ଗୋପାଳପୁର/ବ୍ରହ୍ମପୁର,(ପ୍ରହଲ୍ଲାଦ ସାହୁ): ଗଞ୍ଜାମ ଜିଲ୍ଲାରେ ମଦମୃତ୍ୟୁ ନୂଆ ନୁହେଁ । ମଦ ପାଇଁ ଅନେକ ପରିବାର ଛାରଖାର ହୋଇଯାଇଛି। ଜିଲ୍ଲାରେ ୧୯୯୪ରୁ ଆଜି ପର୍ଯ୍ୟନ୍ତ ବିଷାକ୍ତ ମଦ ପିଇ ୫୩ ଜଣଙ୍କ ମୃତ୍ୟୁ ହେଲାଣି । ତଥାପି ବିଷାକ୍ତ ମଦ କାରବାର ବନ୍ଦ ହୋଇ ନାହିଁ । ମଦ ପିଇ ମରିଯାଇଥିବା ଲୋକଙ୍କ ପରିବାରରେ ଏବେ ବି ଦୁଃଖର ବୋଝ ହଟି ନାହିଁ । କିଏ ପୁଅକୁ ହରାଇ ବାହୁନି କାନ୍ଦୁଛି ତ ଆଉ କିଏ ବାପା ବା ସ୍ୱାମୀକୁ ହରାଇ ଦୁଃଖରେ ଜୀବନ କାଟୁଛି ।
୨୦୦୬ରେ ଗୋଳାବନ୍ଧରେ ବିଷାକ୍ତ ମଦ ପିଇ ୧୨ ଜଣଙ୍କ ମୃତ୍ୟୁ ହୋଇଥିଲା । ସେମାନଙ୍କ ଭିତରେ ଥିଲେ ଏ. ସରସ୍ୱତୀଙ୍କ ସ୍ୱାମୀ ଏ. ସନ୍ନ୍ୟାସୀ । ସେଲୁନରେ କାମ କରି ସେ ପରିବାର ପ୍ରତିପୋଷଣ କରୁଥିଲେ । ୬ ଝିଅ ଓ ଗୋଟିଏ ପୁଅ । ପରିବାର ଲୋକ ବହୁ ଚେଷ୍ଟା କରି ବି ତାଙ୍କର ମଦ ଅଭ୍ୟାସ ଛଡ଼ାଇ ପାରି ନ ଥିଲେ । ୨୦୦୬ ଏପ୍ରିଲ୍ ୨୨ ତାରିଖ ସକାଳୁ ସନ୍ନ୍ୟାସୀ ସେଲୁନକୁ ଯିବାକୁ ଘରୁ ବାହାରିଥିଲେ । କିଛି ସମୟ ପରେ ସେ ଅସୁସ୍ଥ ଥିବା ଖବର ଆସିଥିଲା । ପରିବାରର ସମସ୍ତେ ଦୌଡ଼ିଥିଲେ ବଡ଼ ଡାକ୍ତରଖାନା । ପୁଅ ସେତେବେଳେ ସେନାରେ ଭର୍ତ୍ତି ହୋଇଥିବାରୁ ବାହାରେ ଥିଲା ।
ଡାକ୍ତରଖାନାରେ କିଛି ସମୟ ଭିତରେ ସନ୍ନ୍ୟାସୀଙ୍କ ମୃତ୍ୟୁ ଖବର ଆସିଥିଲା । ପ୍ରଶାସନ ପକ୍ଷରୁ କେବଳ ୧୦ ହଜାର ଟଙ୍କାର ଆର୍ଥିକ ସହାୟତା ଯୋଗାଇ ଦିଆଯାଇଥିଲା । ପୂର୍ବରୁ ୩ ଝିଅ ବିବାହ କରିଥିଲେ । ବହୁ କଷ୍ଟରେ ଆଉ ଗୋଟିଏ ଝିଅ ଓ ପୁଅକୁ ବିବାହ କରାଇଲେ । ପୁଅ ଏବେ ଚାକିରି କରୁଛି । ଅର୍ଥାଭାବ କାରଣରୁ ଦୁଇଝିଅର ବିବାହ କରାଇପାରିନଥିଲେ। ଏବେ ବି ସେଦିନର କଥା ମନେପଡ଼ିଲେ ଛାତିରେ କୋହ ଉଠୁଛି ବୋଲି ସରସ୍ୱତୀ କହିଛନ୍ତି । ଭଡ଼ା ଘର,ଦୁଇଝିଅଙ୍କ ବୋଝ । ପରବର୍ତ୍ତୀ ସମୟରେ ଝିଅମାନେ ବି ମଜୁରି ଲାଗିବା ଆରମ୍ଭ କରିଥିଲେ । ଦୀର୍ଘ ୧୮ ବର୍ଷ ହେଲା ମୂଲ ଲାଗି ଖାଉଛନ୍ତି। ମଦ କେବଳ ସ୍ୱାମୀଙ୍କ ଜୀବନ ନେଇନି, ଆମ ସୁଖ ସଂସାରକୁ ଭାଙ୍ଗିଦେଇଛି ବୋଲି କାନ୍ଦିକାନ୍ଦି କହିଛନ୍ତି ସରସ୍ୱତୀ ।