇଥିଲା ଗଡ଼ହୁମ୍ମା ବାଉରୀ ସାହିରୁ । ସମସ୍ତେ ଦିନ ମଜୁରିଆ, ଅଧିକାଂଶ ଯୁବକ, ଗୋଡ଼ ହାତ ଚାଲିଲେ ପେଟକୁ ଦାନା ଯୋଗାଡ଼ ହୁଏ । ଦିନର କଠିନ ପରିଶ୍ରମ ପରେ ମନ ଓ ଶରୀରକୁ ଟିକିଏ ହାଲୁକା କରିବା ସକାଶେ ମଦ ପିଇ ଜଣକ ପରେ ଜଣେ ଘରକୁ ଫେରିଥିଲେ । ପ୍ରଥମେ ଜଣେ ଯୁବକଙ୍କ ମୃତ୍ୟୁ ଘଟିଥିଲା । ଆଉ କିଛି ଜଣ ଅସୁସ୍ଥ ହୋଇ ପଡ଼ିଥିଲେ । ହେଲେ ମୃତ୍ୟୁକୁ ଲୁଚାଇବା ପାଇଁ ମାଫିଆମାନେ ହୁମ୍ମା ଷ୍ଟେସନ୍ ନିକଟରେ ଗାତ ଖୋଳି ପୋତି ଦେଇଥିଲେ । ପ୍ରଥମେ ନା ପୁଲିସ ନା ଅବକାରୀ ବିଭାଗ ପାଖରେ କିଛି ଖବର ଥିଲା । ହେଲେ ପୋତା ହୋଇଥିବା ଯୁବକର ମୁଣ୍ଡ ତା ପରଦିନ ସକାଳୁ ଆଖପାଖ ଗାଁ ଲୋକ ଦେଖିଥିଲେ । ଗଣମାଧ୍ୟମ ପ୍ରତିନିଧି ଘଟଣାସ୍ଥଳରେ ପହଞ୍ଚିଲା ପରେ ଉକ୍ତ ଶବରୁ ହିଁ ମଦମୃତ୍ୟୁ ଘଟଣାର ପର୍ଦ୍ଦାଫାସ୍ ହୋଇଥିଲା ।
ଶବ ଦେଖି ଜଣେ ବ୍ୟକ୍ତି ଗଡ଼ହୁମ୍ମା ବାଉରି ସାହିକୁ ଯିବା ପାଇଁ ଇଙ୍ଗିତ କରିଥିଲେ । ଅଘୋଷିତ ଭାବେ ମଦ ମାଫିଆମାନେ ଗାଁକୁ ଏକରକମ ନାକା ବନ୍ଦୀ କରି ରଖିଥିଲେ । ପିଛିଲା ବାଟ ଦେଇ ଗାଁ ଭିତରେ ସାମ୍ବାଦିକମାନେ ପହଞ୍ଚିବା ବେଳକୁ ଅନେକ ଯୁବକ ମରି ନିଜ ଘର ବାରିପଟେ ଶୋଇ ରହିଥିଲେ । ଅନେକ ଯୁବକ ଯନ୍ତ୍ରଣାରେ ଛାଟିପିଟି ହେଉଥିଲେ । ମାତ୍ର ସେମାନଙ୍କୁ ଡାକ୍ତରଖାନାକୁ ମଧ୍ୟ ଛାଡ଼ୁ ନ ଥିଲେ ମାଫିଆ । ଯେଉଁମାନଙ୍କ ପ୍ରାଣ ଯାଉଥିଲା, ଗାଁ ନିକଟ ଏକ ଚାଞ୍ଚରା ଉପରେ କିରାସିନି ଢାଳି ନିଆଁ ଲଗାଇ ଦେଉଥିଲେ । ଏହି ମଦ ପିଇଥିବା ବେଲପଡ଼ା, ସାନରାମଚନ୍ଦ୍ରପୁର ପଞ୍ଚାୟତରୁ ଜଣଙ୍କ ପରେ ଆଉ ଜଣଙ୍କ ମୃତ୍ୟୁ ଖବର ଆସି ପହଞ୍ଚିଥିଲା । କିଏ ମଲା, କାହାର ଆଖିକୁ ଦେଖାଯାଉ ନଥିଲା ।
ଘଟଣା ଚାରିଆଡ଼େ ବ୍ୟାପିଯିବା ପରେ ସବୁଆଡ଼େ ହଇଚଇ ଖେଳିଗଲା । ସମସ୍ତଙ୍କୁ ବ୍ରହ୍ମପୁର ବଡ଼ ଡାକ୍ତରଖାନା ନିଆଯାଇଥିଲା । ତତ୍କାଳୀନ ଗଞ୍ଜାମ ଏସ୍ପି ଡା. ରାଧାକୃଷ୍ଣ ଶର୍ମା ଓ ଜିଲ୍ଲାପାଳ ସଞ୍ଜୟ ସିଂହ ଡାକ୍ତରଖାନାରେ ସ୍ଥିତି ପରଖିଥିଲେ । ଏହି ଘଟଣାରେ ପ୍ରାୟ ୨୨ ଜଣଙ୍କ ଜୀବନ ଯାଇଥିଲା । ଅନେକ ଯୁବକ ସବୁଦିନ ପାଇଁ ଅନ୍ଧ ହୋଇଯାଇଥିଲେ । ଏହି ଅଘଟଣର ସାକ୍ଷୀ ଅଛନ୍ତି ସାନରାମଚନ୍ଦ୍ରପୁରର ଦୃଷ୍ଟିହୀନ ଟି.କ୍ରିଷ୍ଣା ପାତ୍ର । ଏହି ଘଟଣାରେ ବହୁ ପରିବାରର ସଂସାର ଉଜୁଡ଼ିଗଲା । ରାଜନେତାଙ୍କ ଗସ୍ତ ମଧ୍ୟରେ ଅନେକ ପ୍ରତିଶ୍ରୁତି ମିଳିଥିଲା ଯାହା ଆଶ୍ୱାସନା ହୋଇ ରହିଗଲା । ମଦ ପ୍ରସ୍ତୁତିରେ ରାସାୟନିକ ଦ୍ରବ୍ୟର ମିଶ୍ରଣ ବେଳେ ଭାଗ ମାପ ଠିକ୍ ହୋଇ ନ ପାରିବାରୁ ତାହା ବିଷାକ୍ତ ହୋଇ ଅନେକଙ୍କ ଜୀବନ ନେଇଥିଲା । ବହୁ ଲୋକ ଗିରଫ ହୋଇଥିଲେ, ବିଚାର ବିଭାଗୀୟ ତଦନ୍ତ ବି ହୋଇଥିଲା । ତେବେ ସେତେବେଳର ଏହି ମଦମୃତ୍ୟୁ ଘଟଣା ଆଜି ବି ଅନେକ ପରିବାରକୁ ଦୁଃଖଶୋକରେ ବୁଡ଼ାଇ ରଖିଛି । ଗଡହୁମ୍ମାର ପଞ୍ଚୁ ଦାସ ଯୁବକ ଅବସ୍ଥାରେ ମଦମୃତ୍ୟୁର ଶିକାର ହୋଇଥିଲେ ।
ସେତେବେଳେ ତାଙ୍କର ଛୋଟ ଛୋଟ ପିଲା ଓ ସ୍ତ୍ରୀ ଥିଲେ । ସ୍ତ୍ରୀ ବର୍ତ୍ତମାନ ଆଉନାହାନ୍ତି । କିନ୍ତୁ ପଞ୍ଚୁ ଦାସଙ୍କ ବଡ଼ବୋହୂଙ୍କ କହିବା କଥା, ଶ୍ୱଶୁର ମଦ ଲାଗି ମଲେ । ସେତେବେଳେ ୧୦ ହଜାର ଟଙ୍କା ସହାୟତା ମିଳିଥିଲା । କୁହାଯାଇଥିଲା ଆହୁରି ଟଙ୍କା ମିଳିବ, ଝିଅ ବିବାହକୁ ଟଙ୍କା ମିଳିବ । ହେଲେ ଆଉ କିଛି ମିଳିଲାନି । ସେହି ଗାଁର ବିପିନି ଦାସଙ୍କ ମଧ୍ୟ ଜୀବନ ଯାଇଥିଲା । ଆଜି ବି ସ୍ୱାମୀଙ୍କୁ ଝୁରୁଛନ୍ତି ୭୦ ବର୍ଷୀୟା ସ୍ତ୍ରୀ କମା ଦାସ ।ସେହି ରାତିରେ ସ୍ୱାମୀ ମଦ ପିଇ ଘରକୁ ଆସିବା ଏବଂ ଘରେ ପଡ଼ି ଛଟପଟ ହେବା ଭୁଲି ନ ଥିବା କହନ୍ତି ସେ । ଡାକ୍ତରଖାନାରେ ସ୍ୱାମୀଙ୍କ ମୃତ୍ୟୁ ପରେ ସହାୟତା ଦିଆଯିବ ବୋଲି କୁହାଯାଇଥିଲା । ଏଥିପାଇଁ ରାଜରାସ୍ତାରେ ଆନ୍ଦୋଳନ ମଧ୍ୟ କରିଥିଲୁ । ହେଲେ କିଛି ଫଳ ମିଳିଲାନି ।
ଏବେ ଜୀବନ ଜୀବିକା ପାଇଁ ପୁଅମାନେ ଦାଦନ ଖଟିବାକୁ ଯାଇଛନ୍ତି । ସେ ବୋହୂ ପାଖରେ ରହିଥିବା କହିଛନ୍ତି କମା । କନ୍ଧୁଣୀ ଦାସଙ୍କ ବୟସ ୬୦ ବର୍ଷ । ସେ କହିବା ପ୍ରକାରେ ସ୍ୱାମୀ କନ୍ଧ ଦାସ ପଦରକୁ ଯାଇଥିଲେ, ସେଠାରୁ ଫେରି ମଦ ପିଇ ଅସୁସ୍ଥ ହୋଇ ପଡ଼ିଥିଲେ । ମାଫିଆମାନେ ଚୋରା ମଦ ବିକୁଥିଲେ । ତାହାକୁ ପିଇ ସ୍ୱାମୀ ମେଡିକାଲରେ ମଲେ । ହେଲେ ତାଙ୍କୁ କିଛି ସହାୟତା ମିଳିନଥିଲା । ପୁଅମାନେ ମୂଲ ଲାଗିବାକୁ ଯାଉଛନ୍ତି । ସେମାନେ ଯାହା ଖାଇବାକୁ ଦେଉଛନ୍ତି ଖାଇ ବଞ୍ଚିଛି । ଭଗବାନ କାହାକୁ ଏହି ଦଣ୍ଡ ନ ଦିଅନ୍ତୁ ବୋଲି କାନ୍ଦିକାନ୍ଦି କହିଥିଲେ ସେ ।
ସାନରାମଚନ୍ଦ୍ରପୁର ଗାଁରେ ମଦ ପିଇ ମରିଥିଲେ ଟି. ଗଙ୍ଗେୟା ପାତ୍ର । ସ୍ତ୍ରୀ ଟି. ଆମି ପାତ୍ରଙ୍କ ବୟସ ଏବେ ୭୦ ବର୍ଷ । ସେ କହିବା ପ୍ରକାରେ ମଦ ପିଇ ଆମ ଗାଁର ଆହୁରି କିଛି ଲୋକ ମରିଥିଲେ । ତେବେ ସରକାରୀ ସାହାଯ୍ୟ କିଛି ମିଳିନାହିଁ । ସେହିପରି ବି.ସନ୍ୟାସୀ ପାତ୍ର ହୋଟେଲରୁ କାମ କରି ଘରେ ପହଞ୍ଚିବା ପରେ ତଳେ ପଡ଼ିଯାଇଥିଲେ । ସ୍ତ୍ରୀ ବି.ବୁଡାମ୍ମା ସ୍ୱାମୀଙ୍କ ମୁଣ୍ଡରେ ତେଲ ଘଷି ଦେଇଥିଲେ । ହେଲେ ଦେହ ସୁଧୁରି ନଥିଲା । ମୋର ନାନୀ ସ୍ୱାମୀଙ୍କୁ ବଡ଼ ଡାକ୍ତରଖାନା ନେଇଥିଲା । ସେଠାରେ ତାଙ୍କ ଜୀବନ ଚାଲିଗଲା । ଏବେ ପିଲାପିଲି କେହି ନାହାନ୍ତି, ସରକାରୀ ସହାୟତା କିଛି ମିଳି ନଥିଲା, ବହୁ କଷ୍ଟରେ ଚଳୁଛି ବୋଲି କହିଛନ୍ତି ମୃତକଙ୍କ ସ୍ତ୍ରୀ ବୁଡାମ୍ମା ।
ବିଷାକ୍ତ ମଦମୃତ୍ୟୁର ଅନ୍ୟତମ ସାକ୍ଷୀ ଟି. କ୍ରିଷ୍ଣା ପାତ୍ର । ସେ କହନ୍ତି, ମଦ ପିଇ ମୁଁ ମଲିନି ସତ କିନ୍ତୁ ମରିବାଠାରୁ ଆହୁରି ଅଧିକ ଯନ୍ତ୍ରଣା ଭୋଗୁଛି । ସବୁ ଦିନ ପାଇଁ ଅନ୍ଧ ହୋଇଗଲି । କୌଣସି କାମ କରିପାରୁନି । ସ୍ତ୍ରୀ କାମକୁ ଗଲେ ମୁଁ ଖାଉଛି । ସରକାରୀ ସହାୟତା ଦୂରର କଥା, ଓଲଟା କୋର୍ଟ କଚେରି ଯାଇ ବହୁ ଟଙ୍କା ପଇସା ସରିଥିଲା ବୋଲି କହନ୍ତି ସେ ।