ପାତ୍ରପୁର, ୧୨।୫ : ମଇଁଷି ଚରେଇବାକୁ ବିଲକୁ ଯାଇଥିଲେ। ହଠାତ ବଜ୍ରପାତ ହେବାରୁ ୨ ଜଣଙ୍କ ମୃତ୍ୟୁ ଘଟିଛି। ପାତ୍ରପୁର ବ୍ଲକ ପଦାଦିଗି ପଞ୍ଚାୟତ ଅନ୍ତର୍ଗତ ନାରାୟଣପୁର ଗ୍ରାମରେ ଏହି ଘଟଣା ଘଟିଛି। ମୃତକମାନେ ହେଲେ ନାରାୟଣପୁର ଗ୍ରାମର ସାକିଲି କନିଆରୀ ଏବଂ ତାଙ୍କ ସମ୍ପର୍କୀୟ ଏମ. ଭବେଶ କନିଆରୀ।
ଉଭୟେ ଗାଁ ନିକଟସ୍ଥ ନଦୀ ପାଖ ତୋଟାରେ ମଇଁଷି ଚରେଇବାକୁ ସୋମବାର ସକାଳୁ ଯାଇଥିଲେ ।ସେଠାରେ ମଇଁଷି ମନ୍ଦାକୁ ଚରିବାକୁ ଛାଡି ଅଳ୍ପ ଦୂରରେ ଉଭୟ ରୋଷେଇ କରୁଥିଲେ। ହଠାତ ବର୍ଷା, ପବନ ସହ ପ୍ରବଳ ବଜ୍ରପାତ ହୋଇଥିଲା । ବଜ୍ରପାତରେ ବିଲରେ ଉଭୟେ ଟଳି ପଡିଥିଲେ । ନିକଟରେ ଥିବା କିଛି ଲୋକ ଉଭୟଙ୍କୁ ପାତ୍ରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଆଣିଥିଲେ । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ଜରଡ଼ା ପୋଲିସ ପହଂଚି ଅପମୃତ୍ୟୁ ମାମଲା ରୁଜୁ କରି ଉଭୟ ଶବକୁ ଜବତ କରି ବ୍ୟବଚ୍ଛେଦ ପାଇଁ ପଠେଇଛି।
