ରାମଚଣ୍ଡୀ,୨୩/୦୩: ଚନ୍ଦ୍ରଭାଗା କଇଁଛ ପ୍ରଜନନ କେନ୍ଦ୍ରରେ ରଖାଯାଇଥିବା ଅଲିଭ୍ରିଡ୍ଲେ ଅଣ୍ଡାଗୁଡ଼ିକରୁ ଛୁଆ ଫୁଟିବା ମାତ୍ରେ ଦାୟିତ୍ୱରେ ଥିବା କର୍ମଚାରୀମାନେ ସତର୍କତାର ସହ ଏହାକୁ ସମୁଦ୍ରରେ ଛାଡ଼ିଛନ୍ତି । ପ୍ରଥମ ପର୍ଯ୍ୟାୟରେ ୧୮୦ଟି ଛୁଆ ସମୁଦ୍ରକୁ ଛଡ଼ା ଯାଇଛି । କଇଁଛଗୁଡ଼ିକ ଧୀରେ ଧୀରେ ସମୁଦ୍ର ମଧ୍ୟକୁ ପ୍ରବେଶ କରିଥିଲେ । ପ୍ରକୃତିର ନିୟମ ଅନୁଯାୟୀ ସବୁ ଛୁଆ ସମୁଦ୍ର ଆଡ଼କୁ ଅଗ୍ରସର ହୋଇଥିଲେ ।
କୋଣାର୍କ ବନଖଣ୍ଡ ଅଧୀନ କଅଁରପୁର, ଚନ୍ଦ୍ରଭାଗା, ଦଶଧାଡ଼ିଆ ଓ ରାମଚଣ୍ଡୀ ଅସ୍ଥାୟୀ କଇଁଛ ପ୍ରଜନନ କେନ୍ଦ୍ରରେ ଚଳିତ ମାର୍ଚ୍ଚ ୧୮ ପର୍ଯ୍ୟନ୍ତ ସମୁଦାୟ ୨୭୮ଟି ବସାରୁ ରେକର୍ଡ ସଂଖ୍ୟକ ୩୧ ହଜାର ୮୬୯ଟି ଅଣ୍ଡା ସଂଗ୍ରହ କରି ସତର୍କତା ସହିତ ବାଲିରେ ପୋତାଯାଇଛି। ପ୍ରାୟ ୪୫ରୁ ୬୦ଦିନ ମଧ୍ୟରେ ଅଣ୍ଡାରୁ ଛୁଆ ଫୁଟିବା ଆରମ୍ଭ ହୋଇଥିଲା । ଚନ୍ଦ୍ରଭାଗା ବସାରେ ୨୦୦ଟି ଅଣ୍ଡା ରଖାଯାଇଥିବା ବେଳେ ୫୪ଦିନରେ ୧୮୦ଟି ଛୁଆ ଫୁଟିଥିଲା । ଅବଶିଷ୍ଟ ୨୦ଟି ଅଣ୍ଡା ନଷ୍ଟ ହୋଇଯାଇଛି । କଇଁଛ ଅଣ୍ଡାଗୁଡ଼ିକୁ ବିଲୁଆ ଓ କୁକୁରଠାରୁ ରକ୍ଷା କରିବା ପାଇଁ ସୁରକ୍ଷାକର୍ମୀ ନିୟୋଜିତ ହୋଇଛନ୍ତି । ଛୁଆ ଫୁଟିବା ମାତ୍ରେ ଦାୟିତ୍ୱରେ ଥିବା କର୍ମଚାରୀମାନେ ଏହାକୁ ନେଇ ସମୁଦ୍ରରେ ଛାଡ଼ିଥିଲେ । ଏହି ପ୍ରଜନନ କେନ୍ଦ୍ରରୁ ପର୍ଯ୍ୟାୟକ୍ରମେ ଅଲିଭ୍ରିଡ୍ଲେ ଛୁଆଙ୍କୁ ସମୁଦ୍ରରେ ଛଡ଼ାଯିବ ବୋଲି କୋଣାର୍କ ବନ୍ୟପ୍ରାଣୀ ବନାଞ୍ଚଳ ଅଧିକାରୀ ସୁଦର୍ଶନ ଦେହୁରୀ କହିଛନ୍ତି ।
